Presidentja Osmani pranoi letrat kredenciale nga ambasadori jorezident i Jordanisë, Hazem Issam El-Khatib Al-Tamimi
Presidentja e Republikës së Kosovës, Vjosa Osmani, ka pranuar sot letrat kredenciale nga ambasadori i ri jorezident i Jordanisë në Kosovë, Hazem Issam El-Khatib Al-Tamimi. Duke i uruar mirëseardhje dhe suksese në mandatin e tij, Presidentja Osmani shprehu mirënjohjen e thellë për mbështetjen e vazhdueshme të Jordanisë ndaj Kosovës dhe marrëdhëniet e shkëlqyera ndërmjet dy vendeve. Presidentja Osmani theksoi rëndësinë e përkrahjes së Jordanisë për Kosovën në forume ndërkombëtare dhe vazhdimin e mbështetjes për anëtarësimin e Kosovës në organizatat ndërkombëtare. Në takim me ambasadorin Al-Tamimi, Presidentja Osmani theksoi nevojën për intensifikimin e dialogut politik dhe bashkëpunimit në fushën e sigurisë, si dhe për mundësitë e thellimit të bashkëpunimit në fusha të ndryshme të interesit të përbashkët. Gjatë takimit, u diskutua edhe për vizitën zyrtare të Presidentes Osmani në Jordani, bazuar në ftesën nga Mbreti Abdullah II, me qëllim që të thellohen edhe më tej raportet e shkëlqyeshme ndërmjet dy vendeve tona.
Fjalimi i Presidentes Vjosa Osmani në hapjen e konferencës “Qëndrueshmëria kombëtare – sfidat dhe rruga përpara”
I nderuar Kryeministër Kurti, I nderuar Ministër Maqedonci, I nderuar Gjeneral Bashkim Jashari, Komandant i Forcës së Sigurisë së Kosovës, I nderuar Gjeneral Christian Nawrat, Të nderuar ministra e ministre, Drejtor i Policisë, Udhëheqës e përfaqësues të institucioneve vendore dhe ndërkombëtare, Përfaqësues të institucioneve tona të sigurisë, Zonja dhe zotërinj, Qëndrueshmëria kombëtare nuk është vetëm një koncept teorik, por është themeli mbi të cilin ndërtohet siguria, zhvillimi dhe e ardhmja jonë si shtet. Një shtet është po aq i sigurt sa janë të forta edhe hallkat e tij të sigurisë. Në një kohë kur kërcënimet ndaj sigurisë janë më komplekse se kurrë – nga luftërat konvencionale tek sulmet hibride dhe sfidat kibernetike, Kosova duhet të jetë e gatshme për sfidat me të cilat ballafaqohemi sot dhe për ato të së ardhmes. Na duhet një arkitekturë sigurie që është inovative, fleksibile dhe e përgatitur për t’u përballur me secilin skenar. Kosova ka dëshmuar historikisht qëndrueshmëri, ndaj na takon ta kthejmë atë në një strategji afatgjate për mbrojtjen dhe sigurinë kombëtare. Siguria nuk është vetëm mungesa e kërcënimeve, por qëndrueshmëria kundrejt çfarëdo situate me të cilën përballemi. Programi kombëtar i mbrojtjes gjithëpërfshirëse përfaqëson një angazhim konkret për ta ndërtuar një sistem të fuqishëm mbrojtës dhe të qëndrueshëm. Prandaj, në këtë linjë, edhe forcimi i kapaciteteve tona mbrojtëse si dhe integrimi në NATO, janë të ndërlidhura fuqishëm njëra me tjetrën. Zhvillimi i Forcës së Sigurisë së Kosovës sipas standardeve më të larta të NATO-s mbetet prioritet i yni strategjik, kombëtar. Ne synojmë një ushtri moderne, profesionale, të ndërveprueshme dhe të gatshme për t’u përballur me çdo sfidë krah për krah me ushtritë tjera aleate brenda NATO-s. Ky synim i yni është në kuadër të vizionit tonë shtetëror për anëtarësim sa më të shpejtë në këtë Aleancë. Prandaj, investimi i vazhdueshëm në armatim si dhe në personelin tonë ushtarak e mirëqenien e tyre është jetik, ashtu siç është edhe investimi i vazhdueshëm në institucionet e tjera të sigurisë. Në një botë ku kërcënimet hibride po bëhen gjithnjë e më të sofistikuara, edhe qëndrueshmëria ekonomike është po aq e rëndësishme, mbrojtja nga sulmet hibride po ashtu është e domosdoshme. Shteti ynë duhet të investojë në përmirësimin e infrastrukturës kritike dhe zhvillimin e një ekonomie të qëndrueshme, me theks të veçantë në sigurinë energjetike dhe mbrojtjen e sistemeve të rëndësishme. Zhvillimi ekonomik është një nga shtyllat kyçe për qëndrueshmërinë tonë kombëtare, meqenëse ai siguron stabilitet dhe aftësinë e një shteti për t’u përballuar me krizat dhe sfidat e ndryshme. Një ekonomi e fuqishme pastaj e mbështetë edhe mbrojtjen, pra burime të mjaftueshme në fushën e mbrojtjes si dhe përmirësimin e vazhdueshëm të infrastrukturës kritike, e zhvillimin e sistemeve sociale e shëndetësore, të gjitha kyçe për një sistem më të avancuar të qëndrueshmërisë shtetërore. Në anën tjetër, sulmet hibride, që përfshijnë edhe operacione të kombinuara ushtarake, kibernetike, ekonomike dhe informative, më mirë të them dezinformative në këtë rast, janë sfida reale për stabilitetin tonë kombëtar. Në këtë drejtim, siguria kibernetike është thelbësore, duke qenë pjesë e këtyre kërcënimeve hibride. Me rritjen e varësisë nga teknologjia, mbrojtja e infrastrukturës kritike dhe e të dhënave bëhet një prioritet absolut. Për më tepër, vitin e kaluar, me Shtetet e Bashkuara të Amerikës pikërisht me këtë qëllim, kam nënshkruar Marrëveshjen për luftimin e informacionit shtetëror të huaj, që është hap i rëndësishëm për të mbrojtur sistemin tonë informativ nga ndërhyrjet dhe dezinformatat, duke siguruar kështu transparencë dhe qëndrueshmëri në epokën digjitale. Më konkretisht, ky Memorandum i Mirëkuptimit me SHBA-të përqendrohet në shkëmbimin e informacionit mes shteteve tona, dhe po ashtu ekspertizën dhe praktikat më të mira për të adresuar fushatat dezinformuese kundër nesh si shtet, të cilat kërcënojnë stabilitetin dhe sigurinë tonë kombëtare. Të njëjtën gjë synojmë ta bëjmë edhe me programin simotër të BE-së – FIMI (Foreign Information Manipulation and Interference), i cili është projekt që ka për qëllim adresimin dhe luftimin e manipulimit dhe ndërhyrjes nëpërmjet dezinformatave që vijnë nga elemente të huaja, malinje. Ky projekt është pjesë e një strategjie më të gjerë të BE-së për të forcuar mbrojtjen ndaj kërcënimeve hibride dhe për të garantuar qëndrueshmërinë demokratike të vendeve anëtare dhe atyre partnere. Me zhvillimin e teknologjisë dhe rritjen e varësisë nga sistemet digjitale, ne duhet të jemi të përgatitur për të mbrojtur të dhënat dhe rrjetet tona ndaj sulmeve të mundshme kibernetike. Prandaj, investimi në teknologji të avancuar dhe trajnimi i ekspertëve në këtë fushë janë thelbësore për të siguruar një mjedis të qëndrueshëm dhe të sigurt digjital. Ne po punojmë ngushtë me partnerët tanë strategjikë për të ndërtuar kapacitetet e avancuara në këtë fushë dhe për të siguruar mbrojtje efektive ndaj sulmeve kibernetike. Të nderuar të pranishëm, Në emergjenca kombëtare apo rajonale, bashkëpunimi efektiv në mes institucioneve si dhe angazhimi i qytetarëve, duke përfshirë të gjitha grupet etnike, është qenësor. Institucionet tona duhet të mbeten të gatshme dhe të koordinuara në çdo moment. Për të qenë të suksesshëm në përballje me këto sfida të sigurisë na nevojitet përfshirja e gjithanshme e të gjitha hallkave të shoqërisë sonë. Shembulli i reagimit tonë ndaj sulmit të fundit terrorist në kanalin e Ibër-Lepencit ka treguar qartë rëndësinë dhe fuqinë e koordinimit ndërinstitucional, por mbi të gjitha profesionalizmin e jashtëzakonshëm të institucioneve tona të sigurisë dhe ato të reagimit të parë. Në të njëjtën kohë, duke pas parasysh kontekstin aktual gjeopolitik dhe të sigurisë rajonale, qëndrueshmëria kombëtare është më shumë se sa thjesht një nevojë, është detyrimi ynë ndaj brezave të ardhshëm. Një shoqëri e përgatitur dhe e unifikuar është çelësi i suksesit në përballimin e sfidave të çdo lloji. Këtë e kemi treguar edhe gjatë rezistencës aktive paqësore edhe gjatë luftës tonë çlirimtare të viteve 90-ta. Republika e Kosovës dhe qytetarët e saj, kanë dëshmuar edhe në të kaluarën, po ashtu edhe në të tashmen përcaktimin e qartë e të vendosur se rruga jonë e zhvillimit dhe përparimit është e orientuar në drejtimin dhe qëndron mbi vlerat e natyrshme evropiane dhe euroatlantike. Historia jonë e dhimbshme por e lavdishme na ka mësuar rëndësinë e unitetit, të besimit
Presidentja Osmani për shkaqe humanitare ia falë një të dënuare pjesën e mbetur të dënimit
Presidentja e Republikës së Kosovës, Vjosa Osmani, bazuar në kompetencat kushtetuese dhe ligjore, ka nënshkruar sonte dekretin me të cilin të dënuarës Arza Cakolli, për shkaqe humanitare, i është falur pjesa e mbetur e dënimit, pas shqyrtimit të propozimit nga Komisioni për Falje dhe në përputhje me procedurat ligjore. Vendimi është marrë për shkak të rrethanave të jashtëzakonshme, ngase e dënuara ka lindur foshnjën e saj të parë gjatë vuajtjes së dënimit dhe ndodhet në Qendrën Korrektuese për gra në Lipjan, së bashku me foshnjen e saj. Në marrjen e vendimit për falje, janë marrë parasysh edhe faktorë të tjerë, duke përfshirë faktin se e dënuara nuk ka kryer asnjë vepër penale më herët, vepra penale për të cilën është dënuar është për “Rrezikim të Trafikut Publik”, pra është kryer aksident pa dashje, ndërkaq është vërtetuar se nuk ka qenë nën ndikim të alkoolit apo substancave të tjera kur ka ndodhur aksidenti. Përveç këtyre, gjithashtu janë marrë parasysh sfidat shëndetësore të nënës dhe foshnjës. E dënuara ka filluar mbajtjen e dënimit prej 1 vit e dy muaj burg, në korrik të vitit 2024, ndërkaq do të duhej të lirohej në mënyrë të rregullt nga burgu më 14 shtator të këtij viti. Dosja me propozimin e shqyrtuar nga Komisioni si dhe nga ekipi ligjor i Presidentes, ka arritur sot në tavolinën e Presidentes. Prandaj, duke marrë parasysh faktorët humanitarë dhe vlerësimet profesionale të të gjitha institucioneve relevante, Presidentja ka vendosur faljen e pjesës së mbetur të dënimit të saj.
Qendra Rajonale e Ekselencës për Gratë, Paqen dhe Sigurinë në Kosovë vazhdon aktivitetet
Qendra Rajonale e Ekselencës për Gratë, Paqen dhe Sigurinë në Kosovë mbajti punëtorinë dy ditore me temë “Ndërtimi mbi Progresin: Ngritja e mëtejme e lidershipit të Kosovës në Agjendën për Gratë, Paqen dhe Sigurinë”. Kjo punëtori në qendër të diskutimeve kishte ritheksimin e rëndësisë së Planeve Kombëtare të Veprimit (PKV) për Gratë, Paqen dhe Sigurinë si mjet për një barazi më të madhe gjinore, rritjen e paqes dhe sigurisë gjithëpërfshirëse. Qëllimi kryesor i punëtorisë ishte që nëpërmjet ekspertit ndërkombëtar për PKV-të, Mirsad Jacevic, të prezantohen perspektivat ndërkombëtare të shteteve, të cilat kanë miratuar dhe zbatuar PKV-të, me theks të veçantë në sukseset dhe sfidat e tyre në raport me to. Punëtoria trajtoi të gjitha këto aspekte të PKV-ve me përfaqësues të institucioneve qeveritare, shoqërisë civile dhe komunitetit ndërkombëtar, si akterët kyç të fushës. Kjo ngjarje u organizua nga Qendra Rajonale e Ekselencës për Gratë, Paqen dhe Sigurinë në Kosovë, e themeluar në kuadër të Zyrës së Presidentes së Republikës së Kosovës.
Presidentja Osmani përkujton 26 vjetorin e Masakrës në Rogovë të Hasit
Më 27, 28 dhe 29 janar 1999, forcat e regjimit gjenocidal të Millosheviqit kryen një ofensivë brutale në fshatrat Rogovë të Hasit, Goden dhe Bishtazhin të Gjakovës, duke vrarë në mënyrë mizore 9 civilë të pafajshëm. Në këtë betejë për liri, ranë heroikisht edhe 21 luftëtarë të Ushtrisë Çlirimtare të Kosovës. Kjo masakër mbetet një plagë e pashlyeshme në kujtesën tonë kombëtare dhe një dëshmi e dhunës së pamëshirshme ndaj popullit tonë. Sot dhe përherë, do t’i nderojmë dëshmorët e UÇK-së dhe martirët, duke ruajtur kujtimin për ta, si simbol të qëndresës dhe sakrificës për liri.
Presidentja Osmani në Poloni me rastin e përkujtimit të Aushvicit: Kosova, e ndërtuar mbi historinë e dhimbshme të luftës dhe gjenocidit, e kupton më së miri rëndësinë e luftës kundër urrejtjes
Presidentja e Republikës së Kosovës, Vjosa Osmani, sot mori pjesë në ceremoninë përkujtimore të 80-vjetorit të çlirimit të kampit nazist të Auschwitz-Birkenau në Krakow të Polonisë, krahas liderëve botërorë. Kjo është hera e parë që kreu i shtetit merr pjesë në këtë ngjarje përkujtimore, duke dëshmuar përkushtimin e Kosovës për paqen dhe solidaritetin ndërkombëtar. Në fillim të ceremonisë, Presidentja Osmani u prit nga presidenti polak, Andrzej Duda. Ajo shprehu mirënjohje për ftesën dhe potencoi rëndësinë e kujtesës historike për krimet e kryera. Kujtimet e disa të mbijetuarve nga kampi Auschwitz-Birkenau sollën rrëfime tronditëse nga kampi i tmerrit me mesazhin e qartë që e shkuara e tyre të mos jetë e ardhmja e fëmijëve tanë. Në përkujtim të kësaj dite, gjatë bisedave me liderët e tjerë, Presidentja Osmani theksoi rëndësinë e kujtesës historike për të parandaluar përsëritjen e tmerreve të së kaluarës dhe për t`i promovuar vlerat universale të paqes, barazisë dhe humanizmit. Presidentja Osmani nënvizoi përvojën e tmerrshme të Kosovës, e cila e ka përjetuar luftën dhe gjenocidin nga ana e regjimit të Millosheviqit, duke theksuar se kjo përvojë e bën Kosovën një zë të fuqishëm në luftën kundër urrejtjes dhe diskriminimit. “Dita Ndërkombëtare e Përkujtimit të Holokaustit na kujton se duhet të qëndrojmë bashkë kundër çdo forme urrejtjeje dhe të sigurohemi që kurrë më të mos përsëriten tmerret e së kaluarës. Kosova, e cila ka kaluar përmes tmerreve të luftës dhe gjenocidit të kryer nga regjimi i Millosheviqit, e kupton më së miri rëndësinë e luftës kundër urrejtjes dhe angazhimin për një të ardhme më humane dhe të drejtë”, theksoi Presidentja Osmani. Më tej, Presidentja potencoi kontributin e jashtëzakonshëm të shqiptarëve gjatë Holokaustit, duke kujtuar se ata hapën dyert dhe zemrat për hebrenjtë, bazuar në vlerat e besës shqiptare, një akt që mbetet dëshmi e fuqisë së humanizmit dhe solidaritetit.
Presidentja Osmani, krahas liderëve botërorë merr pjesë në ceremoninë përkujtimore të 80-vjetorit të çlirimit të kampit nazist Aushvic
Presidentja e Republikës së Kosovës, Vjosa Osmani, ka udhëtuar për në Poloni për të marrë pjesë, krahas liderëve botërorë, në ceremoninë përkujtimore të 80-vjetorit të çlirimit të kampit nazist gjerman të përqendrimit dhe shfarosjes Aushvic. Gjatë ceremonisë, në përkujtim të viktimave të Holokaustit, me pjesëmarrësit do të ndahen rrëfimet prekëse të dy të mbijetuarve nga kampi i Aushvicit, duke rikujtuar një nga kapitujt më të errët të historisë njerëzore. Aushvici është simbol i Holokaustit dhe mizorive të Luftës së Dytë Botërore. Në vitin 2005, Kombet e Bashkuara shpallën 27 janarin Ditë Ndërkombëtare të Përkujtimit të Holokaustit, për t`i kujtuar viktimat dhe për ta nxitur botën që të angazhohet për të mos lejuar kurrë më përsëritjen e tmerreve të tilla.
Presidenca e Republikës së Kosovës uron dhe mbështetë nominimin e QKRMT dhe znj. Feride Rushiti për çmimin Nobel për Paqe
Presidenca e Republikës së Kosovës e uron dhe mbështetë nominimin e QKRMT dhe znj. Feride Rushiti për çmimin Nobel për Paqe dhe e përgëzon atë dhe organizatën QKRMT, të cilën ajo e udhëheq prej disa vitesh. Organizata QKRMT, është mbështetur dhe përkrahur në vazhdimësi nga Presidenca e Kosovës, si dhe, ndër vite, ka qenë ndër partnerët kryesor në organizimin e Forumit ndërkombëtar për Gratë, Paqen dhe Sigurinë e po kështu në avancimin e kësaj agjende në Kosovë. Kjo organizatë, jo vetëm që ka kontribuar në procesin e rehabilitimit të të mbijetuarve të dhunës seksuale gjatë luftës së fundit në Kosovë, por kanë luajtur rol kyç në ndërtimin e politikave që mbështesin përmirësimin e mirëqenies dhe statusit të kësaj kategorie në shoqërinë tonë. KRCT, përpos kontributit të dhënë në Kosovë, njihet si ndër organizatat që ndihmojnë të mbijetuarit e dhunës seksuale gjatë luftës dhe konfliktit në shtete të ndryshme në botë, përderisa ndajnë eksperiencën e Kosovës për ndërtimin e mekanizmave mbështetës për të mbijetuarit e dhunës seksuale gjatë luftës. Një falënderim i veçantë shkon edhe për deputetin suedez, Magnus Jacobsson, i cili ka dorëzuar propozimin tek Komiteti Nominues i çmimit Nobel për Paqe. Për më tepër, ai personalisht ishte pjesë e ngjarjeve që përfshinin temën për dhunën seksuale gjatë luftës dhe konfliktit, siç ishte rasti në Forumin Ndërkombëtar për Gratë, Paqen dhe Sigurinë.
Presidentja Osmani priti në takim shefa te misioneve diplomatike dhe përfaqësues të organizatave ndërkombëtare të angazhuara në fushën e drejtësisë tranzicionale
Presidentja e Republikës së Kosovës, Vjosa Osmani, priti dje në takim disa nga shefat e misioneve diplomatike dhe përfaqësues të organizatave ndërkombëtare në Kosovë të cilët janë të angazhuar në fushën e drejtësisë. Gjatë këtij takimi u diskutua lidhur me përgatitjet për procesin e themelimit të Komisionit Presidencial për Drejtësinë Tranzicionale. Nisma për themelimin i këtij Komisioni buron nga Strategjia për Drejtësinë Tranzicionale e Republikës së Kosovës. Presidentja Osmani shprehu mirënjohje për mbështetjen dhe angazhimin e të pranishmëve ndaj këtij procesi, si dhe njoftoi se gjatë javëve në vijim do të vazhdojnë takimet edhe me përfaqësues të tjerë nga organizatat përfaqësuese të viktimave, shoqërisë civile dhe komunitetit ndërkombëtar, me qëllim të finalizimit të fillimit sa më të shpejtë të punës së këtij komisioni.
Presidentja Osmani: Uniforma e policisë është betim për t’i shërbyer atdheut
Presidentja e Republikës së Kosovës, Vjosa Osmani ka marrë pjesë sot në Ceremoninë e Diplomimit të Gjeneratës së 61-të, të Policisë së Kosovës. Presidentja Osmani ka shkruar: Uniforma e policisë është betim për t’i shërbyer atdheut, për t’i mbrojtur qytetarët dhe për të qëndruar gjithmonë në anën e drejtësisë. Me guxim, përkushtim dhe ndershmëri, ju jeni forca që e bën Kosovën më të sigurt e më sovrane! Urime Gjenerata e 61-të e Policisë së Kosovës!