Fjalimi i Presidentes Vjosa Osmani me rastin e Ditës Kombëtare të Francës
I nderuar Ambasador i Francës në Kosovë, z. Olivier Guerot, Të nderuar përfaqësues të institucioneve, Zoti Kryetar i Kuvendit, Zoti Kryeministër, Zonja Zëvendëskryeministre, ministra, Zoti President Sejdiu, Komandant i KFOR-it, Deputet, Përfaqësues të institucioneve të sigurisë, Shkëlqesi ambasadorë, Shumë të dashur miq, Jam shumë e lumtur që sot në Ditën Kombëtare të Francës t’ua përcjell urimet e popullit dhe të institucioneve të Republikës së Kosovës. Dita juaj Kombëtare e njohur ndryshe edhe si Dita e Bastijes, është ditë që përfaqëson triumfin e lirisë, të barazisë dhe të vëllazërisë dhe shërben si simbol i unitetit për kombin francez e si model frymëzimi për popujt e lirë gjithandej botës. Festa juaj kombëtare shërben si kujtesë e vlerave të qëndrueshme të popullit francez. Liria shtylla e parë e Republikës suaj përmbledh shpirtin e paepur të popullit francez, i cili i luftoi fort për t’i fituar të drejtat dhe lirinë e tij. Veprimet e paraardhësve tuaj ndezën një valë ndryshimesh në mbarë botën duke frymëzuar kombet e shumta që t’i sfidojnë regjimet shtypëse dhe të përpiqen për lirinë e popullit të tyre. Dita Kombëtare franceze është mundësi e shkëlqyer për t’ia shprehur mirënjohjen dhe vlerësimin tonë të madh këtij kombi, i cili me vlerat e tij e përkushtimin ndaj demokracisë me angazhimin për paqen e sigurinë në botë dhe me promovimin e frymës së lirisë frymëzoi kombet e tjera përfshirë edhe popullin tonë për t’ia rritur synimet e veta kombëtare. Ju e dëshmuat këtë përkushtim në vitet e 90-ta kur ju u rreshtuat krahas aleatëve tuaj e tanë perëndimorë në mbrojtje të lirisë së popullit tonë, i cili ishte i shtypur egërsisht nga regjimi i atëhershëm i Millosheviqit dhe intervenuat së bashku me aleatët e tjerë për ta çliruar popullin e Kosovës. Ne do ta kujtojmë përherë me respekt të thellë angazhimin tuaj për lirinë dhe për pavarësinë tonë, prandaj në secilën festë madje çdo ditë ne shprehim mirënjohjen tonë të thellë për burrat dhe gratë e Francës, të cilët shërbyen në Kosovë në detyra të ndryshme përfshi në kuadër të forcave të NATO-s. Ne nderojmë sakrificën e tyre dhe shprehim respektin tonë të thellë për angazhimin e tyre të palëkundur për të mbrojtur lirinë tonë. Prandaj, të dashur miq francezë, në Kosovë ju do ta gjeni përherë mirënjohjen e një populli të tërë për ndihmën që na dhatë në momente vendimtare të historisë sonë, në momente të vështira kur ekzistenca jonë po rrezikohej dhe kur shtypja ndaj popullit tonë po bëhej përditshmëri, ju u rreshtuat krah nesh dhe ndikuat që fryma e lirisë të triumfojë mbi shtypjen e poshtërimin. Të nderuar pjesëmarrës, Zoti ambasador, Franca ka qenë një përkrahëse e palëkundur e rrugëtimit të Kosovës drejt pavarësisë dhe shtetësisë. Përgjatë viteve Franca ka luajtur një rol kyç në njohjen ndërkombëtare të Kosovës duke qëndruar përkrahë popullit të Kosovës në përpjekjet tona fillimisht për liri e pastaj në procesin e shtetndërtimit e zhvillimit ekonomik. Kjo mbështetje ka qenë thelbësore edhe për forcimin e lidhjeve midis dy kombeve tona dhe nxitjen e një partneriteti të bazuar në respekt e mirëkuptim reciprok. Në sferën e kulturës dhe arsimit Franca ka shërbyer si frymëzim për popullin e Kosovës. Gjuha dhe kultura franceze kanë rrëmbyer zemrat e mendjet e shumë kosovarëve të cilët e kanë përqafuar trashëgiminë e pasur dhe kontributet letrare të Francës. Sistemi arsimor francez ka ofruar mundësi për shumë e shumë qytetarë tanë përfshi për Atin Themeltar të Republikës së Kosovës, Presidentin Ibrahim Rugova, për t’i zgjeruar horizontet e tyre për ta zhvilluar potencialin e tyre për të kontribuar në pasurimin e tyre intelektual e kulturor dhe për të dhënë kontribut të drejtpërdrejt pastaj në ndërtimin e shtetit të Kosovës. Marrëdhëniet mes Francës dhe Kosovës shtrihen përtej sferës zyrtare diplomatike, ato i kanë rrënjët në lidhjet e shkëmbimet që ndodhin mes qytetarëve tanë, shkëmbime kulturore e akademike që kanë promovuar edhe ndjenjën e miqësisë e solidaritetit. Ndërsa festojmë Ditën Kombëtare e Francës, ne shprehim mirënjohjen tonë për mbështetjen dhe miqësinë e palëkundur që Franca i ka dhënë Kosovës. Ky partneritet është një shembull i shkëlqyer se si kombet mund të bashkohen për të promovuar paqen, drejtësinë dhe bashkëpunimin. Le të vazhdojmë prandaj që t’i ushqejmë këto marrëdhënie duke nxitur mirëkuptim edhe më të madh e duke eksploruar edhe rrugë të reja të bashkëpunimit. Së bashku ne mund të ndërtojmë një të ardhme ku vlerat e lirisë barazisë e vëllazërisë mbizotërojnë jo vetëm brenda kombeve tona, por edhe në mbarë globin. Sot dy vendet tona dhe popujt tanë jetojnë në paqe e punojnë me zell për kultivimin e vazhdueshëm të vlerave mbi të cilat qytetërimi ynë i përbashkët është ndërtuar prej shekujsh. Urojmë që në frymën e bashkëpunimit të mirë do të vazhdojmë të kemi mbështetjen tuaj në proceset strategjike në vijim siç është anëtarësimi në NATO aty ku ushtria jonë e shteti ynë e ka vendin e përfundimisht të punojnë bashkë edhe për ta kompletuar projektin unik të Bashkimit Evropian duke jetësuar një Evropë të bashkuar me Kosovën dhe Ballkanin Perëndimor si pjesë përbërëse të saj. Si përfundim në këtë ditë të mbarë le të festojmë marrëdhënie të thella e të qëndrueshme mes Francës dhe Kosovës. Urojmë që kjo miqësi të vazhdojë të rrugëzojë duke kontribuar në prosperitetin, paqen dhe mirëqenien e shteteve tona ndërsa qëndrojmë së bashku ne riafirmojmë angazhimin tonë për një partneritet gjithnjë e në rritje dhe po ashtu angazhimin për të ndërtuar një botë që është gjithëpërfshirëse e drejtë dhe e respektueshme për të gjithë. Ju faleminderit!
Fjalimi i Presidentes Osmani në ceremoninë e diplomimit të policëve të rinj të Gjeneratës së 58-të të Policisë së Kosovës
Faleminderit shumë, I nderuar Kryeministër Kurti, Zëvendëskryeministre Rexhepi, Të nderuar ministra, Sveçla, Mehaj, I nderuar drejtor Hoxha, Staf drejtues i Policisë dhe staf akademik i Akademisë së Sigurisë Publike, I nderuar komandant i KFOR-it, Zëvendës komandant i Forcës së Sigurisë së Kosovës, Të dashur zyrtarë e zyrtare policore të Policisë së Kosovës, Zyrtarë të vendeve partnere, Të dashur kadetë të Gjeneratës së 58-të, E mbi të gjitha, të dashura familje krenare, Sot është një ditë e rëndësishme për të gjithë ne, pasi jemi mbledhur për ta kremtuar diplomimin e pjesëtarëve më të rinj të Policisë së Republikës së Kosovës. Qëndroj para jush me krenari dhe me nder të madh, teksa ju dëshmoni kulmin e punës suaj të palodhur, përkushtimin dhe angazhimin për t’i shërbyer shtetit dhe për t`i mbrojtur të gjithë qytetarët tanë. Më lejoni t’ju shpreh urimet e mia më të përzemërta për secilin prej jush! Të diplomosh në akademinë e policisë nuk është një arritje e vogël. Ajo kërkon disiplinë, këmbëngulje dhe një dëshirë të vendosur për t`i mbështetur parimet e drejtësisë, të sigurisë dhe të shtetit të së drejtës. Sot ju keni dëshmuar se zotëroni cilësitë e nevojshme për të shërbyer si gardianë të shtetit dhe të qytetarëve tanë! Mos harroni se distinktivi që mbani, përfaqëson jo vetëm autoritetin që ju është dhënë, por mbi të gjitha shpresat dhe aspiratat e qytetarëve tanë. Veprimet tuaja do ta krijojnë perceptimin publik, teksa angazhimi juaj për rend dhe ligj do të përcaktojë legjitimitetin e institucioneve tona të zbatimit të ligjit. Sot qëndroj para jush plot krenari dhe respekt të madh për secilin prej jush, në këto momente kur ju do të bëni betimin e shenjtë për të realizuar detyrat e përcaktuara me Kushtetutën e Republikës së Kosovës, dhe do t’u bashkoheni kolegëve e kolegeve tuaja për të realizuar me vendosmëri përgjegjësinë për ruajtjen e rendit dhe sigurisë publike në tërë territorin e Republikës së Kosovës si dhe përgjegjësinë për kontrollin e mbrojtjen e kufirit në bashkëpunim të drejtpërdrejtë me autoritetet vendore, si dhe me partnerët tanë ndërkombëtar. Sfidat, kërcënimet dhe rreziqet e tanishme ndaj sigurisë shtetërore ndërlidhin kërcënimet tradicionale konvencionale dhe ato jokonvencionale të Serbisë ndaj vendit tonë, krahas ndërlikimit që shkaktojnë krimi i organizuar, korrupsioni, terrorizmi dhe krimi transnacional. Si rrjedhojë e zhvillimeve dinamike globale, kufiri ndarës ndërmjet kërcënimeve dhe rreziqeve të jashtme dhe të brendshme, rajonale, kontinentale e globale është bërë pothuajse i padukshëm, prandaj është domosdoshmëri që Republika e Kosovës me institucionet e saj të bëhet anëtare fuqiplotë në Interpol dhe Europol. Republika e Kosovës si anëtare e Europolit dhe Interpolit do ta përmirësojë efektivitetin dhe bashkëpunimin ndërmjet shteteve anëtare në parandalimin dhe luftimin e krimit të organizuar në dimension ndërkombëtar, duke ditur se Policia e Kosovës është ndërtuar dhe zhvilluar sipas modeleve, vlerave dhe standardeve më të avancuara të vendeve të demokracive perëndimore. Të nderuar të pranishëm, Jam e lumtur që në mesin e 419 policëve të rinj, kemi 85 policë e police nga radhët e komuniteteve jo shumicë dhe 47 vajza e gra që rikonfirmon tashmë besimin e madh të qytetarëve tanë edhe nga radhët e komuniteteve në Policinë tonë, si dhe vendosmërinë e vajzave e grave tona të të gjitha komuniteteve për të shërbyer dhe kontribuar në misionin e sigurisë, të lirisë dhe të drejtave për të gjithë pa dallim. Sa më shumë gra në institucionet e sigurisë, aq më shumë siguri për të gjithë qytetarët tanë, pa dallim! Natyrisht që përderisa numri i sotëm është për t’u admiruar, ne duhet të punojmë të gjithë bashkë që të rrisim edhe më shumë numrin e vajzave e të grave, por edhe të komuniteteve jo shumicë në policinë tonë. Police dhe policë të nderuar, përbrendësoni në mendjet dhe zemrat tuaja betimin e shenjtë që do ta bëni sot dhe përgjegjësinë për të mbrojtur dhe shërbyer përgjithmonë me nder dhe krenari. Prandaj sot, të gjithë së bashku të shprehim edhe njëherë falënderimin dhe krenarin tonë të pashoq, me policët dhe policet tona që po shërbejnë në veriun e vendit tonë për ta mbrojtur çdo pëllëmbë të Republikës së Kosovës. Të gjithë ju keni zgjedhur një profesion fisnik ndaj kam besimin e plotë në aftësitë tuaja për t`i kryer detyrat me nder, përkushtim dhe respekt! Qofshi mishërim i drejtësisë, i sigurisë, i mbrojtjes së të drejtave të qytetarëve tanë dhe i lartësimit të vlerave të shtetit tonë! Të dashura familje ndihuni krenar me bijtë e me bijat tona sepse ata janë mburoja e shtetit tonë. Zoti ju bekoftë! Ju faleminderit!
Presidentja Osmani takoi ambasadorin e Shteteve të Bashkuara, Jeffrey Hovenier
Presidentja e Republikës së Kosovës, Vjosa Osmani ka pritur sot në takim të rregullt ambasadorin e Shteteve të Bashkuara, Jeffrey Hovenier më të cilin bisedoi për zhvillimet në vend, me fokus të veçantë në veprimet e institucioneve të Kosovës për shtensionimin e situatës në veri të vendit. Në takim u diskutua edhe për vazhdimin e bashkërendimit me partnerët, duke e ditur që si institucionet tona ashtu edhe SHBA ndajnë të njëjtin qëllim për një Kosovë demokratike dhe multietnike që është e integruar në strukturat euroatlantike, si dhe me sovranitet e integritet territorial të pacenueshëm.
Presidentja Osmani: Dhuna nuk mund të shndërrohet në mjet politik
Presidentja e Republikës së Kosovës, Vjosa Osmani e ka dënuar dhunën fizike mes deputetëve të Kuvendit të Kosovës që ndodhi sot gjatë mbajtjes së seancës plenare. Në vijim, reagimi i plotë: Përdorimi i dhunës fizike si mjet për t’i adresuar pakënaqësitë, dallimet apo mosmarrëveshjet politike është dëmi më i madh që mund t’i bëhet institucioneve që janë ndërtuar me aq shumë mund e sakrificë. Kuvendi është gurthemeli i shoqërisë sonë demokratike, ku zëra të ndryshëm bashkohen për t’i përfaqësuar interesat e qytetarëve, ndaj dhuna nuk ka vend në tempullin e demokracisë dhe nuk mund të shndërrohet në mjet politik. Duhet ta riafirmojmë përkushtimin tonë ndaj demokracisë, mendimit ndryshe, sikurse edhe respektit të ndërsjellë, duke u mbështetur në sundimin dhe respektimin e ligjit.
Presidentja Osmani priti në takim lamtumirës ambasadorin e Norvegjisë, Jens Erik Grondahl
Presidentja e Kosovës, Vjosa Osmani priti sot në takim lamtumirës ambasadorin e Norvegjisë, Jens Erik Grondahl. Presidentja Osmani shprehu vlerësimin e saj për marrëdhëniet e afërta dhe partneritetin me Norvegjinë. Në këtë kontekst, falënderoi ambasadorin Grondahl për angazhimin e tij në thellimin e raporteve bilaterale midis Kosovës dhe Norvegjisë si dhe për mbështetjen dhënë institucioneve të Republikës së Kosovës. Presidentja Osmani theksoi rëndësinë e vazhdimit të përkrahjes së Norvegjisë për anëtarësimin e Kosovës në NATO dhe organizata të tjera ndërkombëtare, si dhe për finalizimin e marrëveshjes së tregtisë së lirë me vendet e EFTA-s. Në një pjesë të takimit, u diskutua edhe për zhvillimet politike dhe të sigurisë në veri të vendit, mr ç’rast Presidentja Osmani potencoi vullnetin e institucioneve të Kosovës për tejkalimin e situatës aktuale krahas me aleatët.
Presidentja Osmani, në Ditën e Përkujtimit të Gjenocidit në Srebrenicë, priti në takim deputetin Šemsudin Mehmedović dhe një delegacion të përfaqësuesve të komunitetit boshnjak në Kosovë
Presidentja e Republikës së Kosovës, Vjosa Osmani, në Ditën e Përkujtimit për Gjenocidin e Srebrenicës, ka pritur në takim deputetin e Dhomës së Përfaqësuesve të Bosnje dhe Hercegovinës, Šemsudin Mehmedović, si dhe një delegacion të përfaqësuesve të komunitetit boshnjak në Kosovë, përfshirë zëvendëskryeministren Emilija Redžepi dhe deputetë të Kuvendit të Republikës. Në takim, Presidentja Osmani ka potencuar se vuajtjet e popullit boshnjak në këtë ditë të trishtë ndahen edhe nga populli i Kosovës, duke theksuar se gjenocidi në Srebrenicë është simbol i tmerrit të krimeve gjenocidale serbe. Presidentja ka thënë se kujtimi për ta është i çdoditshëm, ndërsa ka folur edhe për krimet makabre dhe masakrat e regjimit gjenocidal serb kundër popullit të Kosovës. Presidentja ka përsëritur dënimin e fuqishëm kundër çdo përpjekjeje për të mohuar gjenocidin e Srebrenicës, sepse ky mohim ka për qëllim denigrimin e viktimave dhe fshehjen e motiveve të krimeve të kryera. Në diskutim me deputetin Mehmedović, Presidentja Osmani ka thënë se koordinimi i përbashkët është tejet i rëndësishëm në këtë periudhë kur tendencat për destabilizim dhe minim të paqes janë në rritje, prandaj në këtë drejtim, ka vlerësuar edhe kontributin e jashtëzakonshëm të komunitetit boshnjak në Kosovë si urë ndërlidhëse e këtij koordinimi. Gjatë takimit, deputeti Mehmedović falënderoi Presidenten Osmani për përkrahjen e vazhdueshme, si dhe për rolin e saj në miratimin e Rezolutës së Kuvendit të Republikës për Gjenocidin në Srebrenicë.
Presidentja: Mohuesit e gjenocidit nuk mund të shndërrohen asnjëherë në faktorë të paqes
Presidentja e Republikës së Kosovës, Vjosa Osmani ka përkujtuar viktimat e gjenocidit në Srebrenicë. Në vijim gjeni të plotë postimin e Presidentes: 8372 jetë të pafajshme! 8372 nëna të Srebrenicës që edhe sot kërkojnë drejtësi për bijtë e tyre! Një gjenocid që nuk do të harrohet kurrë. Një regjim, që edhe sot e mohon gjenocidin në Srebrenicë e kudo në Bosnjë e Hercegovinë, sikurse e mohon edhe gjenocidin në Kosovë. Po i njëjti regjim që avokonte për gjenocidin atëherë e që i sulmon Kosovën e Bosnje-Hercegovinën edhe sot. Mohuesit e gjenocidit nuk mund të shndërrohen asnjëherë në faktorë të paqes. Kujtim i përhershëm për të gjitha viktimat e regjimit gjenocidal të Millosheviqit! #Srebrenica
Presidentja Vjosa Osmani priti në takim ambasadorin e Gjermanisë në Kosovë, Jörn Rohde
Presidentja e Republikës së Kosovës, Vjosa Osmani, ka pritur sot në takim ambasadorin e Gjermanisë, Jörn Rohde, me të cilin biseduan lidhur me situatën e sigurisë në vend, me theks të veçantë në veri të vendit dhe angazhimin e institucioneve të Kosovës për deeskalimin e situatës. Sipas Presidentes Osmani, Kosova ka demonstruar vullnet për deeskalim, duke ofruar mbajtjen e zgjedhjeve në veri dhe se sfidat aktuale do t’i tejkalojë me partnerët. Gjithashtu, Presidentja Osmani diskutoi me ambasadorin Rohde lidhur me përgatitjet që po bëhen për samitin e radhës të Procesit të Berlinit, si dhe për Samitin e NATO-s në Lituani.
Presidentja Osmani priti në takim përfaqësuesin e UNDP-së në Kosovë, Nuno Querios
Presidentja e Republikës së Kosovës, Vjosa Osmani priti në takim përfaqësuesin e UNDP-së në Kosovë, Nuno Querios, të cilit i uroi mirëseardhje dhe shprehu gatishmërinë për vazhdimin e bashkëpunimit në projektet, të cilat do të zbatohen në Kosovë nga UNDP-ja. Gjatë takimit Osmani vlerësoi lartë kontributin e UNDP-së në mbështetjen e shumë programeve dhe projekteve në Kosovë, me theks të veçantë tek ato për gratë, rininë, mjedisin dhe personat me nevoja të veçanta. Presidentja Osmani kërkoi mbështetje për projektet, të cilat janë ndër prioritetet e mandatit të saj, të cilat përfshinë fuqizimin ekonomik të grave, përkrahjen e fëmijëve me nevoja të veçanta, si dhe agjendën e gjelbër. Ndërsa, përfaqësuesi i UNDP, u shpreh i hapur për të bashkëpunuar për t`i përkrahur këto prioritete duke marrë parasysh edhe projektet e ngjashme që po zhvillohen në rajon. Ndër të tjera, u diskutua edhe për Forumin për Gratë, Paqen dhe Sigurinë, i cili organizohet nga Presidentja Osmani. Presidentja falënderoi UNDP-në për partneritetin dhe bashkëpunimin e deritanishëm, si dhe nga ky takim u riikonfirmua mbështetja edhe për këtë vit.
Fjalimi i Presidentes Vjosa Osmani në pritjen e organizuar nga Ambasada Amerikane për nder të Ditës së Pavarësisë së Shteteve të Bashkuara
Zoti ambasador, Zoti Kryetar, Zoti kryeministër, Miq të Kosovës dhe miq të Shteteve të Bashkuara, Gëzuar 4 Korrikun! Me vërtetë ka shumë pak vende në botë ku dashuria për vendin tuaj është e lidhur kaq thellë me dashurinë për Amerikën. Në vendin tonë, kjo ndjenjë është kulmore. Nëse ju rastisë të flisni me një gjyshe në Dragash, një djalë të ri në Prizren, një fermer në Shalën e Bajgorës, apo një grua police në Mitrovicë, nëse flisni me të rinjtë derisa ata janë duke shijuar jetën e tyre të natës në Prishtinë, apo janë duke shëtitur në malet e mahnitshme të vendit tonë…dashuria për Kosovën dhe dashuria për Amerikën janë një. Ndërsa 4 korriku është me të vërtetë një ditë krenarie për të gjithë amerikanët, është një ditë e mirënjohjes së madhe për popullin e Kosovës. Uniteti që kjo ditë nxitë nuk kufizohet vetëm brenda Shteteve të Bashkuara … ai shkon shumë më larg, përtej kufijve të saj. Amerikanët brenda dhe jashtë vendit janë të bashkuar përmes një fryme festive duke kremtuar vlerat dhe idealet mbi të cilat është ndërtuar ky komb i madh, ndërsa rikonfirmojnë angazhimin e tyre ndaj njëri-tjetrit dhe ndaj aleatëve në mbarë botën për të vazhduar ruajtjen, promovimin dhe avancimin e mëtejmë të tyre. Po kështu, në çdo cep të Kosovës, ne i bashkohemi amerikanëve anembanë botës, jo vetëm për të festuar këtë ditë të rëndësishme por edhe për të shprehur vlerësimin tonë maksimal për partneritetin tonë të gjatë dhe për kontributin që Shtetet e Bashkuara kanë dhënë për lirinë tonë, pavarësinë dhe procesin tonë të shtetndërtimit. Po ashtu, edhe për mbështetjen që vazhdojmë ta marrim, ndërsa ndjekim rrugën tonë euroatlantike Të dashur miq, Ndërkohë që sukseset kanë formësuar historikisht aleancat tona, nuk munguan as sfidat. Megjithatë, ne i kemi tejkaluar ato gjithmonë dhe kemi lulëzuar, sepse një partneritet që është ndërtuar mbi baza të forta dhe i krijuar nga aspiratat e përbashkëta për të ardhmen, është një partneritet që është i paracaktuar të zgjasë përgjithmonë. Kur u takuam vitin e kaluar, shpresuam se ky do të ishte një vit ku do të ribashkoheshim nën qiejt e lirë të Evropës. Ne shpresonim se kontinenti ynë më në fund do të ishte në paqe. Fatkeqësisht, ende nuk është kështu. Ndaj, edhe pse sot është ditë feste, është edhe rikujtim i faktit se vlerat që na bashkojnë, janë vlerat që duhet të udhëheqin veprimet tona në tejkalimin e sfidave të ndërsjella. Këto janë vlera që ne duhet të vazhdojmë t’i ruajmë dhe mbrojmë kolektivisht. Për shkak se lufta për liri dhe të drejta të njeriut është larg përfundimit dhe kur vlerat demokratike janë në rrezik kritik, nevoja për unitet, partneritet dhe aleanca bëhet edhe më e madhe. I nderuar ambasador, diplomatë amerikanë, miq amerikanë, Shtetet e Bashkuara kanë qenë prej kohësh një fener frymëzimi për Republikën e Kosovës. Ne do të vazhdojmë gjithmonë të shikojmë drejtë Shteteve të Bashkuara. Unë them gjithmonë se ne në fakt jemi një zgjatim i vlerave amerikane. Pra, kur themi, Kosova është edhe shtëpia juaj, me të vërtetë shpresoj që ju ta ndjeni këtë fort çdo ditë që kalon. Për ne, Shtetet e Bashkuara nuk janë thjesht një aleat – por, përkundrazi – një udhërrëfyes… një udhërrëfyes dhe një udhëheqëse në përpjekjet tona globale për ta mbrojtur lirinë, demokracinë dhe drejtësinë për të gjithë. Mbështetja që SHBA-ja ka dhënë historikisht për ne, jo vetëm ka qenë e një rëndësie vendimtare, por ka qenë një dimension ekzistencial. Kam besim se shumë kapituj bashkëpunimi mbeten për t’u shpalosur mes dy vendeve tona, por është shtylla kurrizore e kësaj aleance ajo që na bën të jemi të sigurt se rruga përpara është mu ajo e duhura. SHBA-të janë sinonim i çlirimit dhe i lirisë sonë. Për shkak të vendosmërisë suaj, lufta jonë çlirimtare arriti kulmin me të drejtën për të zgjedhur vetë rrugën tonë. Me dashamirësi na ofruat ndihmë në rindërtimin e shtëpive tona, shtëpive tona të shkatërruara dhe të përdhosura nga zjarret e luftës. Ju dhatë mbështetje të palëkundur në ngritjen e themeleve të institucioneve tona, që nga forcat tona policore deri te gjykata jonë kushtetuese dhe në formulimin e ligjeve që mbështesin qetësinë e kombit tonë. Themelet e Republikës sonë të re qëndrojnë si një dëshmi e përkushtimit tuaj të pakushtëzuar për të ruajtur paqen e shtetit tonë sovran. Parimet që mishërojnë SHBA-në përshkojnë çdo aspekt të Deklaratës sonë të Pavarësisë. Ato krijuan gurthemelin e argumenteve tona përpara Gjykatës Ndërkombëtare të Drejtësisë. Ishin SHBA-të ato që avokuan vazhdimisht për ne në forume dhe takime të ndryshme, qoftë për të forcuar shtetësinë tonë, për të siguruar njohje ose për të mbrojtur të drejtën tonë të pamohueshme për sovranitet. Ju keni qëndruar përkrah nesh në ndërtimin e ushtrisë sonë, duke siguruar që rritja e saj t’i përmbahet standardeve më të larta të NATO-s dhe gatishmërinë e saj për të kontribuar në paqen dhe stabilitetin global, një rol që tashmë e përmbush. Asgjë nuk e tregon më mirë se simbolika e uniformave të para që i kishin veshur pjesëtarët tanë të ushtrisë, menjëherë pas krijimit të FSK-së: ato ishin uniforma të Shteteve të Bashkuara, uniforma që më parë i mbanin ushtarët amerikanë. Një ushtri që na erdhi në ndihmë dhe u shndërrua në një shpëtimtar. Shpëtimtare e jetës sonë dhe mbrojtëse e vlerave të lirisë dhe demokracisë. Pra, të dashur miq, le t’i kujtojmë të gjitha këto, dhe shumë më tepër, sa herë që dikush mendon se ka sfida për këtë partneritet. Le ta përkujtojmë se është detyrë e të gjithë ne të sigurohemi që ta mbrojmë dhe ushqejmë këtë aleancë, pasi është kjo aleancë që mban kaq të forta themelet e shtetësisë, sovranitetit dhe integritetit tonë territorial. Le të kujtojmë se fuqia jonë më e madhe qëndron pikërisht në partneritetet që ndërtohen në vlera të përbashkëta, por edhe në vizionin tonë të përbashkët për të ardhmen. Nuk është koha për dyshime apo pyetje, e lëre më për mosmarrëveshje. Në vend të kësaj, është koha për vlerësim, mirënjohje dhe përkushtim për të qenë aty për njëri-tjetrin