25 vjet nga Rezoluta 1325 – pika që ndryshoi historinë e grave në paqe, siguri e më gjerë
Në vetëm tre vite, Kosova është shndërruar në qendër botërore të kësaj agjende përmes Qendrës së Ekselencës dhe Forumit Ndërkombëtar në Prishtinë, ku zëra nga mbarë bota janë bashkuar për drejtësi e barazi. Nga fuqizimi ekonomik te përfaqësimi në politikë e në ushtri, Kosova ka dëshmuar se gratë janë forca e paqes. Dhe për këtë arsye, pikërisht në tetor, në përvjetorin e Rezolutës, Presidentja Vjosa Osmani u nderua me Çmimin për Gratë, Paqen dhe Sigurinë nga Asambleja Parlamentare e NATO-s. Përmes këtij vlerësimi, u nderua puna, mundi dhe sakrifica e grave të Kosovës. Një vlerësim që, përveç nderit, vulos edhe një të vërtetë: përmes kësaj agjende dhe këtij forumi, Kosova jo vetëm që është bërë pjesë e hartës globale të ngjarjeve të mëdha, por edhe ka arritur suksese të rëndësishme diplomatike.
Përmbledhje e vizitës zyrtare të Presidentes Osmani në Mbretërinë e Arabisë Saudite
Gjatë vizitës së saj në Mbretërinë e Arabisë Saudite, Presidentja Vjosa Osmani realizoi një sërë takimesh bilaterale dhe multilaterale të rëndësishme, të cilat shënuan një moment të jashtëzakonshëm për forcimin e marrëdhënieve dypalëshe dhe hapjen e perspektivave të reja për integrimin ndërkombëtar të Republikës së Kosovës. Kjo vizitë kulmoi me njohjen e Republikës së Kosovës nga Siria, me ndërmjetësimin dhe mbështetjen e aleatëve. Respektivisht, Presidentja Osmani ka realizuar takime bilaterale me: • Lartësia e Tij Mbretërore Mohammed bin Salman, Princin e Kurorës së Mbretërisë së Arabisë Saudite, ku u ritheksua mirënjohja e Kosovës për përkrahjen e vazhdueshme dhe u diskutua hapja e kapitujve të rinj bashkëpunimi në fushat e energjisë së rinovueshme, turizmit, bujqësisë, sigurisë ushqimore, arsimit, inovacionit digjital dhe zhvillimit të qëndrueshëm. • Shkelqësia e Tij Mohamed Ould Cheikh El Ghazouani, Presidentin e Republikës Islamike të Mauritanisë, me të cilin Presidentja Osmani diskutoi avancimin e marrëdhënieve miqësore dhe rritjen e bashkëpunimit në skenën ndërkombëtare. • Shkelqësia e Tij Rumen Radev, Presidentin e Republikës së Bullgarisë, ku u fol për heqjen e masave të padrejta ndaj Kosovës dhe për përparimin e aplikimit të saj për statusin e vendit kandidat në Bashkimin Evropian. • Lartësia e Tij Mbretërore Hussein bin Abdullah al-Hashimi, Princin e Kurorës së Mbretërisë Haxhemite të Jordanisë, me të cilin u konstatua gatishmëria për të thelluar bashkëpunimin në fushat e mbrojtjes, tregtisë dhe teknologjisë së informacionit dhe komunikimit (ICT). • Yasir Al-Rumayyan, Guvernatorin e Public Investment Fund (PIF) të Arabisë Saudite, me të cilin u diskutua për investime strategjike dhe mundësitë për përfshirjen e Kosovës në projekte zhvillimore. • Talal Almarri, Drejtorin Ekzekutiv të Expo 2030 Riyadh, ku u konfirmua pjesëmarrja e Kosovës dhe mundësia e veçantë për të shfaqur potencialin e saj inovativ dhe teknologjik në kuadër të Expo 2030 në Riad. Gjithashtu, Presidentja Osmani pati rastin të bisedojë me: • Shkelqësia e Tij Paul Kagame, Presidentin e Republikës së Ruandës, • Shkelqësia e Tij Mohamed Irfaan Ali, Presidentin e Republikës së Guajanës, • Shkelqësia e Tij Cevdet Yılmaz, Zëvendëspresidentin e Republikës së Turqisë, • Shkelqësia e Tij Edi Rama, Kryeministrin e Republikës së Shqipërisë, • Gianni Infantino, Presidentin e FIFA-s, • dhe Donald Trump Jr., biznesmenin amerikan dhe djalin e Presidentit të Shteteve të Bashkuara të Amerikës, Donald Trump. Një moment kyç i kësaj vizite ishte takimi trilateral mes Princit të Kurorës, Mohammed bin Salman, Presidentes Osmani dhe Shkelqësisë së Tij Ahmad al-Sharaa, Presidentit të Sirisë, në të cilin u finalizua njohja e Republikës së Kosovës nga Siria — një hap historik për konsolidimin ndërkombëtar të vendit. Në kuadër të Future Investment Initiative (FII), Presidentja Osmani ishte e ftuar në tryezën e liderëve, ku diskutimi kryesor u përqendrua në temën: “Cila është kostoja e sigurisë ekonomike?” — një debat me rëndësi të veçantë për vendet që synojnë rritje të qëndrueshme ekonomike përmes dialogut, inovacionit dhe investimeve në infrastrukturë, transformim digjital dhe inteligjencë artificiale. Presidentja Osmani ishte gjithashtu e ftuar në darkën zyrtare të shtruar nga Princi i Kurorës, Mohammed bin Salman, për të ftuarit e FII, dhe u prit me nderime ushtarake menjëherë pas mbërritjes në Riad. Për mbarëvajtjen e vizitës, zhvillimet më të fundit globale dhe planet për bashkëpunim të ardhshëm ndërmjet Kosovës dhe Arabisë Saudite, Presidentja Osmani dha dy intervista ekskluzive për Al Arabiya dhe Arab News.
Presidentja Osmani: Siria njeh Republikën e Kosovës
Në një takim trilateral ndërmjet Lartësisë së Tij Mbretërore, Princit të Kurorës së Arabisë Saudite, Mohammed bin Salman Al Saud, Presidentes së Republikës së Kosovës, Vjosa Osmani, dhe Presidentit të Republikës Arabe të Sirisë, Ahmed Al-Sharaa, është arritur marrëveshja përmes së cilës Siria njeh Republikën e Kosovës, ndërsa të dy shtetet janë pajtuar të vendosin marrëdhënie diplomatike. Presidentja Osmani është angazhuar prej kohësh që të arrihet kjo njohje dhe do të vazhdojë të punojë ngushtë me aleatët dhe partnerët e Kosovës, në mënyrë që numri i njohjeve të rritet në vijimësi dhe që të forcohet pozita ndërkombëtare e Republikës së Kosovës. Më poshtë gjeni deklaratën e plotë të publikuar sot nga Presidentja Osmani: Republika e Kosovës e mirëpret përzemërsisht njohjen nga Siria dhe deklaratën e Mbretërisë së Arabisë Saudite lidhur me njohjen e pavarësisë së Kosovës nga Republika Arabe e Sirisë. Republika e Kosovës shpreh mirënjohjen e saj të thellë për vendimin e Republikës Arabe të Sirisë për të njohur pavarësinë e Kosovës dhe i shpreh falenderimet e saj Presidentit Ahmed al-Sharaa për lidershipin e tij dhe mbështetjen për popullin e Kosovës. Ky është vërtet një vendim me rëndësi historike për të dy shtetet, Kosovën dhe Sirinë, i bazuar në respektin e ndërsjellë për luftën e gjatë për liri, në njohjen reciproke të sovranitetit, integritetit territorial dhe përkushtimit për bashkëpunim dypalësh dhe vendosjen e marrëdhënieve diplomatike. Republika e Kosovës është thellësisht mirënjohëse për mbështetjen e Lartësisë së Tij Mbretërore, Princit të Kurorës dhe Kryeministrit të Mbretërisë së Arabisë Saudite, Mohammed bin Salman Al Saud. Lidershipi dhe vizioni i tij e kanë bërë rezultatin e këtij takimi trepalësh një moment historik për popullin e Kosovës dhe për popullin e Sirisë. Kjo marrëveshje e arritur sot në Riad, Mbretërinë e Arabisë Saudite, me mbështetjen dhe udhëheqjen e Lartësisë së Tij Mbretërore, Princit të Kurorës dhe Kryeministrit të Mbretërisë së Arabisë Saudite, Mohammed bin Salman Al Saud, është poashtu një njohje e vuajtjeve dhe sakrificës së popujve tanë për liri, si dhe shenjë e përkushtimit më të lartë për të mbështetur njëri-tjetrin në arenën ndërkombëtare dhe përmes marrëdhënieve dypalëshe.
Presidentja Osmani takoi Guvernatorin e Fondit të Investimeve Publike të Arabisë Saudite, Yasir Al-Rumayyan, si dhe Kryeshefin Ekzekutiv të EXPO 2030 Riad, Talal Almarri
Presidentja e Republikës së Kosovës, Vjosa Osmani, gjatë qëndrimit në Riad është takuar me Guvernatorin e Fondit të Investimeve Publike të Arabisë Saudite, Yasir Al-Rumayyan, si dhe Kryeshefin Ekzekutiv të EXPO 2030 Riad, Talal Almarri. Presidentja Osmani ka shkruar: Gjatë vizitës në Riad, kam takuar Guvernatorin e Fondit të Investimeve Publike të Arabisë Saudite, Yasir Al-Rumayyan, si dhe Kryeshefin Ekzekutiv të EXPO 2030 Riad, Talal Almarri. Në këto takime të ndara, diskutuam për investime strategjike, projekte zhvillimore dhe pjesëmarrjen e Kosovës në EXPO 2030 që do të mbahet në Riad, ku vendi ynë do ta ketë mundësinë ta prezantojë potencialin e jashtëzakonshëm në fushën e inovacionit dhe teknologjisë.
Presidentja Osmani: Presidenti i Bullgarisë, Rumen Radev, është një mik i Kosovës dhe mbështetës i fuqishëm i aspiratave tona euroatlantike
Presidentja e Republikës së Kosovës, Vjosa Osmani, gjatë qëndrimit në Riad është takuar me Presidentin e Bullgarisë, Rumen Radev. Presidentja Osmani ka shkruar: Presidenti i Bullgarisë, Rumen Radev, është një mik i Kosovës dhe mbështetës i fuqishëm i aspiratave tona euroatlantike. Në takimin tonë në Riad, në qendër të bisedës ishin largimi i masave të padrejta ndaj Kosovës dhe avancimi i aplikacionit për statusin e vendit kandidat në Bashkimin Evropian, si pjesë e përpjekjeve tona të përbashkëta për të forcuar stabilitetin rajonal dhe për të thelluar bashkëpunimin ndërmjet vendeve tona në kuadër të partneritetit evropian dhe euroatlantik.
Presidentja Osmani takoi Presidentin e Mauritanisë, Mohamed Ould Cheikh El Ghazouani
Presidentja e Republikës së Kosovës, Vjosa Osmani, gjatë qëndrimit në Riad është takuar me Presidentin e Mauritanisë, Mohamed Ould Cheikh El Ghazouani. Presidentja Osmani ka shkruar: Një takim shumë i mirë në Riad me Presidentin e Mauritanisë, Mohamed Ould Cheikh El Ghazouani. Biseduam për forcimin e marrëdhënieve miqësore ndërmjet Kosovës dhe Mauritanisë, gatishmërinë për të punuar së bashku në nivel ndërkombëtar, si dhe për angazhimin tonë të ndërsjellë në thellimin e bashkëpunimit bilateral.
Presidentja Osmani takoi Princin e Kurorës së Mbretërisë Hashemite të Jordanisë, Lartmadhërinë e Tij, Hussein bin Abdullah al-Hashimi
Presidentja e Republikës së Kosovës, Vjosa Osmani gjatë qëndrimit në Riad, është takuar me Princin e Kurorës së Mbretërisë Hashemite të Jordanisë, Lartmadhërinë e Tij, Hussein bin Abdullah al-Hashimi. Presidentja Osmani ka shkruar: Në Riad, zhvillova një takim shumë të frytshëm me Princin e Kurorës së Mbretërisë Hashemite të Jordanisë, Lartmadhërinë e Tij, Hussein bin Abdullah al-Hashimi. Kosova dhe Jordania gëzojnë marrëdhënie të shkëlqyera bilaterale, të ndërtuara mbi miqësi, mirëbesim dhe bashkëpunim të ndërsjellë. Gjatë takimit, konfirmuam gatishmërinë për thellimin e partneritetit dhe diskutuam mënyrat për të hapur kapituj të rinj bashkëpunimi në fusha me interes të përbashkët, përfshirë mbrojtjen, tregtinë dhe teknologjinë e informacionit (ICT).
Qendra Rajonale e Ekselencës për Gratë, Paqen dhe Sigurinë në Kosovë shënon 25-vjetorin e Rezolutës 1325 të OKB-së
Në muajin që shënon 25-vjetorin e miratimit të Rezolutës 1325 të Kombeve të Bashkuara për Gratë, Paqen dhe Sigurinë, Qendra Rajonale e Ekselencës për Gratë, Paqen dhe Sigurinë në Kosovë organizoi dje një konferencë njëditore, në kuadër të së cilës u diskutuan kërcënimet e reja të shekullit XXI që po prekin gratë dhe vajzat në mbarë botën. Diskutimet përfshinë tema si dhuna me bazë gjinore e lehtësuar nga teknologjia, siguria kibernetike, mbrojtja e të dhënave dhe sfida të tjera që përbëjnë forma të reja të rrezikut me të cilat përballen gratë dhe vajzat çdo ditë. Për t’iu përgjigjur këtyre sfidave, pjesëmarrësit nga vendet e rajonit diskutuan mënyrat për të forcuar bashkëpunimin rajonal me qëllim fuqizimin e rolit, lidershipit dhe vendimmarrjes së grave e vajzave, si në hapësirën digjitale, ashtu edhe në jetën publike e politike. Pjesa e fundit e konferencës iu kushtua rrëfimeve personale të fëmijëve të luftës nga Kosova dhe Bosnja e Hercegovina, histori prekëse të individëve që kanë përballuar traumën ndërbrezore dhe e kanë shndërruar dhimbjen në forcë e sukses. Këto histori frymëzuese dëshmojnë se ndërtimi i sistemeve të qëndrueshme mbështetëse për të mbijetuarit e luftës është thelbësor për krijimin e shoqërive më gjithëpërfshirëse, demokratike dhe më të zhvilluara.
Presidentja Osmani u prit në takim nga Princi i Kurorës së Arabisë Saudite, Mohammed bin Salman
Presidentja e Republikës së Kosovës, Vjosa Osmani u prit sot në një takim zyrtar nga Princi i Kurorës së Mbretërisë së Arabisë Saudite, Lartëmadhëria e Tij Mbretërore Mohammed bin Salman. Në këtë takim të Presidentes Osmani, mori pjesë edhe Kryetari i Bashkësisë Islame të Kosovës, myftiu Naim Tërnava. Gjatë takimit, Presidentja Osmani shprehu mirënjohjen e thellë për miqësinë dhe mbështetjen e palëkundur që Mbretëria e Arabisë Saudite i ka dhënë popullit dhe shtetit të Kosovës ndër vite. Duke theksuar rëndësinë e thellimit të bashkëpunimit ekonomik dhe hapjes së kapitujve të rinj në marrëdhëniet ndërmjet dy vendeve, Presidentja Osmani propozoi lehtësimin e lëvizjes së lirë për qytetarët e Kosovës përmes mundësisë së aplikimit për viza elektronike, një nismë që u mirëprit me interes të veçantë nga Lartmadhëria e Tij, Princi i Kurorës. Në takim u theksua përkushtimi i përbashkët i të dy shteteve për paqe, stabilitet dhe bashkëpunim rajonal e global, si dhe gatishmëria për t’i thelluar më tej marrëdhëniet dypalëshe nëpërmjet marrëveshjeve të reja dhe zgjerimit të horizonteve të bashkëpunimit në fusha me interes të ndërsjellë. Presidentja Osmani shprehu gatishmërinë për të zgjeruar bashkëpunimin me Arabinë Saudite në fushat e energjisë së rinovueshme, turizmit, bujqësisë dhe sigurisë ushqimore, arsimit, inovacionit digjital dhe zhvillimit të qëndrueshëm, duke hapur kapituj të rinj në marrëdhëniet në mes dy vendeve.
Presidentja Osmani: Si bashkëpunëtor i ngushtë i presidentit historik Dr. Ibrahim Rugova, Ukë Bytyçi dha gjithçka për qytetarët e tij dhe për të ardhmen e vendit
Ukë Bytyçi ishte një nga figurat më të shquara të Suharekës dhe një atdhetar i palodhur për lirinë dhe pavarësinë e Kosovës. Si bashkëpunëtor i ngushtë i presidentit historik Dr. Ibrahim Rugova, Ukë Bytyçi dha gjithçka për qytetarët e tij dhe për të ardhmen e vendit. Guximi, urtësia dhe vendosmëria e tij e bënë një lider të besueshëm dhe vizionar, por jeta e tij u ndërpre para kohe, duke lënë bosh një angazhim të jashtëzakonshëm për Suharekën e për gjithë Kosovën. Qoftë i përjetshëm kujtimi për Ukë Bytyçin!