Video mesazhi i Presidentes Vjosa Osmani në ceremoninë hapëse të Festivalit të Teknologjisë DOKUTECH 2025
Presidentja Osmani mirëpriti delegacionin e Bordit Këshillues të Qeverisë britaneze të Iniciativës për Parandalim të Dhunës Seksuale gjatë luftës
Në muajin tetor, përderisa shënojmë 25 vjetorin e Agjendës për Gratë, Paqen dhe Sigurinë, ku pjesë integrale është mbrojtja dhe fuqizimi i të mbijetuarve të dhunës seksuale gjatë luftës dhe konfliktit, Presidentja Osmani mirëpriti në Prishtinë delegacionin e Bordit Këshillues të Qeverisë britaneze të Iniciativës për Parandalim të Dhunës Seksuale gjatë luftës. Në këtë delegacion kishte të mbijetuar nga vende të ndryshme të botës. Storjet mbi dhimbjen, gjetjen e forcës për ta tejkaluar atë dhe sukseset e të mbijetuarve të pranishëm, po aq sa na frymëzuan, krijuan diskutime dhe shkëmbim të ideve të reja për bashkëpunim. Zëri i të mbijetuarve të dhunës seksuale është jetik për dizajnim të politikave të qëndrueshme dhe efektive, në mënyrë që të sigurojmë mirëqenie të plotë për të gjithë dhe hapa konkret drejt realizimit të drejtësisë. Ky takim, i mbajtur në kuadër të punës së Qendrës Rajonale të Ekselencës për Gratë, Paqen dhe Sigurinë në Kosovë, është një nga aktivitetet e shumta që do të organizohen në vazhdimësi me fokus tek të mbijetuarit e dhunës seksuale gjatë luftës dhe konfliktit.
Fjalimi i Presidentes Vjosa Osmani në manifestimin tradicional “ZBULIMI I HERSHËM – MBIJETESË”
Shumë të dashura gra, të cilat keni kaluar apo po kaloni betejën tuaj me kancerin e gjirit, I nderuar kryetar i Kuvendit, z. Basha, E nderuara nënkryetare, Të nderuar përfaqësues të institucioneve, Ambasadorë dhe përfaqësues të vendeve mike, Të dashur mjekë, infermierë dhe punonjës të kujdesit shëndetësor, Shumë e dashura, znj. Nafije Latifi, Motra e vëllezër, Tetori është muaji kur forca e grave vishet me ngjyrën e shpresës, me ngjyrën rozë. Është muaji kur kujtojmë, se çdo betejë e jetës mund të fitohet me dashuri, me kujdes dhe qëndresë. Në këtë muaj ne nuk flasim më vetëm për dhimbje, por flasim mbi të gjitha për guxim. Nuk flasim për sëmundje, por flasim për jetë. Sot jemi këtu për të nderuar kauzën dhe frymën. Frymën e grave që nuk u dorëzuan, që u përballën me frikën dhe e kthyen atë në forcë. Grave, që edhe në momentet më të vështira frymëzuan shpresë për veten, për familjet e tyre dhe për të gjitha gratë e Kosovës. Dua të filloj duke shprehur mirënjohjen tonë të thellë për shoqatën “Jeta Vita”, të udhëhequr nga znj. Nafije Latifi, për një punë të jashtëzakonshme që e kanë bërë për dekada të tëra, duke i dhënë zë grave anekënd Kosovës dhe duke e ngritur vetëdijen dhe rrjedhimisht edhe forcën tonë përballë kësaj sëmundjeje. Dua po ashtu të shpreh mirënjohjen më të thellë për mjekët, infermierët dhe të gjithë profesionistët shëndetësorë, që çdo ditë kujdesen me përkushtim për pacientët me kancer. Ju jeni mburoja e parë e shpresës së tyre, ndaj falë punës suaj të palodhur shumë gra sot janë histori suksesi. Prej kohës kur kam qenë Kryetare Kuvendi e sot edhe si Presidente kam pasur nderin që të punoj për së afërmi me secilin prej jush, në mënyrë që të bashkojmë forcat në përballjen me këtë sëmundje të qytetarëve tanë. Në çdo takim me gratë kemi mësuar diçka të re për forcën njerëzore, për besimin dhe për kuptimin e jetës. Prandaj, si Presidente e kam konsideruar detyrim moral e institucional të mbështesim çdo nismë që sjell lehtësim dhe shpresë për to. Kjo është pjesë e përkushtimit tonë të vazhdueshëm dhe mbështetje që e kemi nisur vite më parë e që nuk duhet të ndalet. Sepse, për çdo grua e çdo burrë që përballet me këtë sfidë ne duhet të jemi pranë jo vetëm me fjalë, por edhe me vepra konkrete. Sot më shumë se kurrë duhet ta ritheksojmë rëndësinë e diagnostikimit të hershëm. Çdo kontroll, çdo ekzaminim i rregullt është një mundësi për jetë. Sa më herët që të ndodh diagnostifikimi, aq më e madhe është shpresa për jetë. Kjo është arsyeja pse sërish dua t’i inkurajoj secilën grua, që mos të ketë frikë nga kontrolli. Sepse, nuk është frika ajo që shpëton jetën, por kontrolli mund të shpëtojë jetën kur ai ndodh herët. E di që kjo rrugë nuk është e lehtë. Kjo sëmundje kërkon guxim, kërkon përballje, kërkon përkrahje nga të gjithë që i kemi përreth dhe kërkon shumë dashuri. Por, dua të them sot me bindje të plotë: kanceri i gjirit nuk është fundi. Ai mund të jetë vetëm fillimi i një kapitulli shumë sfidues, por një kapitull që ju bën më të fortë dhe më të vetëdijshëm për jetën. Në çdo histori gruaja apo burri që ka kaluar betejën me kancer, ne shohim një shembull të jashtëzakonshëm të forcës njerëzore. Ato janë heroinat dhe heronjtë e heshtur të shoqërisë sonë. Është detyrë e jonë që zëri i tyre të dëgjohet, shembull i tyre të nderohet dhe përpjekja e tyre të mbështetet çdo ditë. Të nderuar të pranishëm, Tetori rozë nuk është vetëm një muaj për ndërgjegjësim, por një kujtesë për gjithë vitin, në mënyrë që asnjë grua të mos mbetet e vetme në këtë rrugëtim. Le ta kthejmë kujdesin për shëndetin e gjithë qytetarëve tanë në prioritet kombëtar. Le ta kthejmë dashurinë dhe solidaritetin në fuqi që shpëton jetë. Në fund dua t’ju them me zemër, të gjitha grave që po luftojnë: Ju nuk jeni vetëm! Ju keni një vend të veçantë, në zemrën e këtij vendi. Përderisa ka njerëz që kujdesen, institucione që mbështesin dhe shoqëri që bashkohet rreth kësaj kauze ka shpresë, ka jetë dhe ka fitore. Prandaj, në këtë Tetor Rozë le të jemi një zë, një zemër dhe një premtim. Se do të vazhdojmë të kujdesemi për veten, të diagnostikojmë herët, të mbështesim çdo grua e çdo burrë që përballet me këto sëmundje dhe të mos ndalemi kurrë, derisa secila betejë me kancerin të kthehet në histori suksesi. Le të vishemi me ngjyrën e shpresës, rozën jo vetëm në tetor, por edhe në ditë të tjera. Sepse, çdo ditë që jetojmë me dashuri, guxim dhe kujdes ndaj njëri-tjetrit është një ditë e fituar. Zoti i bekoftë të gjitha gratë që luftojnë, të gjitha nënat, motrat dhe bijat tona! Ju faleminderit!
Fjalimi i Presidentes Vjosa Osmani në Darkën e Lamës
I nderuar Kryetar i Kuvendit, E nderuara Nënkryetare, Shumë të nderuar ambasadorë të vendeve mike, Përfaqësues të institucioneve të sigurisë, të shoqërisë civile, të shoqatave të ndryshme, Mjekë, Sportistë, Shoqatat e familjeve të pagjeturve dhe organizata partnere, Miq të tokës, të traditës dhe të bereqetit, Nga toka fillon gjithçka: jeta, bereqeti dhe begatia. Toka ushqen çdo familje. Toka është rrënja që na mban të bashkuar çdo komb, dhe si e tillë është dëshmia më e qartë se puna dhe përkushtimi sjellin begatinë dhe suksesin. Sonte në këtë Darkë të Lamës, festën tonë tradicionale, ne nuk po festojmë thjesht fundin e një sezoni të punës, por njëkohësisht po nderojmë edhe vetë filozofinë jetësore të njeriut që jeton me tokën, që e punon tokën, që gëzon kur ajo jep fryt dhe që e falënderon Zotin për këtë fryt. Kjo Darkë e Lamës, e cila është nismë e Presidentit historik, dr. Ibrahim Rugova është ngjarje kulturore dhe kujtesë e lidhjes sonë me rrënjët tona, me dheun që na mban, me traditën që na mëson të jemi mirënjohës. Prandaj, sonte ne kujtojmë sërish urtësinë e Presidentit Rugova, i cili besonte se kombi forcohet me punë, me dije dhe me dashuri ndaj tokës që na ushqen. Në traditën tonë kulturore shprehje e çdoditshme është: Zoti ju dhashtë bereqet! Ky urim personifikon filozofinë e jetës dhe përmbledh në vete shpresën, mirënjohjen dhe lidhjen ndërmjet njeriut dhe natyrës. Është shprehja që ka kaluar brez pas brezi nga sofrat e fshatrave e qyteteve tona, tek oborret ku ruhej fara për vitin tjetër. Ashtu sikurse festa “Thanksgiving” në disa prej shteteve mike aleate, “Dita e Falënderimeve” pra, e cila kremtohet ndër të tjera edhe për të falënderuar për të korrat dhe begatinë, por edhe për gjithçka që jemi falënderues në jetën tonë. Edhe ne sonte në mënyrën tonë, me kulturën dhe shpirtin tonë, falënderojmë për bereqetin e këtij viti, për tokën tonë të bekuar që na mbushi hambaret dhe për duart e fermerëve tanë, që kanë punuar për bukën e vendit të tyre. Në shumë tregje evropiane ajvari i Grave të Krushës tashmë njihet si sinonim i shijes dhe i cilësisë së lartë. Verërat e Rahovecit apo Suharekës garojnë denjësisht me verërat e rajoneve më të njohura të Evropës. Rrushi, mjalti, shafrani, mollët, çajrat, frutat e maleve e shumë e shumë produkte tjera janë bërë ambasadorë të Kosovës dhe dëshmi e tokës sonë pjellore, mjeshtërisë së fermerëve tanë, si dhe përkushtimit për të kultivuar me dashuri dhe pasion. Këto produkte, përveçse mallra ekonomike janë tregim, një tregim për popullin tonë punëtor, i cili mundin e kthen në begati, e djersën në krenari! Të dashur miq, Bujqësia është një nga shtyllat e fuqizimit të shtetit. Çdo rendiment, çdo fermë, çdo prodhim bio që mbërrin në tregun tonë është një hap drejt pavarësisë sonë ekonomike. Sot, produktet bio nuk janë vetëm krenari e shtetit tonë, por një standard që po fiton gjithnjë e më shumë hapësirë e gjithnjë e më shumë respekt edhe në tregjet e tjera nëpër botë dhe në jetën e qytetarëve që zgjedhin të jetojnë shëndetshëm. Por, qytetarët tanë punëtorë nuk po dëshmohen vetëm me bujqësi e vetëm me zotësitë e tyre në këtë sektor. Në fakt, Kosova ka njerëz të vyeshëm në secilin sektor, të cilët me kontributin e tyre e bëjnë shtetin gjithnjë e më të fortë, gjithnjë e më të qëndrueshëm. Prandaj, në këtë Darkë të Lamës dua njëkohësisht të shpreh falënderimin dhe mirënjohjen time të thellë për secilin prej atyre, që e mbajnë këtë vend gjallë e krenar çdo ditë. Faleminderit nga zemra për të gjithë aleatët e Kosovës, që edhe sonte na janë bashkuar në këtë Darkë të Lamës, e të cilët qëndrojnë përherë pranë nesh në çdo sfidë. Respekt të pakufishëm për Policinë e Republikës së Kosovës, që me profesionalizëm e përkushtim ruan sigurinë e qytetarëve tanë. Për Forcën e Sigurisë së Kosovës, që me disiplinë e sakrificë është gardiane e Republikës sonë dhe pasqyra më e pastër e patriotizmit modern. Mirënjohje për zjarrfikësit tanë, që përballen me rrezikun për të shpëtuar jetë, por edhe për të shpëtuar tokën tonë. Për mjekët dhe infermierët, që na janë bashkuar sonte dhe shumë e shumë të tjerë, që po punojnë në shpëtim të jetës, të cilët çdo ditë mbajnë gjallë shpresën dhe kujdesin për shëndetin e njerëzve tanë. Falënderim me zemër për të gjitha shoqatat e dala nga lufta, për të mbijetuarit e dhunës seksuale gjatë luftës, për shoqatat që ato i mbështesin çdo ditë dhe për guximin e dinjitetin me të cilin e kanë kthyer plagët në forcë. Për organizatat që mbrojnë të drejtat e grave, të drejtat e pacientëve, të drejtat e fëmijëve dhe në përgjithësi organizatat, që çdo ditë janë kampione për të drejtat e njeriut, e na kujtojnë se barazia është themel i lirisë. Nderim për sportistët tanë të suksesshëm, që e lartësojnë flamurin tonë në arenën ndërkombëtare. Për shoqatat, të cilat punojnë çdo ditë me ne që Kosova të ecën përpara. Për institucionet tona, që çdo ditë e mbrojnë demokracinë. Dhe po ashtu, siç e përmenda më herët, shoqatat e dala nga lufta e UÇK-së, të cilat ruajnë kujtesën e sakrificës dhe për shoqatat e familjeve të të zhdukurve me dhunë, që nuk ndalen kurrë në kërkim të drejtësisë. Një falënderim të veçantë edhe për shoqatat që merren me të drejtat e fëmijëve dhe shoqatat që merren me personat me nevoja të veçanta. Kemi këtu shoqatën Down Syndrome, shoqatat e Autizmit dhe shumë e shumë të tjera, që çdo ditë na kujtojnë se dashuria, përkushtimi dhe dinjiteti nuk njohin kufij. Sepse një shoqëri e fortë matet me mënyrën se si kujdeset për secilin prej anëtarëve të saj. Faleminderit për mësuesit, që çdo ditë sigurohen që sistemi ynë arsimor të ecën përpara, përfshirë për mësuesen time të parë, e cila na është bashkuar sonte këtu. Secili prej jush, secili prej jush është dëshmi e gjallë se Kosova është frymë që nuk dorëzohet. Dhe ky mosdorëzim reflektohet më së miri në fëmijët që sonte i kemi ftuar, të cilët janë
Presidentja Osmani: Darka e Lamës është festë e falënderimit dhe mirënjohjes
Nën organizimin e Presidentes së Republikës së Kosovës, Vjosa Osmani, mbrëmë u mbajt Darka tradicionale e Lamës, në prani të ambasadorëve të vendeve mike, si dhe përfaqësuesve të institucioneve shtetërore dhe të jetës shoqërore. Në fjalën e saj para të pranishmëve, Presidentja Osmani theksoi se toka është rrënja që mban çdo komb të bashkuar dhe dëshmia më e qartë se puna dhe përkushtimi sjellin begatinë dhe suksesin. Presidentja Osmani kujtoi se kjo Darkë është nismë e Presidentit historik, Dr. Ibrahim Rugova, dhe njëkohësisht shprehje e urtësisë së tij se kombi forcohet me punë, dije dhe dashuri ndaj tokës që na ushqen. Më tej, Presidentja Osmani vuri në pah sukseset e prodhimeve vendore që tashmë njihen edhe jashtë Kosovës, si ajvari i grave të Krushës, verërat e Rahovecit e Suharekës, si dhe rrushi, mjalti, frutat, çajrat, e shumë produkte të tjera, duke theksuar se këto produkte nuk janë vetëm mallra ekonomike, por edhe tregim i punës, pasionit dhe përkushtimit të njerëzve të Kosovës. Në përmbyllje, Presidentja theksoi se Darka e Lamës është më shumë se një festë e bereqetit është një moment reflektimi dhe falënderimi për punën, bashkimin dhe shpirtin e mirënjohjes që e karakterizon popullin e Kosovës. Ajo shprehi mirënjohje për aleatët që qëndruan gjithnjë pranë nesh, për institucionet e sigurisë që mbrojnë sovranitetin e vendit dhe sigurinë e qytetarëve, për punonjësit shëndetësor e arsimor, organizatat e të drejtave të njeriut dhe shume përfaqësues të tjerë të cilët u mblodhën për ta festuar këtë traditë të lashtë të popullit tonë. “Darka e Lamës është një festë e mirënjohjes ndaj: punëtorit, fermerit, ndaj begatisë, ndaj natyrës që na fal, dhe ndaj Zotit që na jep bekim. Është moment për të kujtuar se fuqia e një kombi nuk matet vetëm me numrat në ekonomi, por me lidhjen shpirtërore që ai ka me tokën e vet dhe me traditën”, ka theksuar Presidentja Osmani.
Presidentja: Tetori rozë është muaji kur kujtojmë se çdo betejë e jetës mund të fitohet me dashuri, kujdes dhe qëndresë
Nën patronatin e Presidentes së Republikës së Kosovës, Vjosa Osmani, në kuadër të Muajit Ndërkombëtarë të Luftës Kundër Kancerit të Gjirit, së bashku me Qendrën Kosovare për Luftimin e Kancerit të Gjirit “JETA/VITA”, u mbajt manifestimi tradicional informativo-kulturor me moton “ZBULIMI I HERSHËM – MBIJETESË”. Presidentja Osmani ka shkruar: Bashkë me gratë e burrat që kanë mbijetuar kancerin, me aktivistet, mjekët dhe infermierët që kujdesen çdo ditë për ta, u bëmë bashkë sot në marshin për Tetorin Rozë 🎀 për të treguar se përbashkimi shndërrohet në shpresë. Tetori rozë është muaji kur kujtojmë se çdo betejë e jetës mund të fitohet me dashuri, kujdes dhe qëndresë. Sot, sikur çdo vjet, jemi bashkuar për ta dërguar një mesazh të fuqishëm: le ta mbështesim çdo grua e burrë dhe të mos ndalemi kurrë derisa çdo betejë me kancerin të shndërrohet në histori suksesi.
Presidentja Osmani priti në takim Kryemyftiun e Kosovës, Naim Tërnava
Presidentja e Republikës së Kosovës, Vjosa Osmani, priti sot në takim Kryemyftiun e Bashkësisë Islame të Kosovës, Naim Tërnava, me të cilin diskutoi për angazhimin e BIK-ut në forcimin e pozitës ndërkombëtare të shtetit, traditën e tolerancës ndërfetare dhe nevojën për vazhdimin e kultivimit të saj. Presidentja Osmani vlerësoi lart kontributin e Bashkësisë Islame të Kosovës në kultivimin e harmonisë ndërfetare, e cila përbën një nga vlerat më të çmuara të shoqërisë kosovare dhe një model i dallueshëm në rajon. Ajo theksoi se bashkëpunimi ndërmjet institucioneve shtetërore dhe bashkësive fetare është thelbësor për një shoqërie të drejtë dhe gjithëpërfshirëse.
Presidentja: Në Klinikën e Onkologjisë, për të katërtin vit me radhë, i dhuruam pakot onkologjike për gratë që janë përballur në betejën me kancerin e gjirit
Presidentja e Republikës së Kosovës, Vjosa Osmani për të katërtin vit me radhë, ka dhuruar pakot onkologjike për gratë që janë përballur në betejën me kancerin e gjirit. Presidentja Osmani ka shkruar: Nga dhimbja drejt forcës, nga frika drejt shpresës! Në Klinikën e Onkologjisë, për të katërtin vit me radhë, i dhuruam pakot onkologjike për gratë që janë përballur në betejën me kancerin e gjirit. Ky donacion prej 640 pakosh është një mbështetje dhe inkurajim për secilën grua që ka luftuar me dinjitet, e një kujtesë se pas çdo plage ka jetë, shpresë dhe rifillim. Mbështetja për gratë e prekura nga kanceri nuk është veprim i një dite, por një angazhim i përhershëm për dinjitetin, barazinë dhe shëndetin e tyre! Në këtë kauzë, bashkëpunojmë çdo ditë me shoqatën Jeta/Vita dhe Zonjën Nafije, si dhe me gjithë personelin shëndetësor të cilët po bëjnë një punë të jashtëzakonshme. Në çdo pako onkologjike ka një mesazh të qartë: Ti nuk je vetëm! Ti je e fortë! Ti mundesh!
Presidentja Osmani pranoi letrat kredenciale nga ambasadori i ri i Gjermanisë, Rainer Rudolph
Presidentja e Republikës së Kosovës, Vjosa Osmani, pranoi sot letrat kredenciale nga ambasadori i ri i Republikës Federale të Gjermanisë, Rainer Rudolph. Presidentja Osmani i uroi ambasadorit Rudolph mirëseardhje dhe suksese në angazhimin e tij diplomatik në Kosovë, duke shprehur mirënjohjen e thellë të popullit të Kosovës për mbështetjen e pandërprerë të Gjermanisë në të gjitha fazat e shtetndërtimit dhe forcimit të pozitës ndërkombëtare të vendit tonë. Në këtë kontekst, Presidentja Osmani theksoi se Gjermania ka qenë dhe mbetet një aleate e fuqishme e Kosovës dhe një mbështetëse e palëkundur në procesin e anëtarësimit të Kosovës në Bashkimin Evropian dhe në NATO. Gjatë takimit, u theksua rëndësia e forcimit të mëtejshëm të bashkëpunimit ekonomik, si dhe kontributi i çmuar i mërgatës sonë në Gjermani, e cila përmes angazhimit dhe investimeve të saj po forcon lidhjet mes dy vendeve dhe popujve tanë. Presidentja Osmani shprehu bindjen se partneriteti i ngushtë ndërmjet dy vendeve do të vazhdojë të thellohet në fusha të ndryshme me interes të ndërsjellë gjatë mandatit të ambasadorit.
Presidentja Osmani priti në takim Presidenten e Komisionit Evropian, Ursula von der Leyen
Presidentja e Republikës së Kosovës, Vjosa Osmani, priti sot në takim Presidenten e Komisionit Evropian, Ursula von der Leyen. Gjatë takimit, Presidentja Osmani theksoi përkushtimin e Republikës së Kosovës ndaj agjendës së reformave në kuadër të Planit të Rritjes, duke nënvizuar rëndësinë e zbatimit të tyre dhe bashkëpunimit të ngushtë me Bashkimin Evropian në këtë proces. Tani që Kuvendi është konstituuar, Presidentja shprehi pritjet e saj që miratimi i Planit të Rritjes të jetë ndër vendimet e para të Kuvendit. Presidentja Osmani theksoi se reformat e suksesshme dhe përparimi i vazhdueshëm i Kosovës në indekset ndërkombëtare të demokracisë dhe sundimit të ligjit janë dëshmi e qartë e përkushtimit të vendit tonë ndaj integrimit evropian. Në këtë kontekst, ajo ritheksoi rëndësinë që Kosovës t’i jepet statusi i vendit kandidat për anëtarësim në Bashkimin Evropian, duke gjetur mënyra për thyerjen e bllokadës aktuale që ekziston në BE. Në takim, Presidentja Osmani po ashtu theksoi domosdoshmërinë e heqjes së masave të padrejta ndaj Kosovës, duke rikujtuar se edhe vetë Komisioni Evropian ka konfirmuar se këto masa duhet të hiqen, që nga propozimi i Përfaqësuesit të Lartë të BE-së në qershor 2024. Duke folur për përpjekjet e Kosovës drejt përafrimit me Bashkimin Evropian, Presidentja Osmani theksoi se mbështetja e Komisionit Evropian në këtë proces mbetet thelbësore. Ajo ritheksoi përkushtimin e popullit të Kosovës, popullit më pro-evropian në botë, për të ardhmen evropiane të vendit tonë. Përveç kësaj, Presidentja ngriti gjithashtu çështjen e rritjes së bashkëpunimit me BE-në për të mbështetur sektorin e shëndetësisë në Kosovë, si një domosdoshmëri për zhvillimin e vendit dhe ngritjen e cilësisë së jetës për të gjithë qytetarët e Kosovës. Përgjatë takimit u diskutua për procesin e formimit të qeverisë pas konstituimit të Kuvendit, si dhe për zhvillimin e zgjedhjeve lokale, një ushtrim i rëndësishëm demokratik që edhe një herë dëshmoi profesionalizmin e institucioneve tona dhe përkushtimin e qytetarëve ndaj demokracisë. Ajo gjithashtu shprehu shqetësimin për ndërhyrjet e vazhdueshme dhe të paligjshme të Serbisë në proceset zgjedhore në Kosovë, janë veprime destabilizuese që bien ndesh me të drejtën ndërkombëtare.