Fjalimi i Presidentes Vjosa Osmani për nder të Ditës së Çlirimit të Istogut, nën patronatin e së cilës u bë përurimi i Kompleksit Memorial të Dëshmorëve të Komunës së Istogut, në fshatin Vrellë
I nderuar Kryetar i Komunës, z. Ilir Ferati, Të nderuar përfaqësues të institucioneve lokale dhe qendrore, I nderuar ish-Kryeministër Haradinaj, Të nderuar përfaqësues të shoqatave të dala nga lufta e Ushtrisë Çlirimtare të Kosovës, Të nderuar veteranë e invalidë të UÇK-së, Familjarë të dëshmorëve, Shumë të dashur fëmijë, nipa e mbesa të dëshmorëve, Të nderuar të pranishëm, Kombet sikurse ky i yni rilindin çdo herë nëpërmjet dëshmorëve. Prandaj, sot jemi mbledhur në fshatin Vrellë të Istogut në këtë tokë që frymon me krenari e dhimbje, për t’u përkulur me nderim para dëshmorëve të Ushtrisë Çlirimtare të Kosovës. Për t’u përkulur të gjithë së bashku para bijve dhe bijave më të denjë të Kombit tonë, të cilët u flijuan për lirinë të cilën e gëzojmë sot. Në këtë muaj të shenjtë për ne në Qershorin e çlirimit, kur para 26 vitesh Kosova me vrullin e UÇK-së përmbylli rrugën e lirisë me ndihmën e aleatëve tanë në krye me Shtetet e Bashkuara të Amerikës, po e përurojmë këtë memorial, i cili do të jetë përjetësisht dëshmi e gjakut të derdhur, dëshmi e trimërisë dhe e lavdisë, e cila nuk do të zbehet asnjëherë. Vrellën, Istogun dhe Kosovën e nderon sot historia. Na nderojnë këta emra të pavdekshëm, që u rreshtuan në radhët e UÇK-së për lirinë dhe për shtetin tonë. Dëshmorët tanë u ngritën mbi çdo frikë, mbi çdo pengesë e mbi çdo cenim të dinjitetit njerëzor. Ata i treguan botës se Kosova ka bijë e bija, që e duan këtë tokë më shumë se sa vetveten. Ushtria Çlirimtare e Kosovës ishte zemra e rezistencës sonë kombëtare. Ishte betimi i përgjakur i një populli, që për dekada u mohua, u përbuz dhe u persekutua, por kurrë nuk u përkul para okupatorit. UÇK-ja ishte vullkani i një populli, që deshi të jetojë i lirë në tokën e vet. Në këtë memorial do të qëndrojnë jo vetëm trupat e dëshmorëve, por edhe një pjesë e themelit të shtetit tonë, në fakt themelet më të forta të shtetit tonë. Këtu prehen premtimet, që heronjtë lanë përgjysmë për një Kosovë të pavarur, sovrane dhe me drejtim të qartë euroatlantik. Të nderuar të pranishëm, Istogu me rrethinë nuk është vetëm vend i luftës, i sakrificës dhe i çlirimit, por edhe truall i urtësisë, i vizionit dhe i prijësve që i dhanë drejtim fatit të kombit tonë. Kjo tokë e bekuar, përveç dëshmorëve të shumtë që dhanë jetën për liri, lindi po ashtu edhe figurën emblematike të historisë sonë moderne Presidentin historik, dr. Ibrahim Rugova arkitektin e shtetësisë sonë, i cili me urtësi dhe vizion ndërtoi së bashku me UÇK-në themelet e Republikës sonë. Lufta heroike e UÇK-së dhe Presidenti Rugova ishin ata që i hapën rrugë për miqësi e themele të forta shtetit tonë. Këta titanë na mësuan se liria fitohet atëherë kur kombi bashkohet. Atëherë kur përballë padrejtësisë qëndron shpirt i pathyeshëm, dinjitet i palëkundur dhe vullnet i pashuar për të jetuar i lirë. Nëse duam ta nderojmë me të vërtetë gjakun e dëshmorëve, atëherë duhet të jemi të denjë për sakrificën e tyre. Duhet ta mbrojmë lirinë çdo ditë e ta mbrojmë si vlerë, jo si privilegj. Të punojmë çdo ditë për shtet ligjor, për mirëqenie, dinjitet njerëzor dhe për mbrojtje të çdo pëllëmbe të shtetit tonë, i cili është arritur me gjak. Duhet të kujtojmë gjithmonë se pa luftën e UÇK-së dhe pa mbështetjen e Shteteve të Bashkuara të Amerikës, të NATO-s dhe aleatëve të tjerë, Kosova nuk do të ishte ajo që është sot, një shtet i lirë sovran që ecën me hapa të sigurt drejt familjes së kombeve të qytetëruara. Në këtë ditë të paharrueshme nga Vrella e Istogut duhet të jehojë një falënderim i përjetshëm! Lavdi dëshmorëve tanë të pavdekshëm! Lavdi Ushtrisë Çlirimtare të Kosovës! Rrnoftë Republika e Kosovës! I përjetshëm kujtimi për dëshmorët e kombit dhe për të gjithë të rënët tanë!
Presidentja: Një sukses i jashtëzakonshëm e inspirues nga Koshi Group në Prizren, një simbol i vërtetë i inovacionit dhe mjeshtërisë, krenarisht i bërë në Kosovë
Presidentja e Republikës së Kosovës,Vjosa Osmani ka vizituar sot kompaninë Koshi Group në Prizren. Presidentja Osmani ka shkruar: A e keni ditur se në Kosovë prodhohen edhe anije? Made in Kosova, gati për botën! Një sukses i jashtëzakonshëm e inspirues nga Koshi Group në Prizren, një simbol i vërtetë i inovacionit dhe mjeshtërisë, krenarisht i bërë në Kosovë. Nga veturat elitare sportive deri te barkat e jahtet më moderne, puna e tyre përfshin industri dhe kontinente të tëra. Kur talenti kosovar bashkohet me punën e palodhshme dhe inovacionin, nuk ka kufi për atë që mund të arrihet.
Një delegacion nga Fondacioni Arbëresh, me ftesë të Presidentes Osmani realizoi një vizitë zyrtare në Kosovë
Një delegacion nga Fondacioni Arbëresh, me ftesë të Presidentes së Republikës së Kosovës, Vjosa Osmani realizoi një vizitë zyrtare në Kosovë, me qëllim forcimin e bashkëpunimit ndërinstitucional dhe thellimin e lidhjeve historike e kulturore ndërmjet komunave arbëreshe me Kosovën. Delegacioni u kryesua nga z. Ernesto Madeo, Komisioner i Fondacionit dhe Kryetar i Bashkisë San Demetrio Corone, dhe përbëhej nga përfaqësues të nivelit të lartë institucional dhe kulturor të komunitetit arbëresh, përfshirë kryetarë të bashkive San Cosmo Albanese, Frascineto, Cerzeto dhe Caraffa di Catanzaro. Gjatë qëndrimit në Prishtinë, delegacioni zhvilloi takime në institucionet më të rëndësishme të vendit, përfshirë Presidencën e Kosovës, Komunën e Prishtinës, Universitetin e Prishtinës, kolegjin UBT si dhe institucione të tjera arsimore e kulturore. Po ashtu, u realizuan vizita në lokalitete të rëndësishme të trashëgimisë kulturore dhe historike, si: Biblioteka Hivzi Sylejmani, Muzeu Etnologjik, Katedralja e Prishtinës, Parku Arkeologjik Ulpiana, si dhe objekti i Lidhjes Shqiptare të Prizrenit. Delegacioni realizoi vizitë edhe në: Novobërdë, Letnicë, Stubëll, Ferizaj, Suharekë dhe Prizren. Në takimet e zhvilluara, u shpreh interesimi i ndërsjellë për të vendosur bashkëpunim të qëndrueshëm dhe të institucionalizuar mes komunave arbëreshe dhe institucioneve në Kosovë, në fusha me interes të përbashkët si arsimi, kultura, diaspora, zhvillimi ekonomik dhe bujqësia. U diskutua mundësia e përfshirjes së studentëve arbëreshë në institucionet arsimore në Kosovë me kuota të veçanta, si dhe vendosja e kontakteve të drejtpërdrejta mes universiteteve, përfshirë nënshkrimin e marrëveshjeve të bashkëpunimit. Në kuadër të kësaj vizite, delegacioni mori pjesë edhe në shënimin e Ditës së Çlirimit të Komunës së Prishtinës dhe në Panairin e Librit, duke shprehur vlerësimin për ftesën dhe për mikpritjen institucionale. Gjithashtu, përfaqësuesit arbëresh shprehën gatishmërinë për të forcuar shkëmbimet kulturore dhe për të ndërtuar platforma të përbashkëta në ruajtjen dhe promovimin e trashëgimisë kulturore shqiptare në të gjitha trevat ku jeton komuniteti arbëresh.
Presidentja: Në Ditën e Çlirimit të Istogut, u përkulëm me nderim para dëshmorëve të Ushtrisë Çlirimtare të Kosovës, bijve e bijave më të denjë të kombit tonë, që u flijuan për lirinë që gëzojmë sot
Nën patronatin e Presidentes së Republikës së Kosovës, Vjosa Osmani u bë përurimi i Kompleksit Memorial të Dëshmorëve të komunës së Istogut, me rastin e Ditës së Çlirimit. Me këtë rast, Presidentja Osmani tha se ky memorial në Vrellë të Istogut është vend kujtese, por edhe themel i shtetit tonë dhe simbol i sakrificës që nuk harrohet kurrë Presidentja Osmani ka shkruar: Në Ditën e Çlirimit të Istogut, u përkulëm me nderim para dëshmorëve të Ushtrisë Çlirimtare të Kosovës, bijve e bijave më të denjë të kombit tonë, që u flijuan për lirinë që gëzojmë sot. Ky memorial në Vrellë të Istogut është vend kujtese, por edhe themel i shtetit tonë dhe simbol i sakrificës që nuk harrohet kurrë. Lavdi e përjetshme dëshmorëve tanë!
Presidentja: Ishte kënaqësi e veçantë që mbrëmë, në mesin e miqve të Kosovës dhe Mbretërisë së Bashkuar, të shënojmë Ditëlindjen Zyrtare të Mbretit Charles III
Presidentja e Republikës së Kosovës, Vjosa Osmani ka marrë pjesë në shënimin e Ditëlindjes Zyrtare të Mbretit Charles III. “Ishte kënaqësi e veçantë që mbrëmë, në mesin e miqve të Kosovës dhe Mbretërisë së Bashkuar, të shënojmë Ditëlindjen Zyrtare të Mbretit Charles III — një mundësi për të shprehur mirënjohjen më të thellë të popullit të Kosovës për mbështetjen e palëkundur të miqve tanë britanikë”, ka shkruar Presidentja Osmani.
Presidentja Osmani priti në takim profesorin Hisashi Owada, ish-kryetar i Gjykatës Ndërkombëtare të Drejtësisë
Presidentja e Republikës së Kosovës, Vjosa Osmani ka pritur sot në takim profesorin e shquar të së drejtës ndërkombëtare dhe ish-kryetarin e Gjykatës Ndërkombëtare të Drejtësisë, z. Hisashi Owada. Pas një takimi jashtëzakonisht miqësor me të gjatë vizitës në Japoni, Presidentja Osmani e cilësoi nder të veçantë pritjen e profesorit Owada në zyrën e saj, duke theksuar se ai përfaqëson një figurë të jashtëzakonshme në fushën e drejtësisë ndërkombëtare dhe një promovues të palodhur të paqes globale. Në këtë takim, Presidentja Osmani shprehu mirënjohjen e thellë të institucioneve dhe qytetarëve të Republikës së Kosovës për rolin historik të profesorit Owada, i cili si kryetar i GJND-së ka drejtuar këtë institucion në një prej momenteve më të rëndësishme për shtetin e Kosovës – dhënien e opinionit këshillëdhënës të datës 22 korrik 2010, ku Gjykata konfirmoi se shpallja e pavarësisë së Kosovës nuk ka shkelur të drejtën ndërkombëtare. Presidentja vlerësoi kontributin e jashtëzakonshëm të profesorit Owada jo vetëm për Kosovën, por edhe për zhvillimin dhe avancimin e të drejtës ndërkombëtare dhe përpjekjet për paqe globale. Me këtë rast, Presidentja Osmani e uroi Profesorin Owada edhe për titullin “Doctor Honoris Causa” të dhënë nga Universiteti i Prishtinës, duke theksuar se institucionet dhe qytetarët e Republikës së Kosovës do të mbeten përjetësisht mirënjohës për mbështetjen dhe vizionin e tij.
Presidentja Osmani: Në Ditën Ndërkombëtare për Parandalimin e Dhunës Seksuale në Konflikt, qëndrojmë përkrah të mbijetuarve, të cilët u bënë simbol i forcës përballë krimeve çnjerëzore të regjimit gjenocidal të Millosheviqit
Presidentja e Republikës së Kosovës, Vjosa Osmani ka kujtuar sot Ditën Ndërkombëtare për Parandalimin e Dhunës Seksuale në Konflikt. Postimi i plotë i Presidentes: Në Ditën Ndërkombëtare për Parandalimin e Dhunës Seksuale në Konflikt, qëndrojmë përkrah të mbijetuarve, të cilët u bënë simbol i forcës përballë krimeve çnjerëzore të regjimit gjenocidal të Millosheviqit. Në Kosovë, guximi i tyre trason rrugën për te drejtësia dhe drejt një bote ku dhuna seksuale nuk përdoret më si armë lufte. Zërat e tyre tejkalojnë kufijtë tanë dhe e kthejnë dhimbjen në forcë dhe frymëzim për ndryshim global. Ne ecim përkrah tyre, me krenari dhe përkushtim.
Presidentja Osmani ka përkujtuar Nekibe Kelmendin në 14- vjetorin e ndarjes nga jeta
Sot kujtojmë me nderim znj. Nekibe Kelmendi, avokate e palodhur për të drejtat e njeriut, aktiviste politike e guximshme, bashkëpunëtore e ngushtë e Presidentit historik Dr. Ibrahim Rugova, dhe një zë i qartë për drejtësi në kohët më të errëta të vendit tonë. Ajo mbeti stoike përkundër dhembjes personale nga vrasja mizore e burrit të saj dhe djemve nga regjimi gjenocidal i Serbisë, dhe nuk hoqi dorë kurrë nga përkushtimi ndaj lirisë, dinjitetit dhe të drejtës. Znj. Nekibe Kelmendi ka dhënë kontribut të jashtëzakonshëm në shtetndërtim, në hartimin e Kushtetutës së parë të Republikës sonë të pavarur, si dhe në shumë procese të tjera shtetformuese. Ajo vazhdon të mbetet një ndër figurat më të ndritura të historisë sonë të re. Kujtimi për të do të jetojë gjithmonë si frymëzim për të gjithë ata që besojnë në paqe, drejtësi dhe vlerat mbi të cilat është ndërtuar shteti ynë. Lavdi jetës dhe veprës së saj!
Presidentja Osmani: Trashëgimia e Atit themeltar të Republikës, Presidentit historik Dr. Ibrahim Rugova, nuk i përket vetëm Kosovës, por të gjithë atyre që besojnë në fuqinë e së drejtës dhe në idealin e lirisë
Presidentja e Republikës së Kosovës, Vjosa Osmani në kuadër të vizitës zyrtare në Hungari, bashkë me Kryetarin e Budapestit, kanë inaguruar sot një kënd të bibliotekës “Ervin Szabó” me emrin e Presidentit historik, Dr. Ibrahim Rugova. Presidentja Osmani ka shkruar: Trashëgimia e Atit themeltar të Republikës, Presidentit historik Dr. Ibrahim Rugova, nuk i përket vetëm Kosovës, por të gjithë atyre që besojnë në fuqinë e së drejtës dhe në idealin e lirisë. Prandaj, sot në Budapest, bashkë me miq të Presidentit Rugova e miq të rinj të Kosovës, inauguruam një pjesë të bibliotekës “Ervin Szabó” me emrin e Presidentit historik, si shenjë e përhershme kujtese për vizionin e arkitektit të pavarësisë, i cili me përkushtim e udhëhoqi popullin e Kosovës në rrugën drejt lirisë dhe pavarësisë.
Presidentja Osmani: Aleanca me SHBA-të, BE-në dhe partneriteti me NATO-n janë në ADN-në e shtetësisë sonë
Gjatë vizitës zyrtare në Hungari, Presidentja e Republikës, Vjosa Osmani, iu drejtua studentëve dhe profesorëve të Universitetit Eötvös Loránd për të folur mbi prioritetet strategjike të politikës së jashtme të Republikës së Kosovës, përfshirë për marrëdhëniet ndërmjet Kosovës dhe Hungarisë. Në fjalimin e saj, Presidentja Osmani theksoi përkushtimin e palëkundur të Kosovës ndaj integrimit euroatlantik. Ajo theksoi se Kosova është e vendosur të bëhet pjesë e plotë e familjes së shteteve euroatlantike dhe se aleanca me SHBA-në, Bashkimin Evropian dhe partneriteti me aleatët e NATO-s përbëjnë shtylla të qëndrueshmërisë rajonale dhe kontribuojnë drejtpërdrejt në sigurinë e hapësirës euroatlantike. Në një nga universitetet më prestigjioze të Evropës Qendrore, Presidentja Osmani u ndal te roli i arsimit si urë lidhëse mes kombeve dhe si themel për bashkëpunim afatgjatë. Ajo shprehu mirënjohje për mbështetjen që studentët nga Kosova kanë marrë ndër vite nga Universiteti Eötvös Loránd dhe nga institucionet hungareze. Duke vënë në pah dimensionin historik të marrëdhënieve shqiptaro-hungareze, Presidentja solli në vëmendje kontributin e dy figurave emblemë – Gjergj Kastrioti Skënderbeu dhe Janos Hunyadi: “Në shekullin XV, shqiptarët dhe hungarezët qëndruan krah për krah për mbrojtjen e qytetërimit evropian. Ishte një aleancë mbi vlera shpirtërore, e ndërtuar mbi vlera të përbashkëta si liria, identiteti dhe dinjiteti. Sot, në një Evropë që po ndryshon, ky trashëgim frymëzues na udhëzon për të ndërtuar partneritete që reflektojnë vizionin e përbashkët për një të ardhme paqësore dhe të bashkuar.” Presidentja theksoi gjithashtu se marrëdhëniet ndërmjet Kosovës dhe Hungarisë kanë potencial të madh për t’u thelluar në fusha si energjia e ripërtrishme, turizmi, teknologjia dhe arsimi, duke nënvizuar se përparimi i qëndrueshëm ndërtohet mbi investimin në rini dhe në krijimin e urave të mirëkuptimit ndërkulturor.