Presidenca e Republikës së Kosovës njofton se ka krijuar profile të reja zyrtare në rrjetet sociale, me qëllim të sigurimit të vazhdimësisë së komunikimit me qytetarët
Pas përfundimit të mandatit të Presidentes së mëparshme, profilet ekzistuese janë marrë në administrim nga zyra e saj dhe nuk përfaqësojnë më komunikimin zyrtar të Presidencës. Institucionet publike nuk janë të lidhura me mandate individuale, ato duhet të kenë komunikim të qëndrueshëm, të qartë dhe me vijimësi, në shërbim të qytetarëve. Për këtë arsye, profilet e reja zyrtare do të administrohen drejtpërdrejt nga institucioni i Presidencës dhe do të shërbejnë si burimi i vetëm i informacionit zyrtar nga ky institucion. Ky hap siguron që komunikimi zyrtar të mbetet i lidhur me institucionin, duke ruajtur dhe garantuar vazhdimësinë institucionale në funksion të informimit të qytetarëve. Profilet në rrjetet sociale janë pronë e Presidencës dhe do të mbeten në përdorim të institucionit më të lartë të shtetit, pavarësisht se kush ushtron funksionin e Presidentit/es. https://www.facebook.com/profile.php?id=61573346312559
U.d Presidentja Haxhiu priti në takim Drejtoreshën Ekzekutive të Qendrës Kosovare për Rehabilitimin e të Mbijetuarve të Torturës (QKRMT), znj. Feride Rushiti
U.d Presidentja e Republikës së Kosovës, Albulena Haxhiu ka pritur sot në takim Drejtoreshën Ekzekutive të Qendrës Kosovare për Rehabilitimin e të Mbijetuarve të Torturës (QKRMT), znj. Feride Rushiti. “E falënderova znj. Rushiti për angazhimin e saj të palodhshëm dhe përkushtimin e jashtëzakonshëm në mbështetje të të mbijetuarve të dhunës seksuale gjatë luftës, një mision me rëndësi të veçantë, jo vetëm për të mbijetuarit dhe shoqërinë tonë, por edhe për forcimin e drejtësisë dhe dinjitetit në shtetin tonë”, ka thënë u.d Presidentja Haxhiu. Me këtë rast, u.d Presidentja Haxhiu e ka siguruar znj. Rushiti se do të ketë mbështetjen e plotë të saj dhe të institucioneve në çdo përpjekje për avancimin e të drejtave, dinjitetit dhe mirëqenies së të mbijetuarve.
Fjala e U.D. Presidentes Albulena Haxhiu mbajtur në meshën kushtuar Don Kelmend Spaqit
Sot, në këtë të hënë të Pashkëve, po e përcjellim në amshim një meshtar, por edhe një figurë që në momentet më të vështira të historisë sonë u bë muri mbrojtës për jetën dhe dinjitetin njerëzor. Veprimtaria e tij është dëshmi e një përkushtimi të plotë ndaj njeriut, ndaj besimit dhe ndaj atdheut. Për 33 vite meshtarie, Don Kelmendi shërbeu si udhërrëfyes në kohë paqartësie, mbështetje në kohë frike dhe zë i qëndrueshëm i së vërtetës. Ai jetoi me bindjen e thellë se feja dhe atdheu nuk e përjashtojnë njëra-tjetrën, madje ai e dëshmoi se si këto dyja e forcojnë njeriun për t’i shërbyer tjetrit. Në këtë kuptim, motoja e tij “për Fe, Atdhe e Liri” ishte edhe mënyrë jetese. Në ditët më të rënda të historisë sonë, kur dhuna dhe pasiguria synonin të shpërbënin jo vetëm jetën, por edhe besimin tek njëri-tjetri, Don Kelmendi qëndroi pranë njerëzve. Në Gllogjan të Pejës, në pranverën e vitit 1999, ai i hapi dyert e kishës “Shna Ndou”, apo siç njihet në popull Kisha e Shpresës, ku strehoi qindra qytetarë që u dëbuan me dhunë nga forcat paramilitare dhe ushtarake serbe. Po aty Don# Kelmendi, me ndihmën e motrave të nderit, trajtoi edhe njerëz të plagosur dhe asistoi edhe nënat e reja në kujdesin për foshnjat e tyre. Më 4 prill 1999 forcat paramilitare dhe policore serbe ia ndërprenë meshën, dhe nën kërcënimin e armës, i kërkuan të ndajë komunitetin katolik prej atij mysliman. Dhe ai u përgjigj se këtu nuk ka as katolikë dhe as myslimanë, por ka vetëm civilë të pambrojtur. Plot guxim dom Kelmendi e artikuloi një të vërtetë themelore: se para se të jemi të ndryshëm, jemi njerëz dhe jemi të një vendi. Ky qëndrim nuk ishte akt spontan. Ishte rezultat i një karakteri të brumosur me vlera kombëtare, i ndërtuar mbi besimin dhe etikën që nuk negocion me frikën. Ai vinte nga një familje që e kishte njohur përndjekjen. Por kjo nuk e bëri të tërhiqej. Përkundrazi, e bëri më të qartë në qëndrime dhe më të palëkundur në veprim. Po aq domethënëse ishte edhe mënyra se si ai dhe motrat rregulltare në famullinë e tij e jetësuan bashkëjetesën në praktikë, duke përdorur kambanat e kishës për të lajmëruar iftarin dhe syfyrin, në kohë lufte, për besimtarët myslimanë. Në këtë frymë ai dha mesazhin e qartë se dinjiteti njerëzor dhe respekti ndërfetar janë më të forta se çdo përpjekje për përçarje. E pikërisht përçarja ishte synim i regjimit të Millosheviçit. Don Kelmendi ishte njeri i thjeshtë në sjellje, por i madh në vepra. I afërt me njerëzit, i vëmendshëm ndaj nevojave të tyre, gjithmonë i gatshëm për të dhënë, pa kërkuar asgjë në këmbim. Ndarja e tij nga jeta, pikërisht në të Enjten e Madhe, në ditën e themelimit të meshtarisë, i jep një simbolikë të veçantë këtij largimi. Jeta e tij u sos pikërisht aty ku kishte nisur thirrja: në shërbim. Prandaj sot po e përcjellim në amshim një meshtar dhe patriot që jetën e tij e vuri në shërbim të të tjerëve, një njeri që la pas një shembull të shkëlqyeshëm, që nuk do të zbehet me kohën. Në emër të institucioneve të Republikës së Kosovës, shpreh mirënjohjen më të lartë institucionale për jetën dhe veprën e tij. Don Kelmendi na e la këtë trashëgimi të cilën ne e kemi përgjegjësi: ta ruajmë dhe t’i përcjellim tutje vlerat që ai mishëroi sepse figura të tilla nderohen vetëm duke i pëcjellur tutje vlerat që na i lënë pas. Ngushëllimet më të sinqerta për familjen Spaqi, për Kishën Katolike dhe për të gjithë ata që e njohën dhe e deshën. I përjetshëm qoftë kujtimi për Don Kelmend Spaqin.
U.D. Presidentja Haxhiu uron Pashkët: Besimi, shpresa dhe solidariteti janë vlera që e mbajnë shoqërinë të qëndrueshme edhe në kohë të vështira
U.D. Presidentja e Republikës së Kosovës, Albulena Haxhiu, ka uruar festën e Pashkëve. U.D. Presidentja Haxhiu ka thënë se kjo ditë e shenjtë rikujton se besimi, shpresa dhe solidariteti janë vlera që e mbajnë shoqërinë të qëndrueshme edhe në kohë të vështira. “Uroj që kjo festë të sjellë paqe në çdo familje dhe gëzim në çdo shtëpi. Qoftë kjo festë një moment reflektimi dhe rikthimi te përkujdesja për njëri-tjetrin, te ruajtja e dinjitetit njerëzor dhe te forcimi i lidhjeve që na mbajnë bashkë”, ka thënë u.d presidentja Haxhiu.
U. D. Presidentja Haxhiu bëri homazhe në Rezallë: Gjurmët e krimit nuk do të fshihen kurrë e krimet e Serbisë nuk do të harrohen kurrë
U. D. Presidentja e Republikës së Kosovës, Albulena Haxhiu, ka bërë homazhe në 27- vjetorin e masakrës në Rezallë. Me këtë rast, u.d. Presidentja ka thënë se para 27 viteve këtu në Rezallë dhe në fshatrat përreth, u kryen masakra të pamëshirshme nga regjimi i Serbisë. “Më 5 prill të vitit 1999 në Rezallë të Skënderajt dhe në fshatrat përreth u zbatua plani i shfarosjes nga regjimi i Serbisë. Atë ditë, pra më 5 prill të vitit 1999, djem e burra nga mosha 13 vjeç deri në moshën 90 vjeç, u ndanë nga familjet e tyre, u plaçkitën, u nxorën dhunshëm nga shtëpitë e tyre dhe më pas u pushkatuan. Por, kjo nuk i mjaftoi regjimit të Serbisë, trupat e tyre i rrëmbyen dhe për trupat e tyre hapën varre masive në Serbi”, ka thënë u.d. Presidentja Haxhiu. Ajo ka theksuar se qëllimi ishte që t’i fshehin gjurmët e krimit gjenocidal, por gjurmët e krimit nuk do të fshihen kurrë e krimet e Serbisë nuk do të harrohen kurrë. “Ato do të mbahen mend gjatë e përherë në kujtesën e familjarëve të tyre, por edhe në kujtesën tonë kolektive. Si institucione të Republikës së Kosovës do të angazhohemi, që të ketë drejtësi edhe për Masakrën e Rezallës, por edhe për të gjitha masakrat, vrasjet, dhunimet, shkatërrimet e dëbimet, që Serbia i ka bërë në Kosovë”, ka thënë u.d. Presidentja Haxhiu.
Kryetarja e Kuvendit, Albulena Haxhiu mori sot detyrën e Ushtrueses së Detyrës së Presidentes së Republikës së Kosovës
Kryetarja e Kuvendit të Republikës së Kosovës, Albulena Haxhiu, ka marrë sot detyrën e Ushtrueses së Detyrës së Presidentes së Republikës së Kosovës. U. D. Presidentja Haxhiu, me këtë rast ka thënë se mekanizmat kushtetues që kemi ndërtuar garantojnë vazhdimësi e stabilitet institucional. “Këtë përgjegjësi do ta ushtroj me përkushtim të plotë, duke garantuar funksionim të pandërprerë të institucioneve dhe respektim të rendit kushtetues”, ka theksuar u.d. Presidentja Haxhiu. Ajo tutje ka thënë se Kuvendi i Republikës së Kosovës do të vijojë procedurën kushtetuese për zgjedhjen e Presidentit të ri brenda afateve kushtetuese. Deri në përmbylljen e këtij procesi, do ta ushtroj këtë detyrë në respekt të plotë të Kushtetutës, ligjit dhe interesit publik. Në fund, u.d. Presidentja Haxhiu ka falënderuar Presidenten Vjosa Osmani Sadriu për shërbimin e saj ndaj vendit dhe i ka uruar suksese në vazhdim.
Adresimi i Presidentes Osmani me rastin e përmbylljes së mandatit të Presidentes së Republikës
Të dashur qytetarë të Republikës së Kosovës, E nderuar mërgatë, forca që e mban Kosovën të lidhur me botën! Nuk ka nder më të madh se t’i shërbesh Republikës. Nuk ka përgjegjësi më të madhe, por edhe më fisnike, sesa të mbash mbi supe besimin e qytetarëve të tu. Falë përkushtimit tuaj ndaj vlerave demokratike dhe këmbëngulësisë për të krijuar institucione të qëndrueshme, unë e kam pasur këtë nder dhe përgjegjësinë madhore që të sigurohem se vullneti i juaj e zëri juaj do të përfaqësohen denjësisht. Që nga dita e parë, e kam marrë këtë detyrë me një bindje të qartë: se integriteti nuk negociohet, se shteti nuk përkulet dhe se besimi i qytetarëve nuk shpërdorohet. Kjo ka qenë busulla ime edhe kur rruga nuk ka qenë e lehtë e jashtëzakonisht sfiduese. Mbështetja juaj ka qenë e qartë, e zëshme dhe e vazhdueshme. E kam ndjerë në çdo lagje, në çdo fshat e qytet, në çdo takim, në çdo mesazh dhe në çdo mundësi që kam pasur t’ju takoj. Ajo mbështetje, mbi të gjitha, ishte besim. Dhe për këtë besim, përulem para jush me mirënjohjen më të thellë e të përjetshme. Sepse besimi i qytetarëve është forca që i jep kuptim çdo përgjegjësie publike. Atë besim unë e kam kthyer në besnikëri, ndaj jush, ndaj parimeve të shtetit, ndaj vlerave tona të përbashkëta kombëtare e demokratike. Besnikëri, vetëm e vetëm ndaj Republikës së Kosovës, sovranitetit të saj, pavarësisë së saj e paprekshmërisë së kufijve të saj. Për mua, thelbësore ka qenë dhe mbetet mbrojtja e interesit të shtetit dhe të qytetarëve tanë, ndërlidhja e historisë së mundimshme e sakrificës së popullit tonë me vizionin e atit themeltar të Republikës, Presidentit Rugova, nderimi i luftës sonë çlirimtare dhe mbrojtja e aleancave me aleatët tanë të sigurisë të cilët edhe 27 vite pas lufte, së bashku me institucionet tona ende e mbrojnë kufirin tonë me Serbinë. Mbrojtja e aleancës së lirisë me SHBA-të, me vendet evropiane dhe të gjitha vendet paqedashëse gjithandej globit ka qenë dhe mbetet themeli i qëndrueshëm për mbrojtjen e paqes. Unë nuk lëviz nga ky vizion, sepse ky është vizioni i shtetit tonë, ky është vizioni i qytetarëve të vendit tim. Të dashur qytetarë, Orientimi im si përfaqësuese e juaja ka qenë dhe mbetet i qartë, ai i Presidentit Rugova: një Kosovë e lirë, e pavarur, demokratike, e integruar në strukturat euroatlantike dhe në aleancë të përhershme me Shtetet e Bashkuara të Amerikës. Ky nuk ka qenë vetëm vizion; ka qenë udhërrëfyesi im i përditshëm. Dhe Kosova e këtyre pesë vjetëve është udhëhequr çdo ditë nga ky orientim i qartë strategjik. Me përulje të thellë, sikurse çdoherë, edhe sot nderoj heronjtë, martirët e lirisë, dëshmorët e Ushtrisë Çlirimtare të Kosovës; të gjithë ata që u zhdukën me dhunë nga forcat gjenocidale serbe; të gjitha të mbijetuarat e të mbijetuarit e dhunës seksuale gjatë luftës e të gjithë ata që dhanë gjithçka për këtë vend, sepse liria jonë mban emrin e tyre dhe Republika jonë qëndron mbi sakrificën e tyre. Këto kanë qenë përhershmëri e veprimeve të mia dhe busulla orientuese e çdo pune, në secilën ditë të angazhimit tim për Republikën tonë të dashur, duke u mbetur përherë besnike parimeve të shtetit tonë, tash në ditën e fundit të mandatit, sikur edhe në ditën e parë të tij. Sepse një Kosovë që hap dyer jashtë, është më e fortë brenda. Sepse një Kosovë që dëgjohet në botë, është gjithnjë më e sigurt në shtëpi. Në çdo takim, në çdo vizitë, në çdo bisedë me liderë botërorë, kam pasur një mesazh të vetëm: Kosova është republikë sovrane, demokratike, me kufij të paprekshëm dhe e vendosur të kontribuojë për paqen, stabilitetin dhe sigurinë ndërkombëtare, si në rajonin tonë, ashtu edhe përtej, dhe një shtet i destinuar për të ardhmen euroatlantike. Kjo punë nuk është ndalur në asnjë moment. Jam thellësisht krenare që këtë institucion po e lëmë më të respektuar në botë, me dyer të hapura dhe me aleanca të forcuara. Duke i sjellë Kosovës njohje të reja; duke arritur liberalizimin e vizave me BE-në e me shumë shtete të tjera; duke bërë hapa konkretë drejt integrimit të vendit në BE dhe në Këshillin e Evropës; e po ashtu hapa konkret drejt të ardhmes në NATO, duke siguruar garanca të fuqishme për paprekshmërinë e kufijve tanë; duke ndërtuar partneritete për fuqizimin e ushtrisë sonë; duke e bërë Kosovën pjesë të platformave ku nuk ka pasur qasje më herët, si me pjesëmarrjen historike në Samitin e NATO-s, duke e bërë anëtare themeluese në Bordin e Paqes; duke e kthyer Kosovën në qendër të agjendave globale: nga Agjenda për Gratë, Paqen dhe Sigurinë. deri te mbrojtja e fëmijëve në botën digjitale. Duke i përparuar ndjeshëm raportet me vendet e tjera, deri dje hezituese për të krijuar raporte me vendin tonë; duke hapur perspektiva të reja marrëdhëniesh politike me shumë vende të tjera gjithandej rruzullit tokësor, në këto 5 vjet kemi dëshmuar se edhe një shtet i vogël mund të ketë zë të madh. Sepse ky ishte vizioni ynë që në ditën e parë kur u betova në Kuvend por mbi të gjitha kur u betova para jush: që Kosova të mos jetë vetëm pjesë e tavolinave ndërkombëtare, por edhe kontribuuese aktive në to. Të dashur qytetarë, Si Komandante Supreme e FSK-së, kam parë nga afër forcën e vërtetë të këtij vendi: njerëzit tanë në uniformë. Gra dhe burra që nuk kërkojnë duartrokitje, por mbajnë mbi supe sigurinë tonë. Por e ardhmja kërkon më shumë se arritje. Kërkon edhe vigjilencë. Jetojmë në një kohë ku e vërteta sfidohet çdo ditë. Ku propaganda vishet si opinion. Ku shpifja e manipulimi tenton të zëvendësojë faktin. Prandaj ju lus: mos e humbni busullën tuaj. Sepse vetëm kur e vërteta njihet dhe mbrohet, manipulimi humbet fuqinë dhe busulla morale mbetet e palëkundur. Në javët e fundit, duke ju takuar anembanë Kosovës, kam parë diçka që nuk mund të fabrikohet: besimin që nuk shuhet lehtë. Por kam parë edhe pritjen e kërkesën tuaj, për më shumë drejtësi,
Presidentja Vjosa Osmani kujton 27-vjetorin e Masakrës në shtëpinë e familjes Vejsa
Në bodrumin e familjes Vejsa, 27 vjet më parë u krye një nga krimet më të tmerrshme të regjimit gjenocidal të Serbisë. 20 jetë të pafajshme, gra, fëmijë dhe një burrë, nga mosha vetëm 2 deri në 75 vjeç, u vranë mizorisht dhe më pas u dogjën. Krimi ndaj anëtarëve të familjeve Vejsa, Caka, Haxhiavdija, Nuqi, Hoxha dhe Gashi, nuk është vetëm një kujtim i dhimbshëm, por dëshmi e një krimi që nuk duhet harruar kurrë. Kujtojmë me respekt viktimat dhe jemi të vendosur që e vërteta të mos zbehet kurrë dhe drejtësia të vendoset sa më parë. Qoftë i përhershëm kujtimi për të gjithë të rënët për liri!
Presidentja Osmani në Ditën Botërore të Ndërgjegjësimit për Autizmin: Çdo fëmijë meriton të dëgjohet dhe të mbështetet
Presidentja e Republikës së Kosovës, Vjosa Osmani ka thënë se sikurse çdo vit, edhe sot, jemi krah për krah me fëmijët me autizëm dhe familjet e tyre. Presidentja Osmani ka shkruar: Sikurse çdo vit, edhe sot, jemi krah për krah me fëmijët me autizëm dhe familjet e tyre, për më shumë mirëkuptim, mbështetje dhe dashuri për secilin fëmijë. Sepse çdo fëmijë meriton të dëgjohet dhe të mbështetet. 🫶
Presidentja Osmani: Në Lybeniq, forcat serbe masakruan edhe fëmijët në djep, gratë shtatzëna dhe të moshuarit e palëvizshëm
Presidentja e Republikës së Kosovës, Vjosa Osmani ka bërë homazhe në 27 vjetorin e Masakrës së Lybeniqit. Presidentja Osmani ka shkruar: Në Lybeniq, forcat serbe masakruan edhe fëmijët në djep, gratë shtatzëna dhe të moshuarit e palëvizshëm. Aty u dëshmua sërish se qëllimi i regjimit gjenocidal të Serbisë ishte shfarosja e popullit tonë. Por nuk ia arritën! Sot, familjarët e të vrarëve në Lybeniq, ndërmjet dhimbjes dhe krenarisë, kanë edhe amanetin për ta ruajtur shtetin e ndërtuar mbi sakrificë, siç e kemi edhe secili prej nesh. Lybeniqi mbetet plagë e hapur në kujtesën tonë kolektive, por edhe dëshmi e qëndrueshmërisë sonë dhe e çmimit të lirisë. Drejtësia për viktimat është detyrim moral, njerëzor dhe shtetëror. Lavdi e përjetshme për martirët dhe dëshmorët e Lybeniqit!