Presidentja Osmani: Urdhri “Dr. Ibrahim Rugova”, për Jeff Hovenier – i cili për Kosovën ishte më shumë se një Ambasador
Presidentja e Republikës së Kosovës, Vjosa Osmani në një ceremoni të veçantë ka dekoruar Ambasadorin e Shteteve të Bashkuara të Amerikës në Kosovë, Jeffrey Hovenier me Urdhrin “Dr. Ibrahim Rugova”. Postimi i plotë i Presidentes Osmani: Urdhri “Dr. Ibrahim Rugova”, për Jeff Hovenier – i cili për Kosovën ishte më shumë se një Ambasador. Ishte me ne kur populli i Kosovës ishte viktimë e krimeve të llahtarshme, ishte me ne kur raportonte për masakrën e Reçakut, ishte me ne kur vendosnim themelet e shtetit tonë të pavarur, e ishte me ne edhe përgjatë viteve të fundit në mbrojtje të pavarësisë, sovranitetit dhe aleancës së pathyeshme me SHBA-të. Faleminderit Ambasador Hovenier!
Presidentja Osmani në Këshillin Konsultativ për Komunitete: Mbrojtja, siguria dhe dinjiteti i çdo individi, janë prioritet
Këshilli Konsultativ për Komunitete, nën udhëheqjen e Presidentes së Republikës së Kosovës, Vjosa Osmani, ka mbajtur mbledhjen konstituive me përbërjen e re. Sipas Presidentes Osmani, Këshilli Konsultativ për Komunitete është dëshmi e përkushtimit të Kosovës për ndërtimin e një shoqërie të drejtë, të barabartë dhe gjithëpërfshirëse për të gjithë qytetarët. Në fjalimin e saj, Presidentja Osmani, theksoi përkushtimin e saj të palëkundur për të siguruar që çdo qytetar – pa dallim etnie, feje apo gjuhe – të ndihet pjesë e vlerësuar dhe aktive e shoqërisë së Kosovës. Presidentja Osmani vuri në dukje arritjet kryesore të këtij Këshilli përgjatë këtij viti, duke ofruar mbështetjen e plotë në përmbushje të objektivave. Në fjalimin e saj ndër të tjera, Presidentja Osmani ripohoi prioritetin e Presidencës për ta mbrojtur sigurinë dhe dinjitetin e çdo individi, duke siguruar që asnjë qytetar të mos margjinalizohet apo diskriminohet. “Një Kosovë e sigurt për fëmijët tanë në një botë ku siguria çdo ditë e më shumë rrezikohet nga forca të errëta dhe destabilizuese është një synim që na bashkon të gjithëve. Për Presidencën, ky është një prioritet dhe një angazhim i përditshëm. Ne duhet të ecim besimplotë drejt integrimit, qoftë brenda vendit, qoftë në proceset euroatlantike”, ka theksuar Presidentja Osmani. Në përfundim të fjalës së saj, Presidentja nënvizoi se fuqizimi i komuniteteve është një përgjegjësi institucionale dhe një angazhim i drejtë që fuqizon shtetin tonë.
Qendra Rajonale e Ekselencës për Gratë, Paqen dhe Sigurinë në Kosovë mbajti punëtori njëditore me fokus avancimin e pjesëmarrjes dhe rolit të grave në struktura ushtarake dhe sektorin e mbrojtjes
Qendra Rajonale e Ekselencës për Gratë, Paqen dhe Sigurinë në Kosovë, e themeluar nga Zyra e Presidentes së Republikës së Kosovës, ka organizuar punëtori njëditore me temën: “Avancimi i përfaqësimit dhe rolit të grave në ushtri: Një hap drejt barazisë më të madhe gjinore, paqes dhe sigurisë”. Kjo punëtori është organizuar në bashkëpunim me Ministrinë e Mbrojtjes së Republikës së Kosovës, si dhe në koordinim me Ekipin Këshillues dhe Ndërlidhës të NATO-s. Në pjesën e parë të saj, pjesëmarrësit u mirëpriten nga Presidentja Osmani, Ministri Maqedonci dhe Gjeneral Brigade Nawrat, të cilët theksuan rëndësinë e përfshirjes së grave në proceset e paqes dhe sigurisë, ashtu si edhe në strukturat ushtarake e sektorin e mbrojtjes. Në kuadër të kësaj ngjarje është organizuar edhe paneli diskutues “Thyerja e barrierave: Rritja e pjesëmarrjes dhe rolit të grave në ushtri”, ku theks të veçantë mori rrugëtimi personal i çdo panelisteje, por edhe prezantimi i strukturave dhe politikave brenda institucioneve që ato përfaqësojnë në mënyrë për të avancuar barazinë gjinore. Pas këtij diskutimi, u prezantua një rast studimit, ai i Shqipërisë si anëtare e NATO-s, dhe rrugëtimi i tyre drejt rritjes së pjesëmarrjes dhe rolit të grave në ushtri. Pjesa e dytë e ditës u fokusua në punën në grupe, në kuadër të së cilave pjesëmarrësit identifikuan rekomandime dhe veprime të nevojshme mbi strategjitë e reja të rekrutimit, mbajtjes e ruajtjes së personelit dhe eliminimit të paragjykimeve dhe stereotipeve kundrejt grave. Në bazë të këtyre diskutimeve, Qendra Rajonale e Ekselencës për Gratë, Paqen dhe Sigurinë në Kosovë do të përpiloj raportin e qasshëm për të gjithë publikun.
Këshilli për Demokraci nën drejtim e Presidentes Osmani, diskutoi për shëndetin mendor
Nën drejtimin e Presidentes së Republikës së Kosovës, Vjosa Osmani, Këshilli për Demokraci ka mbajtur një takim në të cilin është trajtuar çështja e shëndetit mendor. Takimi mblodhi së bashku përfaqësues nga institucionet, organizatat e shoqërisë civile që merren me shëndetin mendor dhe akterë të tjerë, të ndërlidhur me këtë temë. Presidenca ripohoi mbështetjen e saj të vazhdueshme për shoqatat dhe organizatat që fokusohen në çështjet e shëndetit mendor, duke pranuar rolin e tyre të domosdoshëm në ofrimin e kujdesit, avokimit dhe ndërgjegjësimit. Bashkëngjitur është një pjesë e fjalimit të mbajtur gjatë takimit, i cili thekson rëndësinë e prioritizimit të shëndetit mendor.
Presidentja Osmani priti në takim ministrin hungarez për Çështjet e Bashkimit Evropian, János Bóka
Presidentja e Republikës së Kosovës, Vjosa Osmani priti në takim ministrin hungarez për Çështjet e Bashkimit Evropian, János Bóka. Në takim u diskutua për situatën aktuale politike dhe të sigurisë, forcimin e marrëdhënieve dypalëshe, procesin e integrimit evropian, si dhe stabilitetin rajonal. Presidentja Osmani theksoi se Kosova është shembull pozitiv në rajon, pasi ka bërë hapa të rëndësishëm në forcimin e sundimit të ligjit, luftimin e korrupsionit dhe krimit të organizuar, përmirësimin e transparencës dhe promovimin e qeverisjes së mirë. Sipas Presidentes Osmani, përkushtimi i Kosovës për integrimin evropian mbetet i fuqishëm, teksa po vazhdohet të punohet në drejtim të përmbushjes së kritereve të anëtarësimit në BE, ndaj kërkoi mbështetje për avancimin e aplikimit të Kosovës për statusin e vendit kandidat për BE. Në këtë kontekst, Presidentja Osmani ritheksoi nevojën e heqjes së masave të BE-së ndaj Kosovës, të cilat përveç se janë të pa drejta, prekin direkt interesin e qytetarëve të Kosovës, pa dallim. Ndërkaq në raport me zhvillimet e fundit në fushën e sigurisë, në veriun e vendit, Presidentja Osmani ritheksoi përkushtimin e Kosovës për një hetim të plotë dhe profesional të sulmit terrorist ndaj infrastrukturës vitale, i cili kishte për qëllim dëmin direkt në jetën e qytetarëve. Presidentja Osmani theksoi nevojën e qëndrimit unik të bashkësisë ndërkombëtare në mënyrë që të shmanget përsëritja e sulmeve të tilla terroriste nga bandat kriminale, të cilat mbështeten, trajnohen dhe financohen nga Serbia.
Fjalimi i Presidentes Vjosa Osmani me rastin e publikimit të raportit “Dimensioni gjinor i korrupsionit” të publikuar nga IKD në kuadër të Javës Kundër Korrupsionit
Fjalimi i Presidentes Vjosa Osmani në 10 vjetorin e anëtarësimit të Komitetit Olimpik të Kosovës në Komitetin Olimpik Ndërkombëtar
Presidentja Osmani flet për rrugëtimin e integrimit evropian të Kosovës me bursistë të Fondacionit Gjerman “Konrad Adenauer Stiftung”
Presidentja e Republikës së Kosovës, Vjosa Osmani ka zhvilluar sot një bashkëbisedim me bursistët nga Fondacioni Gjerman “Konrad Adenauer Stiftung”, rreth sfidave të procesit të integrimit të Kosovës në Bashkimin Evropian. Me këtë rast, ndër të tjera, Presidentja ka theksuar rëndësinë e jashtëzakonshne të integrimit euroatlanik të Kosovës për paqen dhe zhvillimin e qëndrueshëm në vend.
Presidentja: Sa më shumë gra në procese të sigurisë dhe vendimmarrje, aq më të sigurtë dhe më të fortë jemi si shoqëri dhe si shtet
Nën organizimin e Presidencës së Republikës, sot u mbajt konferenca me temën “Avancimi i përfaqësimit dhe rolit të grave në ushtri: Një hap drejt barazisë më të madhe gjinore, paqes dhe sigurisë”, e cila u organizua në kuadër të Qendrës Rajonale të Ekselencës për Gratë, Paqen dhe Sigurinë në Kosovë. Postimi i plotë i Presidentes Osmani: Gratë në uniformë, profesioniste dhe të përkushtuara janë imazhi i Kosovës dhe i Forcës së Sigurisë së Kosovës që duam ta shohim gjithnjë e ta zhvillojmë në vazhdimësi. Kosova është kampione e Agjendës për Gratë, Paqen dhe Sigurinë, jo vetëm në rajon dhe Evropë, por edhe përtej. Sa më shumë gra në procese të sigurisë dhe vendimmarrje, aq më të sigurtë dhe më të fortë jemi si shoqëri dhe si shtet.
Presidentja Osmani priti në takim ish-presidenten e Estonisë, Kersti Kaljulaid
Presidentja e Republikës së Kosovës, Vjosa Osmani, ka pritur sot në takim ish-presidenten e Estonisë, Kersti Kaljulaid, një mike dhe mbështetëse e Kosovës gjatë presidencës së saj. Në takim, Presidentja Osmani shprehu mirënjohjen e përzemërt ndaj ish-presidentes Kaljulaid për mbështetjen e palëkundur gjatë kohës së saj në detyrë dhe për avokimin e vazhdueshëm të Estonisë për Kosovën në skenën ndërkombëtare. Presidentja Osmani e ka njoftuar ish-presidenten Kaljualid edhe me zhvillimet e fundit në vend pas sulmit terrorist në infrastrukturën vitale duke rikonfirmuar përkushtimin e institucioneve të Kosovës për kryerjen e një hetimi të plotë dhe profesional. Ajo theksoi se sulmi synonte në mënyrë specifike infrastrukturën kritike, duke synuar të shkaktonte dëme të konsiderueshme që do të ndikonin drejtpërdrejt në jetën e qytetarëve. Në këtë kontekst, Presidentja Osmani theksoi rëndësinë thelbësore të bashkëpunimit për t`i luftuar bandat kriminale serbe, të cilat mbështeten, trajnohen dhe financohen nga Serbia, ndaj theksoi nevojën për komunikim dhe koordinim me qëllim të parandalimit të sulmeve të tjera të mundshme. Gjatë takimit, Presidentja Osmani theksoi marrëdhëniet e shkëlqyera ndërmjet Kosovës dhe Estonisë dhe riafirmoi përkushtimin e Kosovës për ndërtimin e një të ardhmeje të bazuar në vlerat demokratike, stabilitetin dhe prosperitetin dhe theksoi përkushtimin e saj për forcimin e mëtejshëm të lidhjeve ndërmjet Kosovës dhe Estonisë.