Presidentja Osmani shpreh ngushëllime për humbjen e jetës së tre anëtarëve të familjeve Pacolli e Visoka
Presidentja e Republikës së Kosovës, Vjosa Osmani, pas nxjerrjes nga lumi Lepenc të tre trupave të pajetë, ka ngushëlluar familjet Pacolli e Visoka, të cilat pësuan nga aksidenti tragjik. “Me dhimbje të thellë pranova lajmin për vdekjen tragjike të tre anëtarëve të familjeve tuaja. Në këto çaste të rënda për familjet tuaja, bashkëndjej me ju dhe ju inkurajoj që të gjeni forcë për përballimin e dhimbjes. I përhershëm qoftë kujtimi për ta!”, thuhet në mesazhin ngushëllues të Presidentes Osmani. Presidentja Osmani, gjithashtu i ka uruar shërim të shpejtë, Shkëlqimit, të vetmit të mbijetuar nga ky aksident dhe ka falënderuar ekipet e Forcës së Sigurisë së Kosovës, Policisë së Kosovës, Shoqatës së Kosovës për Kërkim-Shpëtim, si dhe ekipin e kërkim-shpëtimit nga Maqedonia e Veriut për angazhimin e tyre.
Presidentja Osmani në vizitë pune në Gjermani
Presidentja e Republikës së Kosovës, Vjosa Osmani ka qëndruar në Berlin në një vizitë pune të përqendruar në diskutime thelbësore mbi zhvillimet e fundit në vend, si dhe mbështetjen e fuqizimin e personave me nevoja të veçanta. Presidentja Osmani mori pjesë në Olimpiadën Speciale Berlin 2023, në përkrahje të sportistëve tanë me nevoja të veçanta. Në këtë Olimpiadë, Republika e Kosovës përfaqësohet nga katër sportistë në diciplinën e atletikës. Mbështetja e personave me nevoja të veçanta është një nga kauzat kryesore të Presidentes Osmani dhe me këtë rast, ajo theksoi se këta sportistë janë shembull i fuqisë së diversitetit, gjithëpërfshirjes dhe pjesëmarrjes së barabartë, dhe vendosmërisë së jashtëzakonshme për majat e sukseseve. Në margjina të Olimpiadës Speciale, Presidentja Osmani pati diskutime me Presidentin gjerman Frank-Walter Steinmeier, si dhe me Kancelarin Olaf Scholz. Në diskutime të ndara me ta, Presidentja Osmani konfirmoi gatishmërinë për bashkëpunim të vazhdueshëm dhe koordinim me qëllim të ruajtjes dhe paqes në rajon, si dhe falënderoi Gjermaninë për qëndrimin e prerë për lirimin e tre policëve të kidnapuar ditë më parë. Gjatë qëndrimit në Berlin, Presidentja Osmani u prit në takim nga Kryetari i Bundesratit, Peter Tschentscher e që ishte hera e parë që një Presidente e Republikës së Kosovës pritet në Bundesrat. Presidentja Osmani po ashtu realizoi një takim me deputetë të Bundestagut nga partitë më të mëdha e që njëherit janë edhe anëtarë të Komisionit për Punë të Jashtme. Në këto takime, Presidentja Osmani ka folur për zhvillimet e fundit në vend, sfidat e sigurisë dhe rëndësinë e bashkëpunimit për tejkalimin e tyre, si dhe thellimin e mëtejmë bashkëpunimit në mes të dy shteteve tona. Ndërlidhur me zhvillimet e fundit dhe hapat përpara, Presidentja Osmani ka mbajtur një takim me gazetarët në kuadër të Korrespondten.cafe Berlin, si dhe ishte folëse kryesore në tryezën e rrumbullakët të organizuar nga Aspen Institute Germany. Në frymën e promovimit dhe mbështetjes së sportit, Presidentja Osmani vizitoi klubin më të vjetër shqiptar të futbollit në Gjermani „FC Liria Berlin”. Ky klub, përveç që ka arritur t’i bëjë bashkë shqiptarët në mërgatë dhe të mbajë gjallë jetën sportive dhe kulturore në Berlin, është edhe klubi i vetëm nga mërgata, i cili që nga shtatori i këtij viti do të bëhet pjesë e Bundesligës në futsall. Presidentja Osmani ka takuar dhe miq e dashamirë të shumtë të Republikës së Kosovës, të cilët i ka falënderuar për mbështetjen e tyre të palëkundur dhe për angazhimin për thellim të bashkëpunimit në mes të dy vendeve.
Presidentja Osmani takoi kancelarin Olaf Scholz, në kuadër të Lojërave Olimpike Speciale Botërore Berlin 2023
Presidentja e Republikës së Kosovës, Vjosa Osmani ka takuar kancelarin Olaf Scholz, në kuadër të Lojërave Olimpike Speciale Botërore Berlin 2023. “Në Berlin, poashtu në kuadër të Lojërave Olimpike Speciale Botërore Berlin 2023, pata mundësinë që të bashkëbisedoj me kancelarin Olaf Scholz ku diskutuam për hapat e nevojshëm për të ecur përpara. Shpreha mirënjohje për mbështetjen dhe qëndrimin e qartë të Gjermanisë për lirimin e menjëhershëm të policëve tanë”, ka shkruar Presidentja.
Presidentja Osmani takoi Presidentin e Gjermanisë Steinmeier, në kuadër të Lojërave Olimpike Speciale Botërore Berlin 2023
Presidentja e Republikës së Kosovës, Vjosa Osmani ka takuar Presidentin e Gjermanisë Frank-Walter Steinmeier, në kuadër të Lojërave Olimpike Speciale Botërore Berlin 2023. “Në kuadër të Lojërave Olimpike Speciale Botërore Berlin 2023, pata mundësinë të diskutoj për zhvillimet e fundit në Kosovë me Presidentin e Gjermanisë Steinmeier. Në frymën e marrëdhënieve të shkëlqyera Kosovë-Gjermani, konfirmuam gatishmërinë për bashkëpunim dhe koordinim të vazhdueshëm në dobi të paqes dhe stabilitetit rajonal”, ka shkruar Presidentja Osmani.
Presidentja reagon pas sulmeve ndaj gazetarëve: Ata që kryejnë këto sulme duhet të përballen me drejtësinë
Presidentja e Republikës së Kosovës, Vjosa Osmani ka reaguar pas sulmeve që iu bënë gazetarëve sot nga bandat kriminale. “Në veri të Kosovës, gazëtarët u sulmuan sërish në mënyrë brutale nga bandat kriminale. Ata që kryejnë këto sulme duhet të përballen me drejtësinë. Përpjekjet e tyre për ta destabilizuar Kosovën do të dështojnë. Këto akte të tmerrshme të dhunës së vazhdueshme duhet të dënohen nga të gjithë. Sundimi i ligjit do të mbizotërojë”, ka shkruar Presidentja.
Presidentja Osmani në Berlin në takime me dy dhomat e Parlamentit gjerman dhe përfaqësues të shoqërisë civile
Presidentja Vjosa Osmani po realizon një vizitë pune në Berlin me ç’rast ka pasur takime në dy dhomat e Parlamentit gjerman, Bundesrat dhe Bundestag, si dhe përfaqësues të shumtë të shoqërisë civile dhe të korit diplomatik. Në takime të ndara me Presidentin e Bundesratit, z. Peter Tschentscher, dhe me anëtarët e Komisionit për punë të jashtme të Bundestagut, Presidentja Osmani shprehu mirënjohjen e qytetarëve të Kosovës për mbështetjen që Gjermania ofroi për ndërtimin e demokracisë dhe mbrojtjen e paqes dhe sigurisë në Kosovë. Ajo po ashtu konfirmoi rëndësinë e bashkëpunimit dhe koordinimit të vazhdueshëm në adresimin e sfidave të fundit në fushën e sigurisë. Në diskutim me parlamentarët, por edhe në bashkëbisedat me shoqërinë civile dhe korin diplomatik, Presidentja Osmani vuri theks të veçantë tek fakti se zhvillimet aktuale në Kosovë nuk ndërlidhen vetëm me sigurinë e Kosovës, por se bëhet fjalë për sigurinë e të gjithë kontinentit. Prandaj, duke konfirmuar gatishmërinë e Kosovës për angazhim konstruktiv, ajo potencoi rëndësinë e komunikimit dhe shkëmbimit të rregullt në mes të të gjitha palëve duke siguruar një kuptim të drejtë dhe të qartë të situatës, si dhe burimit të vërtetë të jostabilitetit në Ballkanin Perëndimor. Ndër të tjera, në këto takime u fol edhe për bashkëpunimin e shkëlqyer në mes të dy vendeve në fusha të ndryshme e në veçanti në fushën e ekonomisë dhe shkëmbimeve tregtare, me ç’rast u ritheksua se ka përkushtim të plotë për avancim gjithnjë e më të thellë dhe intensifikim të shtuar të bashkëpunimit bilateral.
Presidentja Osmani: Mërgata e Kosovës kontribuese ekonomike dhe urë lidhëse me shumë shtete aleate
Presidentja e Republikës së Kosovës, Vjosa Osmani gjatë vizitës në Luksemburg është takuar sot edhe me mërgatën e Kosovës që jeton në këtë vend. Presidentja Osmani tha se mërgata jonë në Luksemburg është imazhi që na bën krenar. Në vijim postimi i plotë i Presidentes Osmani: Mërgata e Kosovës është e lidhur fort me traditën tonë kulturore e historike. Ata janë pjesa jonë nëpër botë, imazhi që na nderon, na bën krenar dhe që gjithnjë e pandalë bën diçka për Kosovën. E lumtur që sonte në Luksemburg takova kosovarë të suksesshëm në shumë sfera të angazhimit të tyre. Përtej kontributit ekonomik, mërgata është urë lidhëse me shumë shtete aleate të Kosovës. Perspektiva e dyfishtë dhe përvojat e larmishme e bëjnë mërgatën tonë me potencial zhvillimor për Kosovën, ndaj dera për ta gjithnjë është e hapur.
Presidentja Osmani u prit në takim nga kryetari i Dhomës së Deputetëve, Fernand Etgen dhe ministri i punëve të jashtme dhe çështje evropiane, Jeane Asselborn
Presidentja e Republikës së Kosovës, Vjosa Osmani gjatë vizitës në Luksemburg është pritur në takim nga kryetari i Dhomës së Deputetëve, Fernand Etgen dhe ministri i punëve të jashtme dhe çështje evropiane, Jeane Asselborn. Në të dy takimet, Presidentja Osmani ka falënderuar Luksemburgun për mbështetjen zhvillimore të Kosovës që nga viti 1999, në fusha të ndryshme, por edhe në procesin e integrimit evropian. Në këtë kontekst, Presidentja Osmani ka shfaqur besimin për mbështetjen e Luksemburgut edhe në procesin e anëtarësimit të Kosovës në Këshillin e Evropës, por edhe në organizata të tjera ndërkombëtare. Në këto takime, Presidentja Osmani ka theksuar se aplikimi për anëtarësim në BE është orientim strategjik i Kosovës, ku shumica e qytetarëve mbështesin integrimin evropian. Presidentja Osmani, ndër të tjera foli për situatën ne vend e rajon, si dhe angazhimin konstruktiv të Kosovës ne procesin e dialogut me Serbinë dhe rëndësinë e zbatimit të plotë të marrëveshjeve të arritura sivjet në Bruksel dhe Ohër.
Presidentja Osmani dhe Përfaqësuesi i Lartë Borrell kanë shkëmbyer letrat për vazhdimin e mandatit teknik të EULEX-it në përputhje me praktikat paraprake
Presidentja Osmani ka njoftuar Përfaqësuesin e Lartë të BE-së për Punë të Jashtme dhe Politikë të Sigurisë, Josep Borrell Fontelles, se ka zgjatur mandatin teknik të Misionit të BE-së për Sundimin e Ligjit në Kosovë (EULEX) për dy vite. Në përgjigjen e tij, z. Borrell ka konfirmuar vazhdimin e misionit të EULEX-it në Kosovë dhe ka falënderuar institucionet e Kosovës për bashkëpunimin e shkëlqyeshëm me misionin e EULEX-it. Misioni i EULEX-it në Kosovë do të vazhdojë me mandatin teknik, pa pasur fuqi ekzekutive, dhe do të bazohet në letërkëmbimet e vitit 2021 dhe 2022. Veprimtaria e misionit do të përqendrohet në monitorim, mentorim dhe këshillëdhënie.
Presidentja Osmani u prit në takim nga kryeministri i Luksemburgut, Xavier Bettel
Presidentja e Republikës së Kosovës, Vjosa Osmani gjatë vizitës në Luksemburg është pritur në takim nga kryeministri Xavier Bettel. Temë e diskutimit në këtë takim ishte edhe situata aktuale politike dhe e sigurisë në Kosovë, veçanërisht në veri të vendit pas rrëmbimit të tre zyrtarëve policor të Kosovës nga ana e Serbisë. Më tej, Presidentja Osmani tha se Kosova është ë përkushtuar për paqe e stabilitet dhe se sfidat do t`i tejkalojë me partnerë dhe aleatë. Duke u ndërlidhur me zhvillimet e fundit në veri, Presidentja Osmani ka theksuar se është e domosdoshme përballja më drejtësinë e grupeve kriminale të mbështetura nga Serbia, të cilat e sulmuan Policinë e Kosovës, pjesëtarët e KFOR-it dhe EULEX-it, gazetarët dhe qytetarët. Presidentja theksoi nevojën e shtimit të angazhimit të ndërmjetësuesit të dialogut, Bashkimit Evropian, drejt zbatimit të plotë të marrëveshjeve të arritura sivjet në Bruksel dhe Ohër. Presidentja e falënderoi kryeministrin Bettel për mbështetjen zhvillimore ofruar Kosovës, sikurse për liberalizimin e vizave. Njëkohësisht, Presidentja Osmani shprehu besimin për vazhdimin e mbështetjes në rrugën evropiane të Kosovës.