Presidentja: Deklarata Kushtetuese e 2 Korrikut – ngjarje emblematike, e cila shënoi kthesën tonë historike për liri dhe pavarësi
Presidentja e Republikës së Kosovës, Vjosa Osmani ka uruar 2 korrikun, me ç’rast ka thënë se Deklarata Kushtetuese e 2 korrikut të vitit 1990, e shpallur nga 114 delegatët e Kuvendit të Kosovës hapi rrugën për përmbushjen e ëndrrës shekullore për Kosovën Republikë. Në vijim gjeni të plotë urimin e Presidentes Osmani: Deklarata Kushtetuese e 2 korrikut të vitit 1990, e shpallur nga 114 delegatët e Kuvendit të Kosovës hapi rrugën për përmbushjen e ëndrrës shekullore për Kosovën Republikë. Akti i tyre dëshmoi se rruga e bërjes së shtetit kërkon përkushtim, sakrificë dhe guxim. Delegatët e asaj kohe i gërshetuan këto të tria, duke vërë gurin themeltar të shtetit të Kosovës, i cili u vulos më 17 shkurt 2008. Deklarata Kushtetuese e 2 Korrikut është ngjarje emblematike, e cila shënoi kthesën tonë historike për liri dhe pavarësi. 2 Korriku mbetet një nga datat më të rëndësishme për shtetin tonë, ngase themelet e tij qëndrojnë mbi vendimin e delegatëve të asaj kohe. Urime 2 Korriku, qoftë e përjetshme Republika e Kosovës!
Presidentja: Presim me padurim të vazhdojmë përpjekjet tona për ta sjellë Kosovën më afër BE-së
Presidentja e Republikës së Kosovës, Vjosa Osmani, ka uruar Spanjën për marrjen e udhëheqësisë së presidencës së Bashkimit Evropian. “Ndërsa Suedia përfundon Presidencën e Këshillit të BE-së, falënderoj kryeministrin suedez Ulf Kristersson për lidershipin dhe përkushtimin e tij për sigurinë dhe stabilitetin në Evropë. Presim me padurim të vazhdojmë përpjekjet tona për ta sjellë Kosovën më afër BE-së gjatë @eu2023es dhe i urojmë Spanjës një kryesim të suksesshme”, ka shkruar Presidentja Osmani në Twitter.
Urimi i Presidentes Osmani për Kurban Bajram
Kurban Bajrami është mundësi reflektimi mbi solidaritetin, sakrificën e tolerancën. Është mundësi për t’i çmuar lidhjet tona familjare dhe miqësore, si dhe për të zgjatur dorën e mirësisë ndaj atyre në nevojë. Derisa sot mblidhemi së bashku për të festuar, le të kujtojmë frymën e unitetit dhe harmonisë që simbolizon kjo festë. Me shpresën që kjo festë të sjellë te ju, familjet dhe të afërmit tuaj të mira e begati, ju uroj edhe një herë me fat Kurban Bajramin.
Presidentja krahas liderëve dhe përfaqësuesve të tjerë të Evropës Juglindore, në Podgoricë për t’i rikonfirmuar përpjekjet e vazhdueshme të Kosovës për paqe dhe stabilitet të qëndrueshëm
Presidentja e Republikës së Kosovës, Vjosa Osmani po merr pjesë në Samitin e krerëve të shteteve të Procesit të Bashkëpunimit të Evropës Juglindore (SEECP), i cili po mbahet në Podgoricë. “Krahas liderëve dhe përfaqësuesve të tjerë të Evropës Juglindore, jam në Podgoricë për t’i rikonfirmuar përpjekjet e vazhdueshme të Kosovës për paqe dhe stabilitet të qëndrueshëm, si dhe angazhimin tonë për një të ardhme më të sigurtë brenda institucioneve euroatlantike. Përgëzoj Malin e Zi dhe Presidentin Jakov Milatović për kryesimin e suksesshëm të Procesit të sivjetëm të bashkëpunimit të Evropës Juglindore”, ka shkruar Presidentja Osmani.
Presidentja Osmani merr pjesë në Samitin e vendeve të Evropës Juglindore
Presidentja e Republikës së Kosovës, Vjosa Osmani Sadriu, ka udhëtuar për në Podgoricë, Mal të Zi, për të marrë pjesë në Samitin e krerëve të shteteve të Procesit të Bashkëpunimit të Evropës Juglindore (SEECP). Në këtë Samit, Presidentja Osmani do t’i bashkohet krerëve të 13 shteteve për të biseduar rreth thellimit të bashkëpunimit me vendet e rajonit dhe partnerët ndërkombëtarë për përshpejtimin e perspektivës evropiane të rajonit, garantimin e paqes, sigurisë dhe stabilitetit në rajon, si dhe promovimit të bashkëpunimit ekonomik dhe zhvillimit të qëndrueshëm.
Presidentja Osmani priti në takim Guvernatoren e Shtetit të Iowa-s, Kim Reynolds
Pas ceremonisë zyrtare të pritjes, Presidentja Osmani dhe Guvernatorja Reynolds zhvilluan takim të përbashkët . Ndërkaq, pas takimit Presidentja Osmani dhe Guvernatorja Reynolds nënshkruan marrëveshjen e marrëdhënies së shteteve simotra dhe bashkëpunimit në mes të Republikës së Kosovës dhe Shtetit të Iowa-s (Shtetet e Bashkuara). Pas nënshkrimit të kësaj marrëveshjeje, Presidentja Osmani dhe Guvernatorja Reynolds u deklaruan për media. Presidentja Osmani fillimisht ka shprehur falënderimet e përzemërta për gjithë punën që kanë bërë Shtetet e Bashkuara të Amerikës për lirimin e tre policëve të Republikës së Kosovës. “Para se të vazhdoj, më lejoni që fillimisht të shpreh falënderimet e përzemërta për gjithë punën që kanë bërë Shtetet e Bashkuara të Amerikës, për lirimin e tre policëve të Republikës së Kosovës, të cilët po mbaheshin të kidnapuar pas aktit të agresionit që Serbia kishte kryer ndaj Republikës së Kosovës, dhe tashmë ata janë të lirë dhe duke u kthyer në Republikën e Kosovës dhe tek familjet e tyre”, ka thënë Presidentja Osmani. Presidentja Osmani edhe një herë ka shprehur ngushëllimet familjarëve dhe miqve të qytetarëve që humbëm si pasojë e vërshimeve në Pejë. “Siç e dini Forca e Sigurisë së Kosovës dhe institucionet tjera emergjente menjëherë kanë ofruar ndihmën dhe përkrahjen e tyre të parezervë. Në këto momente tragjike për qytetarët e Pejës, mbështetja dhe përkrahja duhet të vazhdojë, në mënyrë që komuna e Pejës dhe qytetarët e saj ta përballojnë këtë situatë të rëndë dhe të rikuperohen nga kjo ngjarje tragjike që ka tronditur gjithë popullin e Kosovës”, ka theksuar Presidentja Osmani. Presidentja Osmani ka bërë të ditur se në takim me Guvernatoren Reynolds kanë diskutuar për raportet dypalëshe përgjatë viteve, dhe fushat në të cilat do të punojnë për ta thelluar tutje bashkëpunimin dhe partneritetin tonë, i cili po rritet çdo ditë e më shumë. Sot, me nënshkrimin e Marrëveshjes në mes të Republikës së Kosovës dhe Shtetit të Iowa-s, Presidentja ka thënë se dëshmuam edhe një herë përkushtimin tonë për të hapur kapituj të ri të bashkëpunimit dypalësh. “Kjo marrëveshje do të luajë rol jetik në zhvillimin e bashkëpunimit në fushat të ndryshme të interesit të ndërsjellë, përfshirë arsimin, kulturën, turizmin, bujqësinë e tregtinë, e fushën e energjisë si dhe do të krijojë instrumente për koordinim të shtuar në mes të dy vendeve tona edhe në fushën e mbrojtjes, një bashkëpunim ky që ka qenë esencial ndërmjet Forcës së Sigurisë së Kosovës dhe Iowa National Guard. Por mbi të gjitha, marrëveshja e nënshkruar sot do t’i hapë rrugë përafrimit të drejtpërdrejt dhe përfitimeve të drejtpërdrejta të qytetarëve tanë”, ka theksuar Presidentja. Presidentja Osmani më tej ka thënë se për Republikën e Kosovës, aleanca me Shtetet e Bashkuara vazhdon të mbetet ekzistenciale, “Qytetarët tanë janë populli më proamerikan në botë, prandaj, siç i shpreha edhe Guvernatores Reynolds më herët, në Kosovë ju gjithnjë do të gjeni miq dhe partnerë të përkushtuar”. Presidentja potencoi marrëdhëniet bilaterale ndërmjet Kosovës dhe Shteteve të Bashkuara janë të rrënjosura në vlera të përbashkëta dhe në angazhimin tonë për demokraci, sundim të ligjit, si dhe për paqe, siguri dhe stabilitet të qëndrueshëm në vend e rajon. “Vendosmëria e aleatëve tanë amerikanë për kauzën e Kosovës ka qenë e domosdoshme në rrugëtimin tonë drejt lirisë, pavarësisë e shtetndërtimit dhe sot, në përpjekjet tona të çdoditshme për rritje ekonomike si dhe për anëtarësim në institucionet euroatlantike. Prandaj, fuqizimin ndërkombëtar të Republikës, sikurse edhe në përmbushjen e prioritetit tonë shtetëror, që është anëtarësimi në NATO dhe BE, e shohim të mundshëm vetëm me përkrahjen dhe bashkërisht me forcat aleate strategjike, siç janë partnerët tanë në Shtetet e Bashkuara të Amerikës. Në këtë drejtim, Programi i Partneritetit Shtetëror të Iowas vazhdon të jetë jashtëzakonisht i rëndësishëm në zhvillimin dhe ngritjen e kapaciteteve të Forcës sonë të Sigurisë, në përputhje me objektivat dhe aspiratat tona shtetërore për anëtarësim në NATO”, ka theksuar Presidentja Presidentja ka thënë se jemi thellësisht falënderues për qindra burra dhe gra të Gardës Kombëtare të Iowas, të cilët kanë shërbyer në Kosovë përgjatë viteve në kuadër të KFOR-it. Presidentja Osmani dhe Guvernatorja Reynolds, gjithashtu kanë diskutuar edhe për zhvillimet e fundit në fushën e sigurisë dhe tejkalimin e sfidave me të cilat po përballet vendi dhe rajoni ynë. “Kosova si gjithnjë është plotësisht e përkushtuar për paqe dhe stabilitet afatgjatë në vend dhe rajon në koordinim të plotë me aleatët tanë”, ka pohuar Presidentja. Në fund, Presidentja Osmani ka falënderuar Guvernatoren Reynolds, për vizitën në Republikën e Kosovës dhe për mbështetjen e saj të palëkundur ndaj popullit të Kosovës dhe vendit tonë.
Ceremonia e nënshkrimit të marrëveshjes në mes të Republikës së Kosovës dhe Iowa-s, si dhe deklarata për media me Guvernatoren Kim Reynolds
Presidentja: Humbja e dy qytetarëve tanë si pasojë e vërshimeve në Pejë ka tronditur gjithë Kosovën
Presidentja e Republikës së Kosovës, Vjosa Osmani, ka reaguar pas humbjes së jetës së dy qytetarëve si pasojë e vërshimeve në Pejë. “Humbja e dy qytetarëve tanë si pasojë e vërshimeve në Pejë ka tronditur gjithë Kosovën. I shpreh ngushëllimet më të thella familjarëve, miqve, kryetarit të Komunës z. Gazmend Muhaxheri dhe gjithë qytetarëve të komunës së Pejës për këtë humbje të madhe e kaq tragjike”, ka thënë Presidentja Osmani Presidentja ka potencuar se Forca e Sigurisë së Kosovës dhe gjithë institucionet e tjera që merren me emergjenca të tilla janë në Pejë që nga mbrëmë duke ofruar ndihmën dhe përkrahjen e tyre. Tutje, Presidentja tha se në këto momente të rënda, është me rëndësi që përkrahja të vazhdojë në mënyrë që komuna e Pejës të përballojë dhe të rikuperohet nga kjo situatë e vështirë e tragjike. Presidentja Osmani ka biseduar me kryetarin e Komunës së Pejës, Gazmend Muhaxheri, i cili e ka informuar mbi gjendjen e tanishme në terren si dhe pasojat nga vërshimet. Presidentja i ka shprehur ngushëllime z. Muhaxheri si dhe gatishmërinë për të ofruar të gjithë përkrahjen e mundshme për të tejkaluar këtë situatë.
Presidentja Osmani priti në takim lamtumirës përfaqësuesen rezidente të UNDP-së në Kosovë, znj. Maria Suokko
Presidentja e Republikës së Kosovës, Vjosa Osmani, priti sot në takim lamtumirës përfaqësuesen rezidente të UNDP-së në Kosovë, znj. Maria Suokko, të cilën e falënderoi për angazhimin e saj përgjatë katër viteve të fundit në zbatimin e projekteve me në qendër të tyre mbështetjen e mirëqenies së qytetarëve të Kosovës. Presidentja Osmani vlerësoi lartë kontributin e UNDP-së në mbështetjen e shumë programeve dhe projekteve në Kosovë, me theks të veçantë tek ato për gratë, rininë, mjedisin, ndryshimet klimatike dhe personat me nevoja të veçanta. Në takim u diskutua për bashkëpunimin e mirëfilltë ndërmjet Zyrës së Presidentes dhe UNDP-së gjatë edicionit të kaluar të Forumit për Gratë, Paqen dhe Sigurinë dhe nismës së mbjelljes së drunjve, nisma të cilat vazhdojnë edhe këtë vit. Znj. Suokko shprehi falënderimin e sinqertë për bashkëpunimin me Presidenten Osmani dhe zyrën e saj dhe në të njëjtën kohë e njoftoi edhe për projektet e reja që priten të fillojnë të zbatohen gjatë muajve në vazhdim në Kosovë.
Fjala e Presidentes Osmani në ditëlindjen zyrtare të Madhërisë së Tij Mbretit Charles III
Faleminderit Ambasador, Kam kënaqësinë që të jem këtu në këtë event të mrekullueshëm. Të nderuar ministra, Ish-Presidentë, Deputetë, përfaqësues të institucioneve të Kosovës, Shkëlqesi, Ambasadorë, Të nderuar mysafirë, Kam kënaqësinë që të jem këtu, në këtë pritje të veçantë për të festuar ditëlindjen zyrtare të Madhërisë së Tij Mbretit Charles III. Ky kremtim i organizuar nga Ambasada Britanike këtu në Prishtinë, nuk është vetëm një dëshmi e miqësisë së rrënjosur thellë mes dy vendeve tona, por shërben edhe si deklaratë e përkushtimit tonë ndaj vlerave të përbashkëta dhe përkushtimit tonë për paqe dhe unitet evropian. Në emër të popullit të Kosovës, dua të shfrytëzoj rastin për të falënderuar nga zemra miqtë dhe partnerët tanë nga Mbretëria e Bashkuar për mbështetjen dhe miqësinë e tyre të palëkundur. Si një person që ka shërbyer për një kohë të gjatë në institucione, ndoshta nëpër disa prej momenteve më vendimtare të historisë sonë – nga pavarësia deri te njohjet – dhe shumë më tepër se kaq, e di drejtpërsëdrejti kontributin e pamatshëm që ky komb i madh ka dhënë në të kaluarën tonë, por edhe rolin që do të vazhdojë të luajë gjersa ne drejtojmë sfidat të së tashmes dhe të ardhmes. Andaj, sot, shpresoj se ky takim jo vetëm që do të shërbejë si përkujtim i ditëlindjes zyrtare të Madhërisë së Tij, por gjithashtu do të shërbejë për të theksuar lidhjet e qëndrueshme midis vendeve tona dhe për të festuar 15 vjet të marrëdhënieve diplomatike, të ndërtuara mbi një themel të fortë historik dhe të ushqyer nga vlerat dhe aspiratat e përbashkëta. Por, të dashur miq, z. Ambasador realiteti është se lidhja ndërmjet Kosovës dhe Mbretërisë së Bashkuar shkon përtej vlerave të përbashkëta. Ka pak vende në botë ku ka admirim më të madh për Union Jack dhe për atë se çfarë Mbretëria e Bashkuar përfaqëson në botë. Për popullin e Kosovës, ai flamur nënkuptonte siguri pasi trupat britanike ishin të parat që arritën në Prishtinë. Për popullin e Kosovës, Mbreti Charles III përfaqëson dikë që na qëndroi pranë në kohët më sfiduese dhe mbështeti disa nga njerëzit që mbajnë plagët më të thella të luftës në shoqërinë tonë. Ai e vazhdon këtë angazhim edhe sot, siç u konfirmua kur bisedova me të në fillim të këtij viti. Miqësia në mes të kombeve tona nuk është thjesht një miqësi, është një partneritet i veçantë i krijuar në momente fatkeqësie dhe në momente triumfi. Është një partneritet i krijuar përmes respektit të ndërsjellë, bashkëpunimit dhe një angazhimi të përbashkët për një të ardhme më të mirë për TËRË Evropën. Qoftë në fushën e politikës, tregtisë, kulturës, drejtësisë tranzicionale apo arsimit, Mbretëria e Bashkuar ka qenë një mbështetëse e palëkundur e aspiratave të Kosovës dhe një katalizator për përparimin tonë. Dhe për këtë, ne nuk themi vetëm faleminderit, por jemi të gatshëm të kthejmë të mirat. Gjersa reflektojmë me rastin e ditëlindjes zyrtare të Madhërisë së Tij, le të kujtojmë rolin e rëndësishëm që Familja Mbretërore ka luajtur në nxitjen e unitetit kombëtar në Mbretërinë e Bashkuar. Dhe ndërsa shënojmë ditëlindjen e parë zyrtare të Mbretit, le të kujtojmë po ashtu edhe trashëgiminë e Lartmadhërisë së Saj, Mbretëreshës së ndjerë Elizabeth II. Në vitin që lamë pas, Mbretëria e Bashkuar humbi Mbretëreshën, dhe kjo humbje u ndje thellë nga njerëzit në mbarë botën, duke përfshirë edhe popullin e Kosovës. Mbretëresha e udhëhoqi vendin e saj, me hir dhe modesti, dhe vuri shërbimin dhe detyrën mbi të gjitha. Trashëgimia, forca dhe qëndrueshmëria e saj do të vazhdojnë të frymëzojnë brezat e ardhshëm. Tani, nën udhëheqjen e Madhërisë së Tij Mbretit Charles, e di se marrëdhëniet midis dy vendeve tona vetëm do të vazhdojnë të forcohen. Si një kampion i palodhur i paqes, diplomacisë dhe të drejtave të njeriut, ai do të vazhdojë të jetë një partner i rëndësishëm për popullin e Kosovës. Në këto kohë sfiduese anembanë kontinentit tonë, madje edhe më afër vendit tonë, jam e sigurt se do të mund të vazhdojmë të llogarisim në mbështetjen e Mbretërisë së Bashkuar, por gjithashtu dua të them se ju mund të mbështeteni tek ne, mund të mbështeteni tek populli i Kosovës. Jam e bindur se duke u bashkuar, duke dëgjuar njëri-tjetrin, vlerat dhe vendosmëria jonë e përbashkët do të na mundësojnë të kapërcejmë pengesat dhe të ndërtojmë një të ardhme më të ndritshme për popujt tanë. Edhe një herë, në emër të popullit të Kosovës, zoti Ambasador, i shpreh urimet më të ngrohta Madhërisë së Tij, Mbretit, në këtë ditë të veçantë. Falënderim Ambasadës Britanike për organizimin e këtij eventi dhe për mbështetjen tuaj të palëkundur. Dhe për të gjithë mysafirët tanë, le të vazhdojmë të forcojmë lidhjet e miqësisë dhe bashkëpunimit që bashkojnë kombet tona. Faleminderit!