Presidentja Osmani vizitoi kompaninë “Frutti”, e cila udhëhiqet nga ndërmarrësja Rina Malsori
Presidentja e Republikës së Kosovës, Vjosa Osmani ka vizituar sot në Prizren ndërmarrësen Rina Malsori, e cila udhëheqë kompaninë “Frutti”. Postimi i plotë i Presidentes Osmani: Sot në Prizren në vizitë tek ndërmarrësja Rina Malsori, e cila udhëheqë kompaninë “Frutti”. Nga uji i maleve të Sharrit e deri te lëngjet nga frutat e kultivuara, gjindet rrëfimi i suksesit të punës së saj. Një histori tejet frymëzuese e kësaj kompanie e cila numëron 200 punëtorë dhe ka 6 linja prodhuese me teknologjinë më bashkëkohore, që eksporton kudo në Evropë.
Presidentja: Rezultat i mrekullueshëm i xhudisteve tona të shkëlqyera në Budapest 2023 Masters Judo
Presidentja e Republikës së Kosovës, Vjosa Osmani ka uruar xhudistet Laura Fazliu dhe Distria Krasniqi për medaljet e tyre në Budapest 2023 Masters Judo. “Rezultat i mrekullueshëm i xhudisteve tona të shkëlqyera në Budapest 2023 Masters Judo. Urime yjeve tona të xhudos Laura Fazliu dhe Distria Krasniqi për medaljet e tyre të merituara të arta dhe të argjendta dhe gjithëve në #TeamKosovo që na bënë krenarë. Rruga për në Lojërat Olimpike #Paris2024 duket e ndritshme!”, ka shkruar Presidentja Osmani.
Presidentja Osmani: Kosova e gatshme t’i ndihmojë miqtë dhe aleatët sllovenë për ta kapërcyer këtë kohë pikëlluese
Presidentja e Republikës së Kosovës, Vjosa Osmani, i ka shprehur ngushëllime homologes së saj sllovene, Natasha Musar, ndërsa është shprehur e gatshme për ndihmë ndaj miqve dhe aleatëve tanë sllovenë. “Ngushëllime të sinqerta Presidentes Musar dhe popullit të Sllovenisë për viktimat dhe dëmet e shkaktuara nga përmbytjet dhe rrëshqitjet vdekjeprurëse të dheut. Kosova është e gatshme t’i ndihmojë miqtë dhe aleatët tanë sllovenë për ta kapërcyer këtë kohë pikëlluese”, ka shkruar Presidentja në Twitter.
Presidentja Osmani në Istog dekoroi dëshmorë të UÇK-së dhe personalitete të tjera, bëri homazhe, takoi të moshuarit dhe vizitoi një biznes
Presidentja e Republikës së Kosovës, Vjosa Osmani në kuadër të vizitave në komunat e vendit, sot ka vizituar komunën e Istogut.Presidentja Osmani fillimisht është pritur në takim nga kryetari i komunës së Istogut, Ilir Ferati. Më pas Presidentja Osmani ka bërë homazhe te shtatorja e presidentit historik dr. Ibrahim Rugova, për të vazhduar pastaj me homazhe te familja Imeraj nga Padalishta. Në kuadër të kësaj vizite Presidentja Osmani ka nderuar me medalje presidenciale dëshmorë të UÇK-së, veprimtarë e sportistë, si dhe ka vizituar Shtëpinë e të Moshuarve. Presidentja gjithashtu ka vizituar shtëpinë e familjes Josiq, në fshatin Veriq. Ndërkaq, në fund të vizitës në Istog, Presidentja Osmani ka vizituar biznesin “Onix”. Postimi i plotë i Presidentes Osmani:Përmbyllje e një dite të mirë në Istogun e Presidentit Rugova. U mirëpritëm nga kryetari Ilir Ferati dhe diskutuam për sfidat por edhe mundësitë që komuna e Istogut të zhvillohet edhe më hovshëm. Bëmë homazhe te shtatorja e presidentit historik dr. Ibrahim Rugova, për të vazhduar pastaj me homazhe te familja Imeraj nga Padalishta, të cilës më 1999 iu vranë 19 anëtarë të familjes. Me një prezencë masive të mërgatës sonë dhe qytetarëve të Istogut, nderova me medalje presidenciale dëshmorë të UÇK-së, veprimtarë e sportistë.Në Shtëpinë e të Moshuarve patëm një takim të ngrohtë me të moshuarit, të cilët kanë kontribuar për të mirën e përgjithshme. Ndërkaq, në fshatin Veriq, vizitova shtëpinë e familjes Josiq, e cila u dogj ditë më parë nëpërmjet një akti barbar, por tashmë janë ndarë fondet për rindërtimin e saj. Kosova është shtëpi e të gjithëve pa dallim, ndërkaq Istogu gjithnjë ka qenë shembull i mirë i bashkëjetesës për të gjitha komunitetet.E përmbylla vizitën në Istog, me një vizitë në biznesin “Onix”, banjë kjo, e cila paraqet një ambient jashtëzakonisht impresiv për shkak të ujërave termale që paraqesin mundësi për trajtim shëndetësor. Faleminderit për mikpritjen Istog! Shihemi në komunën e radhës!
Presidentja: Autorët e femicidit meritojnë dënim kapital
Presidentja e Republikës së Kosovës, Vjosa Osmani ka thënë se autorët e femicidit meritojnë dënim kapital. Ashtu siç u dënua sot vrasësi e torturuesi i Marigona Osmanit. “Autorët e femicidit meritojnë dënim kapital. Ashtu siç u dënua sot vrasësi e torturuesi i Marigona Osmanit. Le të jetë ky një mesazh për të gjithë ata që zgjedhin dhunën ndaj grave si mjet. Dhuna nuk do të tolerohet! Femicidi do të ndalet!”, ka shkruar Presidentja Osmani.
Presidentja Osmani priti në takim një delegacion të FMN-së
Presidentja e Republikës së Kosovës, Vjosa Osmani ka pritur sot në takim një delegacion të Fondit Monetar Ndërkombëtar (FMN) të udhëhequr nga Gabriel Di Bella, Shef i Misionit të FMN-së për Kosovë. Me këtë rast, Presidentja Osmani falënderoi ekipin e FMN për punën dhe mbështetjen për Kosovën nëpërmjet asistencës së vazhdueshme teknike dhe financiare dhe politikave inkurajuese që mbështesin zhvillimin e qëndrueshëm dhe prosperitetin ekonomik. Në takim u fol më gjerësisht për dy zhvillimet jashtëzakonisht pozitive në kuadër të bashkpëunimit me FMN, siç janë Marrëveshja Stand-By (SBA) përmes së cilës ofrohet likuiditet në rast të materializimit të sfidave në fushën e sigurisë ushqimore dhe energjetike si pasojë e agresionit rus në Ukrainë, si dhe Marrëveshja për lehtësimin e Rezistencës dhe Qëndrueshmërisë (SDR) përmes së cilës do të ofrohet financim i përballueshëm për të mbështetur përpjekjet e Kosovës për zbutjen dhe përshtatjen ndaj ndryshimeve klimatike dhe prodhimin më të gjelbër të energjisë elektrike. Me këtë rast, Presidentja Osmani theksoi rëndësinë që të ketë angazhim shtesë që projektet dhe mbështetja e ofruar përmes këtyre mekanizmave të jetë sa më e prekshme dhe e kuptueshme edhe për qytetarët e vendit, me qëllim të lehtësimit të barrës dhe ballafaqimit me sfidat dhe vështirësitë ekonomike nga ana e tyre. Gjatë takimit u diskutua për zhvillimet e fundit në fushën e sigurisë në vend dhe rëndësinë për koordinim dhe komunikim sa më të qartë me qëllim të garantimit të implementimit të suksesshëm të projekteve të përbashkëta.
Presidentja Osmani dhe Ministri Aliu takohen për përgatitjet për COP28
Presidentja e Republikës së Kosovës, Vjosa Osmani ka pritur sot në takim Ministrin e Mjedisit, Planifikimit Hapësinor dhe Infrastrukturës, Liburn Aliu. Në fokus të takimit ishin përgatitjet për pjesëmarrjen e Kosovës në COP28 që këtë vit mbahet në Emiratet e Bashkuara Arabe. Ftesa për delegacionin e Kosovës të udhëhequr nga Presidentja Osmani për pjesëmarrje në diskutimet e nivelit të lartë në kuadër të COP28 paraqet një moment historik dhe tejet të rëndësishëm sa i përket angazhimit të vendit në drejtim të implementimit të agjendës klimatike. Në takim u diskutua për zhvillimet dhe të arriturat në fushën e përpilimit dhe miratimit të legjislacionit të rëndësishëm në fushën e ndryshimeve klimatike, por edhe për rëndësinë e koordinimit ndërinstitucional për një paraqitje sa më të suksesshme të vendit në COP28. Presidentja Osmani dhe Ministri Aliu u dakorduan për bashkërendim të angazhimit dhe komunikimit në muajt në vijim, duke theksuar rëndësinë e madhe të adresimit të suksesshëm dhe efektiv të sfidave të lindura si pasojë e ndryshimeve klimatike me qëllim të garantimit dhe avancimit të mirëqenies së qytetarëve. Në takim u diskutua poashtu për projekte të shumta dhe iniciativa të rëndësishme në fushën e mbrojtjes së mjedisit dhe ndërtimit të infrastrukturës e të cilat janë të rëndësishme për avancimin e përpjekjeve vendore drejt avancimit të Agjendës së Gjelbër dhe përmirësimit të infrastrukturës ndërlidhëse në vend dhe rajon.
Presidentja Osmani dekoroi post mortem regjisorin Bekim Lumi me Medaljen Presidenciale të Meritave
Presidentja e Republikës së Kosovës, Vjosa Osmani në 5-vjetorin e ndarjes nga jeta, në prezencë të familjarëve dhe kolegëve, ka dekoruar me Medaljen Presidenciale të Meritave krijuesin, regjisorin e pedagogun, Bekim Lumi. Regjisori Lumi është dekoruar për merita të spikatura në artet dramatike, krijimtarinë kulturore dhe kontributin e çmuar për edukimin e brezave në teatër. Presidentja Osmani ka theksuar se regjisori Lumi shquhej për guximin dhe përkushtimin ndaj arteve dramatike, duke e vendosur teatrin kosovar në hartën kulturore evropiane. “Krijimtaria e Bekimit ishte alternative dhe avangarde, me një lojë të pasur estetike e skenike. Ai përfaqësoi në mënyrë dinjitoze teatrin e Kosovës nëpër teatrot evropiane, duke u shndërruar në emblemë të teatrit bashkëkohor të shtetit tonë. Na artësoi, siç preferonte të shprehej ai, ndërkaq ne sot po i shprehim mirënjohje dhe e nderojmë figurën dhe krijimtarinë e tij”, ka theksuar Presidentja Osmani në ceremoni.
Presidentja Osmani priti në takim Ambasadorin Hovenier
Presidentja e Republikës së Kosovës, Vjosa Osmani, ka pritur sot në takim të rregullt ambasadorin e Shteteve të Bashkuara, Jeffrey Hovenier, me të cilin ka biseduar për zhvillimet e fundit në vend me fokus në punën që po bëhet për të zbatuar atë se çfarë është dakorduar në Bratisllavë. Presidentja Osmani theksoi se kërcënimet nga Serbia dhe grupet e saj kriminale ndaj policëve të Kosovës që i takojnë komuniteteve joshumicë, kanë për qëllim t’i dekurajojnë komunitetet në Kosovë nga pjesëmarrja në jetën institucionale publike. Prandaj, Presidentja Osmani ritheksoi se këto veprime duhet të dënohen nga të gjithë. Në takim u diskutua edhe për bashkëpunimin bilateral në mes të Kosovës dhe SHBA-ve, me ç’rast u vlerësuan projektet e përbashkëta që kontribuojnë në thellimin e këtyre raporteve. Në takim u theksua edhe nevoja për intensifikim të mëtejmë të bashkëpunimit në këtë drejtim.
Presidentja Osmani nënshkruan Ligjin për Edukimin në Fëmijërinë e Hershme: Një hap i rëndësishëm drejt forcimit të sistemit tonë arsimor
Presidentja e Republikës së Kosovës, Vjosa Osmani ka nënshkruar Ligjin për Edukimin në Fëmijërinë e Hershme. “E lumtur që nënshkrova Ligjin për Edukimin në Fëmijërinë e Hershme, një hap i rëndësishëm drejt forcimit të sistemit tonë arsimor. Sa më shumë kohë kalojnë fëmijët në arsim parashkollor, aq më produktiv bëhen ata si të rritur. Përgëzoj Ministrinë e Arsimit për punën e saj në këtë ligj të rëndësishëm”, ka shkruar Presidentja Osmani.