Presidentja Osmani u prit në takim nga kryeministri i Kroacisë, Andrej Plenković
Presidentja e Republikës së Kosovës, Vjosa Osmani në kuadër të vizitës dy ditore zyrtare në Kroaci, është takuar me kryeministrin e Kroacisë, Andrej Plenković. Në raport me zhvillimet e fundit në Kosovë, Presidentja Osmani ka theksuar se më 24 shtator, në Banjskë, Serbia ka kryer sulm terrorist dhe akt agresioni ndaj Kosovës me qëllim të aneksimit të veriut të Kosovës dhe destabilizimit të tërë rajonit. Prandaj, në këtë kontekst, Presidentja Osmani ka potencuar rëndësinë e mbajtjes së Serbisë përgjegjëse për aktin e saj të agresionit kundër Republikës së Kosovës. Presidentja Osmani ka theksuar se në mënyrë që paqja të jetë e mundur në rajon, Serbia duhet t’i tërheq trupat ushtarake nga kufiri me Kosovën, ngase përbëjnë rrezik për paqen dhe stabilitetin. Për më tepër, ajo ka diskutuar me kryeministrin kroat edhe për provat e mbledhura nga policia e Kosovës që e lidhin drejtpërdrejt Serbinë me këtë sulm si dhe për bashkëpunimin e institucioneve të sigurisë me aleatët tanë në mënyrë që të parandalohet agjenda destabilizuese e Serbisë. Në këtë takim, ndër të tjera, Presidentja Osmani ka falënderuar kryeministrin Plenković për kontributin e ushtarëve kroatë në misionin e KFOR-it në Kosovë dhe bashkëpunimin bilateral ne fushën e mbrojtjes mes Kosovës dhe Kroacisë teksa kanë diskutuar për mundësitë e thellimit të bashkëpunimit në këtë fushë. Presidentja Osmani ka theksuar se Kosova ka prioritet shtetëror anëtarësimin në NATO edhe për shkak të sfidave të sigurisë me të cilat ballafaqohet rajoni ynë, ndërkaq potencoi edhe rëndësinë e avancimit me anëtarësimin e vendit në Këshillin e Evropës e në Bashkimin Evropian si dhe organizma të tjerë ndërkombëtar.
Pritja e Presidentes Osmani me nderime të larta shtetërore nga Presidenti i Kroacisë, Zoran Milanović
Presidentja Osmani u prit në takim nga presidenti i Kroacisë, Zoran Milanović
Presidentja e Republikës së Kosovës, Vjosa Osmani ka filluar vizitën dy ditore zyrtare në Kroaci, me ç`rast është pritur me nderimet më të larta shtetërore nga Presidenti i Kroacisë, Zoran Milanović. Në takim me Presidentin Milanović, Presidentja Osmani ka falënderuar Kroacinë për mbështetjen ndaj Kosovës në të gjitha fazat e shtetndërtimit. Presidentja Osmani theksoi se Kroacia është mike dhe aleate e Kosovës në rajon dhe në strukturat euroatlantike, ndërkohë që të dy shtetet kanë marrëdhënie të shkëlqyeshme. Në këtë funksion, sipas Presidentes Osmani, komuniteti shqiptar në Kroaci dhe ai kroat në Kosovë, janë urë e fuqishme lidhëse ndërmjet të dy shteteve. Më tej, Presidentja Osmani e ka njoftuar homologun Milanović mbi sulmin terrorist dhe aktin e agresionit të Serbisë kundër Kosovës, koordinimin me aleatët dhe prezencën ndërkombëtare të sigurisë në Kosovë, teksa ka diskutuar edhe për thellimin e bashkëpunimit me qëllim të tejkalimit të sfidave të sigurisë. Sipas Presidentes Osmani, populli dhe institucionet e Republikës së Kosovës janë të përkushtuara për paqe, stabilitet dhe siguri në vend dhe rajon. Presidentja Osmani ritheksoi gjithashtu synimin e Kosovës për anëtarësim në strukturat euroatlantike, ndaj mbështetjen nga Kroacia e vlerësoi si të rëndësishme në përmbylljen e suksesshme të të gjitha këtyre proceseve integruese. Në këtë takim, Presidentja Osmani dhe Presidenti Milanović, ndër të tjera, diskutuan dhe shprehën gatishmëri për ta rritur bashkëpunimin në fushën e politikës së jashtme, mbrojtjes, ekonomisë, si dhe në sfera të tjera të interesit të dyanshëm.
Presidentja Osmani ka udhëtuar për vizitë zyrtare në Kroaci
Presidentja e Republikës së Kosovës Vjosa Osmani, me ftesë të presidentit Zoran Milanović ka udhëtuar për vizitë zyrtare në Kroaci ku fokus i diskutimeve do të jetë thellimi i mëtejmë i raporteve bilaterale dhe zhvillimet e fundit në vend dhe rajon. Në agjendë të vizitës së Presidentes Osmani në shtetin kroat është edhe takimi me kryeministrin Andrej Plenković, si dhe kryetarin e Parlamentit kroat, Gordan Jandroković. Në kuadër të kësaj vizite zyrtare, Presidentja Osmani do të ketë vizitë edhe në komunën e Rijekës, ku ndër të tjera, do të takohet me komunitetin shqiptar në këtë komunë.
Presidentja Osmani takoi komandantin e Komandës së Forcave të Përbashkëta Aleate të NATO-s, Admiralin Stuart B. Munsch
Presidentja e Republikës së Kosovës, Vjosa Osmani, ka pritur sot në një takim Admiralin Stuart B. Munsch, komandant i Komandës së Forcave të Përbashkëta Aleate të NATO-s në Napoli. Ajo e falënderoi atë për mbështetjen e vazhdueshme të NATO-s në ruajtjen e stabilitetit dhe paqes në Kosovë dhe rajon, pas aktit të agresionit dhe sulmit terrorist të Serbisë ndaj Kosovës më 24 shtator. Presidentja Osmani theksoi nevojën e marrjes së masave konkrete kundër Serbisë pas aktit të agresionit dhe sulmit terrorist nga grupet paramilitare dhe kriminale të udhëhequra në terren nga Milan Radoičić dhe politikisht nga Aleksandar Vučić. Ajo nënvizoi se Serbia duhet t’i tërheq trupat e saj ushtarake nga kufiri me Kosovën pasi që ato përbëjnë rrezik për paqen dhe stabilitetin në rajon. Ajo vlerësoi angazhimin e shtuar të KFOR-it dhe NATO-s, në rritjen e sigurisë përgjatë kufirit Kosovë-Serbi dhe e konsideroi atë si veprim të nevojshëm për ta parandaluar përsëritjen e aktit të ndodhur më 24 shtator. Në takim, u theksua rëndësia e bashkëpunimit të ngushtë në mes institucioneve të sigurisë së Kosovës dhe atyre të NATO-s, në ballafaqimin me sfidat e sigurisë në vend dhe rajon.
Presidentja: Shprehim solidaritetin tonë të plotë me Presidentin Isaac Herzog, popullin dhe shtetin e Izraelit në këto orë të errëta
Presidentja e Republikës së Kosovës, Vjosa Osmani ka reaguar pas sulmit terrorist në Izrael. “Të tmerruar nga sulmet terroriste dhe vrasjet e civilëve të pafajshëm në Izrael. Shprehim solidaritetin tonë të plotë me Presidentin Isaac Herzog, popullin dhe shtetin e Izraelit në këto orë të errëta. Mendimet tona janë me familjet e viktimave”, ka shkruar Presidentja Osmani.
Presidentja Osmani falënderon Spanjën për mikpritjen dhe organizimin e suksesshëm të Samitit të Komunitetit Politik Evropian në Granadë
Presidentja e Republikës së Kosovës, Vjosa Osmani, me ftesë të Presidentit të Këshillit të Bashkimi Evropian, Charles Michel dhe Kryeministrit të Spanjës, Pedro Sanchez, ka përfaqësuar Kosovën në samitin e tretë të Komunitetit Politik Evropian (EPC). Presidentja Osmani ka falënderuar Spanjën për mikpritjen dhe organizimin e suksesshëm të Samitit të Komunitetit Politik Evropian në Granadë. “Falënderoj Spanjën për mikpritjen dhe organizimin e suksesshëm të Samitit të Komunitetit Politik Evropian në Granadë, duke bashkuar liderët evropianë në frymën e barazisë, si parim themelor i kësaj platforme. Mirënjohës Mbretit Felipe VI dhe Mbretëreshës Letizia, Kryeministrit Sanchez dhe zonjës Gómez Fernández për pritjen e ngrohtë në Alhambrën madhështore”, ka shkruar Presidentja Osmani.
Presidentja Osmani takoi kryeministren e Estonisë, Kaja Kallas
Presidentja e Republikës së Kosovës, Vjosa Osmani, e cila po e përfaqëson Kosovën në samitin e tretë të Komunitetit Politik Evropian (EPC), në Granada të Spanjës, në margjinat e tij është takuar me kryeministren e Estonisë, Kaja Kallas. “Në takimin tim dje në Granada me kryeministren Kaja Kallas, e informova për situatën e sigurisë në Kosovë dhe rëndësinë e mbajtjes së Serbisë përgjegjëse. Falënderoj Estoninë për mbështetjen e vazhdueshme ndaj vendit tonë dhe për paqen dhe sigurinë në rajonin tone”, ka shkruar Presidentja Osmani.
Konferencë për media ndërkombëtare e Presidentes Osmani pas samitit të tretë të liderëve të Komunitetit Politik Evropian në Granada, Spanjë
Presidentja Osmani takoi kryeministrin e Kroacisë, Andrej Plenkoviq
Presidentja e Republikës së Kosovës, Vjosa Osmani, e cila po e përfaqëson Kosovën në samitin e tretë të Komunitetit Politik Evropian (EPC), në Granada të Spanjës, në margjinat e tij është takuar me kryeministrin e Kroacisë, Andrej Plenkoviq. “Së bashku me kryeministrin e Kroacisë Andrej Plenkoviq diskutuam zhvillimet e fundit të sigurisë në Kosovë. E informova për provat mbi aktin e agresionit të Serbisë. Ne e vlerësojmë mbështetjen e qëndrueshme të Kroacisë dhënë vendit tonë dhe paqes dhe prosperitetit në mbarë rajonin”, ka shkruar Presidentja Osmani.