Komunikatë për media nga takimet e Presidentes Osmani
Presidentja e Republikës së Kosovës, Vjosa Osmani në vazhdën e takimeve për koordinim ndërinstitucional, ka ftuar sot në takim kryetarët e partive opozitare në Kuvendin e Kosovës. Përveç takimeve të vazhdueshme me krerët e institucioneve të vendit: Kryetarin e Kuvendit, Kryeministrin, Zëvendëskryeministren, Ministren e Punëve të Jashtme si dhe ministrat e dikastereve të tjera, Presidentja e ka parë të nevojshme që të mbajë komunikim të rregullt edhe me partitë opozitare, nëpërmjet ftesave të vazhdueshme për takime e ngjarje të ndryshme. Në këtë kuadër, pas letrës së Kryetarit të AAK-së, z. Ramush Haradinaj dhe diskutimeve me krerët e institucioneve, Presidentja ka ftuar liderët opozitarë fillimisht në takime të ndara, meqë disa nga krerët e institucioneve këto ditë nuk ishin në Kosovë. Ajo ndërkaq ka paralajmëruar edhe ftesën për një takim të përbashkët të të gjithë liderëve në një moment kur të gjithë të jenë në Kosovë. Në letrën e saj, Presidentja ka vlerësuar se bashkëpunimi dhe dialogu i hapur ndërmjet institucioneve dhe partive politike janë thelbësore për t’i përballuar sfidat aktuale dhe për të punuar së bashku drejt arritjes së synimeve të përbashkëta që përfshijnë mbrojtjen e tërësisë territoriale, sovranitetit dhe kushtetutshmërisë si dhe fuqizimin ndërkombëtar të Republikës, sikurse edhe në përmbushjen e prioritetit tonë shtetëror, anëtarësimin në NATO dhe BE. Në këtë kontekst, Presidentja Osmani, sot paradite ka zhvilluar një takim me kryetarin e Kuvendit të Kosovës, Glauk Konjufca, me të cilin ka biseduar për koordinimin e vazhdueshëm ndërinstitucional. Ndërkaq pasdite, Presidentja Osmani ka pritur në takim Kryetarin e Aleancës për Ardhmërinë e Kosovës, z.Ramush Haradinaj, me të cilin ka këmbyer pikëpamjet në raport me zhvillimet e fundit politike dhe të sigurisë në vend. Presidentja ka shprehur keqardhje që partitë e tjera opozitare kanë refuzuar mundësinë që ta japin kontributin e tyre për çështje të interesit nacional, përfshirë përpjekjet për fuqizimin e aleancave strategjike e ekzistenciale të Republikës së Kosovës me partnerët, e në veçanti me Shtetet e Bashkuara të Amerikës. Ajo ka ritheksuar, se në përputhje me Kushtetutën do të vazhdojë të angazhohet në përfaqësimin e unitetit qytetar, mbrojtjen e kushtetutës, ruajtjen dhe fuqizimin e aleancave strategjike, sikurse edhe krijimin e një klime konstruktive për t’i adresuar sfidat dhe çështjet e rëndësishme në Republikën e Kosovës. Sipas Presidentes Osmani, kontributi i secilit lider dhe subjekti politik është të bashkëpunojë për çështje të rëndësisë nacionale me institucionet shtetërore, por jo duke refuzuar. Pavarësisht kësaj, Presidentja Osmani ka bërë të ditur se dera e zyrës së saj vazhdon të jetë e hapur për liderë institucionalë dhe parti politike, në funksion të mbrojtjes së interesit shtetëror.
Presidentja Osmani dekretoi kryetarin e ri të Gjykatës Supreme, Fejzullah Rexhepi
Presidentja e Republikës së Kosovës, Vjosa Osmani, ka pritur sot në takim kryesuesin e Këshillit Gjyqësor të Kosovës, Albert Zogaj dhe kryetarin e ri të Gjykatës Supreme, Fejzullah Rexhepi. Me propozim të Këshillit Gjyqësor të Kosovës (KGJK), Presidentja Osmani ka dekretuar z. Rexhepi, kryetar të ri të Gjykatës Supreme. Në mes tjerash, në takim Presidentja Osmani ka theksuar rëndësinë e funksionimit të pavarur të sistemit gjyqësor, dhe në veçanti, rolin e Gjykatës Supreme brenda këtij sistemi. Në këtë drejtim, Presidentja ka shprehur gatishmërinë për bashkëpunim të ngushtë ndërinstitucional, brenda kompetencave dhe rolit të saj kushtetues për një sistem të drejtësisë të pavarur, funksional, dhe i cili siguron besimin e qytetarëve në të.
Presidentja Osmani priti në takim ambasadorin e Shqipërisë, Qemal Minxhozi
Presidentja e Republikës së Kosovës, Vjosa Osmani ka pritur sot në takim ambasadorin e Shqipërisë në Kosovë, z. Qemal Minxhozi. Në takim u diskutua mbi zhvillimet e fundit në vend dhe rajon, me ç’rast Presidentja Osmani foli për veprimet e vazhdueshme destabilizuese të Serbisë, përfshirë aktin e pastër të agresionit me tre policët e kidnapuar në territorin e Republikës së Kosovës. Presidentja Osmani potencoi rëndësinë e bashkëpunimit të ngushtë me Shqipërinë dhe aleatët tjerë, me qëllim të ruajtjes së paqes, sigurisë dhe stabilitetit afatgjatë në vend dhe rajon.
Presidentja Osmani priti në takim ambasadorin amerikan, Jeffrey Hovenier
Presidentja e Republikës së Kosovës, Vjosa Osmani ka pritur sot në takim të rregullt ambasadorin e Shteteve të Bashkuara, Jeffrey Hovenier më të cilin bisedoi për zhvillimet e fundit, me fokus të veçantë në zhvillimet në fushën e sigurisë në veri të vendit. Me këtë rast, Presidentja Osmani ritheksoi rëndësinë e lirimit të menjëhershëm dhe pa kushte të policëve të Kosovës të cilët u kidnapuan nga Serbia brenda territorit të Kosovës. Ajo po ashtu shprehi mirënjohje për qëndrimin e qartë të SHBA-ve sa i përket lirimit të policëve. Në takim u diskutua edhe për hapat e mëtejmë për shtensionimin e situatës dhe nevojën e bashkërendimit me partnerët, duke e ditur që si institucionet tona ashtu edhe SHBA ndajnë të njëjtin qëllim për një Kosovë të integruar në strukturat euroatlantike e me sovranitet dhe integritet territorial të pacenueshëm.
Presidentja Osmani ngushëllon familjen Nimani dhe gjithë komunitetit akademik e kulturor për ndarjen nga jeta të dorëshkruesit të Deklaratës së Pavarësisë së Kosovës, profesorit e artistit, Shyqri Nimani
Presidentja e Republikës së Kosovës, Vjosa Osmani i ka shprehur ngushëllime familjes Nimani dhe gjithë komunitetit akademik e kulturor për ndarjen nga jeta të dorëshkruesit të Deklaratës së Pavarësisë së Kosovës, profesorit e artistit, Shyqri Nimani. Në vijim gjeni të plotë ngushëllimin e Presidentes Osmani: Me dhimbje të thellë e pranova lajmin për ndarje nga jeta të dorëshkruesit të Deklaratës së Pavarësisë së Kosovës, profesorit e artistit, Shyqri Nimani. Fjalët e skalitura nga ai në pergamenë, janë testament për brezat që do të vijnë dhe kujtim i përhershëm për të. Për një kontribut të tillë, sikurse edhe atë në fushën e arteve, z.Nimani më 17 shkurt të këtij viti është dekoruar me Medaljen Presidenciale të Meritave. Ai ishte një intelektual i jashtëzakonshëm, pasioni dhe përkushtimi i të cilit frymëzoi studentë të panumërt. Veprimtaria e tij do të mbetet dëshmi e përkushtimit, pasionit dhe besimit të palëkundur në fuqinë transformuese të artit e të kulturës. Ngushëllime familjes Nimani dhe gjithë komunitetit akademik e kulturor!
Presidentja Osmani takoi një delegacion të ambasadorëve dhe zyrtarëve të lartë finlandez
Presidentja e Republikës së Kosovës, Vjosa Osmani, takoi një delegacion të ambasadorëve dhe zyrtarëve të lartë nga Finlanda të cilët po qëndrojnë në Kosovë në një vizitë pune. Duke iu uruar mirëseardhje në Republikën e Kosovës, Presidentja Osmani shprehu mirënjohjen e thellë të qytetarëve dhe institucioneve të Kosovës për mbështetjen e Finlandës për rrugëtimin evropian të Kosovës. Ajo theksoi se Kosova e vlerëson lartë partneritetin me Finlandën dhe konfirmoi gatishmërinë e plotë për hapjen e kapitujve të rinj të bashkëpunimit. Presidentja Osmani foli edhe për zhvillimet e fundit në vend, me ç’rast e konfirmoi edhe një herë përkushtimin e Kosovës për ruajtjen e paqes dhe stabilitetit në vend dhe rajon, në koordinim dhe bashkëpunim edhe me aleatët. Ajo foli edhe për tendendcat e vazhdueshme destabilizuese nga ana e Serbisë dhe vuri theks tek rëndësia e ballafaqimit me drejtësinë të grupeve kriminale të mbështetura nga Serbia e që sulmuan Policinë e Kosovës, pjesëtarët e KFOR-it dhe EULEX-it, gazetarët dhe qytetarët. Me këtë rast, në takim u diskutua edhe për tre policët e kidnapuar thellë në territorin e Republikës së Kosovës, gjë që Presidentja Osmani e vlerësoi si akt të pastërt të agresionit nga ana e Serbisë dhe theksoi rëndësinë e reagimit të unifikuar nga komuniteti ndërkombëtar me qëllim të lirimit të menjëhershëm të policëve që po mbahen padrejtësisht në Serbi.
Presidentja ngushëllon familjen Fehmiu dhe komunitetin sportiv për ndarjen nga jeta të doajenit të sportit të Kosovës, Arsim Fehmiu
Presidentja e Republikës së Kosovës, Vjosa Osmani i ka shprehur ngushëllime familjes Fehmiu dhe gjithë komunitetit sportiv, për ndarjen nga jeta të doajenit të sportit të Kosovës, z.Arsim Fehmiu. Në vijim gjeni të plotë ngushëllimin e Presidentes Osmani: Me dhimbje e pranova lajmin për ndarje nga jeta të doajenit të sportit të Kosovës, z.Arsim Fehmiu. Profesor Arsimi dha kontribut të çmuar në sferën universitare, por edhe në themelimin e institucioneve të pavarura sportive të Republikës së Kosovës. Kontributi i tij në sportin e futbollit, basketbollit, hendbollit dhe volejbollit, do të mbetet referencë për brezat e tashëm dhe të ardhshëm. Ngushëllime familjes Fehmiu dhe gjithë komunitetit sportiv!
Fjalimi i Presidentes Vjosa Osmani në Ditën Botërore të Refugjatëve
E dashura Feride, E dashura Luidmyla, I nderuar shef i Misionit të UNHCR-së Të nderuar pjesëmarrës nga Ukraina nga Afganistani e nga shtetet e tjera, z. Avokat i Popullit, Përfaqësues të institucioneve, Jam e nderuar që sot jam në mesin tuaj në një ditë që ngjallë kujtesë, por edhe shumë dhimbje për gjithë popullin e Kosovës. Fati i popullit tim na bënë që të përjetojmë të qenit refugjatë, më 1999, kur ekzistenca jonë ishte në pikëpyetje. Sikurse edhe të gjithë të tjerët në Kosovë gati sikur të gjithë të tjerët edhe vetë kam qenë refugjate ndaj në këtë ditë nuk ka si mos të solidarizohem me të gjithë refugjatët anekënd botës por në veçanti me ata që sot e kanë streh Republikën tonë. Populli i Kosovës e ndjen më së miri këtë, ngase 24 vjet më parë, neve na janë hapur dyert në shumë shtete të botës. Kjo ditë na e kujton se sa e rëndësishme është liria dhe të jetuarit e sigurt. Viti 1999 për ne ka shënuar një kapitull lufte me vuajtje, zhvendosje e humbje të mëdha njerëzore. Shërben edhe si një kujtesë e ashpër e mizorive të kryera nga shteti gjenocidal serb në atë kohë gjatë kohës së luftës, ndaj është thelbësore që të reflektojmë dhe ta kujtojmë këtë periudhë të errët në mënyrë që të sigurohemi që tmerre të tilla mos të përsëriten kurrë më. Ndërsa lufta u përshkallëzua, pasoi eksodi masiv i gati 1 milion burra, gra e fëmijë të Kosovës të cilët iu patën nënshtruar vuajtjeve të paimagjinueshme, të cilëve u shkelën të drejtat njerëzore, iu cenua ekzistenca, u dëbuan me dhunë nga regjimi gjenocidal i Millosheviqit. U detyruam të largohemi nga shtëpitë, duke lënë pas gjithçka që kishim për zemër. Historitë nga kjo periudhë janë një dëshmi e qëndrueshmërisë dhe forcës së shpirtit njerëzor, përballë fatkeqësive të paimagjinueshme që sjell lufta. Në ato ditë të errëta për ne, ngadhënjeu shpirti njerëzor. Popuj dhe shtete të ndryshme të botës u bashkuan në dhembshurinë tonë dhe u solidarizuan me ne duke hapur dyert dhe zemrat e tyre. Prandaj është përgjegjësi e jona kolektive që të mbrojmë paqen ta promovojmë tolerancën dhe të sigurohemi që çdo individ pavarësisht përkatësisë apo prejardhjes së tij, të jetojë i lirë nga frika dhe persekutimi. Ne duhet të qëndrojmë të bashkuar kundër padrejtësive, t`i mbrojmë të drejtat e të pambrojturve dhe të përpiqemi për një botë ku askush nuk është i detyruar ta durojë shpërnguljen dhe braktisjen e atdheut. Në Ditën Botërore të Refugjatëve, ne duhet të bashkohemi për ta nderuar qëndrueshmërinë, forcën dhe guximin e refugjatëve anekënd botës. Është një ditë për ta njohur gjendjen e vështirë të atyre që janë detyruar të largohen nga shtëpitë e tyre për shkak të luftërave, persekutimit apo fatkeqësive dhe për ta njohur edhe kontributin e tyre të madh për shoqërinë. Refugjatët nuk janë thjesht numra, por janë individë me ëndrra, aspirata me potencial. Ata mishërojnë shpirtin e paepur të mbijetesës njerëzore dhe shpresën e palëkundur për një të ardhme më të mirë. Ekspozita e sotme nga Luidmyla është pikërisht një dëshmi e kësaj sepse pavarësisht vështirësive me të cilat janë përballur, ata gjithnjë janë shembull i triumfit të shpirtit njerëzor kundër çfarëdo të keqeje. Askush nuk zgjedh të jetë refugjat. Mirëpo cilido mund të bëhet refugjat, cilido njeri në botë mund të përballet me rrethana të tilla. Rrethana që janë përtej kontrollit të tyre e i largojnë nga gjithçka që ata duan. Refugjatët nuk janë vetëm pranues të ndihmës, ata janë edhe agjentë të ndryshimit. Përvojat, aftësitë dhe perspektivat e tyre të ndryshme pasurojnë shoqëritë tona e rrisin diversitetin kulturor. Prandaj në këtë Ditë Botërore të Refugjatëve, le ta riafirmojmë përkushtimin tonë ndaj dhembshurisë dhe solidaritetit. Le ta hedhim poshtë frikën dhe ndarjen, dhe në vend të kësaj, ta përqafojmë mirëkuptimin dhe respektin. Duke i shtrirë dorën e ndihmës refugjatëve, ne jo vetëm që u lehtësojmë vuajtjet e tyre, por gjithashtu i forcojmë lidhjet që na bashkojnë mes vete. Në Ditën Botërore të Refugjatëve, le të avokojmë për mbrojtjen e të drejtave të tyre, qasjen në arsim kujdes shëndetësor dhe mundësi të barabarta jetësore. Le t’i fuqizojmë ata në mënyrë që ta rindërtojnë jetën e tyre dhe ta përmbushin potencialin e tyre, sepse duke e bërë këtë, ne krijojmë një botë më të drejtë, më humane dhe më të barabartë për të gjithë. Së bashku, mund të ndërtojmë një të ardhme ku askush nuk detyrohet të ikë, ku çdo individ vlerësohet dhe mbrohet dhe ku dhembshuria nuk njeh kufij. Le të qëndrojmë së bashku me refugjatët, jo vetëm sot, por çdo ditë, derisa çdo person të gjejë paqe, siguri dhe një strehë të sigurt në shtëpinë e vet. Ju faleminderit!
Presidentja: Nekibe Kelmendi është modeli i gruas që aktivizmin politik e profesional e orientoi në dobi të luftës për liri e pavarësi
Presidentja e Republikës së Kosovës, Vjosa Osmani ka përkujtuar Nekibe Kelmendin në dymbëdhjetë vjetorin e përjetësisë së saj. Përkujtimi i plotë e Presidentes Osmani: Ajo ishte një grua e paepur dhe stoike. Qëndroi deri në fund pavarësisht humbjes tragjike të burrit dhe djemve të saj. Nekibe Kelmendi është modeli i gruas që aktivizmin politik e profesional e orientoi në dobi të luftës për liri e pavarësi. Ajo dha kontribut të çmuar edhe në jetën institucionale pas luftës. Një bashkëpunëtore e presidentit historik dr. Ibrahim Rugova, e cila la pas një trashëgimi të bujshme të angazhimit të saj në vitet më të vështira dhe një model i gruas qëndrestare. Në dymbëdhjetë vjetorin e përjetësisë së saj, e kujtojmë me respekt këtë figurë, e cila mbetet model i gruas së angazhuar për liri e pavarësi!
Presidentja Osmani priti në takim Grupin e Miqësisë Austri-Kosovë në Parlamentin e Austrisë
Presidentja e Republikës së Kosovës, Vjosa Osmani ka pritur sot në takim një delegacion të Grupit të Miqësisë Austri-Kosovë në Parlamentin e Austrisë, të përbërë nga deputetë të partive të ndryshme politike në Austri. Në takim me delegacion austriak, Presidentja Osmani ka falënderuar shtetin e Austrisë për mbështetjen ndaj Kosovës përgjatë viteve, ndërsa ka shprehur gatishmërinë që të hapen kapituj të rinj të bashkëpunimit në mes të dy vendeve tona. Në këtë drejtim, Presidentja Osmani ka përmendur edhe rolin jetik të diasporës sonë në Austri si urë ndërlidhëse e bashkëpunimit dypalësh, si dhe në forcimin e mëtejmë të raporteve të shkëlqyera ndërshtetërore. Në takim u diskutua edhe për zhvillimet e fundit në fushën e sigurisë. Presidentja ka përmendur veprimet e vazhdueshme destruktive të Serbisë, të cilat kanë për qëllim të drejtpërdrejt destabilizimin e vendit tonë. Me këtë rast, Presidentja Osmani potencoi se ballafaqimi me drejtësinë i grupeve kriminale të mbështetura nga Serbia që sulmuan Policinë e Kosovës, pjesëtarët e KFOR-it dhe EULEX-it, gazetarët dhe qytetarët është i domosdoshëm. Në këtë frymë, Presidentja Osmani theksoi se Kosova është e përkushtuar për kontribut për paqen dhe stabilitetin e vendit dhe rajonit, në koordinim me aleatët. Presidentja Osmani shtoi se Kosova vlerëson mbështetjen e rëndësishme të Austrisë për integrimin e Kosovës në BE dhe organizata tjera ndërkombëtare, duke theksuar se avancimi i Kosovës në arenën ndërkombëtare sjellë më shumë stabilitet e prosperitet për të gjithë qytetarët, pa dallim. Më tej, në takim u diskutua edhe për mundësitë e rritjes së bashkëpunimit ndërmjet Kosovës dhe Austrisë, ndaj në këtë kontekst Presidentja Osmani përmendi potencialin ekonomik që ka Kosova, sikurse edhe mjedisin e favorshëm për investitorët e huaj. Politika e jashtme, arsimi, fuqizimi i grave dhe shkëmbimi tregtar u përmendën në kontekst të thellimit të bashkëpunimit të Kosovës me Austrinë.