Presidentja Osmani takoi Kancelarin Scholz: Diskutim i rëndësishëm lidhur me angazhimin tonë të përbashkët për integrimin euroatlantik të Kosovës
Presidentja e Republikës së Kosovës, Vjosa Osmani, e cila po qëndron në Mbretërinë e Bashkuar, ku po e përfaqëson Republikën e Kosovës në samitin e katërt të Komunitetit Politik Evropian (EPC), është takuar me Kancelarin e Gjermanisë, Olaf Scholz. Presidentja Osmani ka thënë se me Kancelarin Scholz kanë pasur diskutim të rëndësishëm në kuadër të Samitit të Liderëve të EPC-së, lidhur me angazhimin tonë të përbashkët për integrimin euroatlantik të Kosovës.
Deklarimi i Presidentes Vjosa Osmani para Samitit të Liderëve të Komunitetit Politik Evropian
Të nderuara media, Në vijim gjeni videon nga momenti i arritjes së Presidentes Osmani në Samitin e Liderëve të Komunitetit Politik Evropian në Mbretërinë e Bashkuar dhe deklarimin para mediave ndërkombëtare.
Presidentja Osmani takoi Presidentin e Finlandës, Alexander Stubb: Forcimi i partneritetit Kosovë-Finlandë dhe rritja e bashkëpunimit në dobi të qytetarëve tanë mbetet angazhimi ynë i përbashkët
Presidentja e Republikës së Kosovës, Vjosa Osmani, e cila po qëndron në Mbretërinë e Bashkuar, ku po e përfaqëson Republikën e Kosovës në samitin e katërt të Komunitetit Politik Evropian (EPC), është takuar me Presidentin e Finlandës, Alexander Stubb. Postimi i plotë i Presidentes Osmani: Takim përmbajtësor me Presidentin e Finlandës, Alexander Stubb, mbështetës i kamotshëm i Kosovës dhe i së ardhmes euroatlantike të vendit tonë. Forcimi i partneritetit Kosovë-Finlandë dhe rritja e bashkëpunimit në dobi të qytetarëve tanë mbetet angazhimi ynë i përbashkët.
Presidentja Osmani përfaqëson Republikën e Kosovës në samitin e liderëve të Komunitetit Politik Evropian në Mbretërinë e Bashkuar
Presidentja e Republikës së Kosovës, Vjosa Osmani, ka udhëtuar për në Mbretërinë e Bashkuar ku do ta përfaqësojë Republikën e Kosovës në samitin e katërt të Komunitetit Politik Evropian (EPC). Presidentja Osmani do t’i bashkohet 46 liderëve të tjerë të shteteve evropiane, institucioneve të BE-së, NATO-s, e organizatave të tjera ndërkombëtare, me qëllim të adresimit të çështjeve më urgjente për sigurinë dhe mirëqenien e qytetarëve anekënd Evropës. Presidentja Osmani do të marrë pjesë në dy sesionet plenare të EPC-së, si dhe në tryezën e rrumbullakët të liderëve me temë “Mbrojtja e demokracisë: luftimi i manipulimit të informacionit nga shtetet e huaja”. Në kuadër të Samitit, Presidentja Osmani do të zhvillojë takime bilaterale me liderë të tjerë evropianë si dhe do të marrë pjesë në pritjen e organizuar nga Mbreti Charles III dhe Kryeministri Keir Starmer. Gjatë takimeve bilaterale, Presidentja Osmani do të diskutojë rëndësinë e forcimit të aleancave të Republikës sonë, si dhe thellimit të bashkëpunimit me shtetet partnere me fokus të veçantë në fushën e sigurisë.
Presidentja: Nga Kosova në Paris, flamuri ynë ngritet lart!
Presidentja e Republikës së Kosovës, Vjosa Osmani në një ceremoni të veçantë i ka dorëzuar flamurin ekipit olimpik të Kosovës, i cili do të marrë pjesë në Lojërat Olimpike në Paris. “Nga Kosova në Paris, flamuri ynë ngritet lart! Atletët tanë nisin udhëtimin e tyre për në Lojërat Olimpike #Paris2024 me krenari dhe me mbështetjen e të gjithë Kosovës pas tyre!”, ka shkruar Presidentja Osmani.
Ceremonia e dorëzimit të flamurit ekipit olimpik të Kosovës që do të marrë pjesë në Lojërat Olimpike Paris 2024
Të nderuar të pranishëm, I nderuar kryeministër, I nderuar president i Komitetit Olimpik, Ministër, zëvendësministre, Të nderuar ambasadorë, Të nderuar kampionë, trajnerë, sportistë dhe përfaqësues të Federatave, Ndërsa jemi në prag të Lojërave Olimpike “Paris 2024”, jemi bërë të gjithë bashkë, ashtu siç është edhe sentimenti i popullit tonë në raport me kampionët tanë, për t`ia dorëzuar garuesve tanë flamurin e Republikës së Kosovës, si bekim për sukses në Paris. Lojërat Olimpike i kapërcejnë kufijtë e sportit. Ato mishërojnë parimet e unitetit, të paqes dhe respektit të ndërsjellë. Në një botë sikur kjo e sotmja, e cila shpesh ndahet nga dallimet, Lojërat Olimpike nxjerrin në pah të përbashkëtat tona, respektivisht aftësinë tonë për t’u bashkuar nëpërmjet konkurrencës miqësore dhe respektit të ndërsjellë. Për Kosovën, pjesëmarrja jonë në Lojëra Olimpike paraqet kulmin e një pune të palodhur shumëvjeçare, përkushtimin dhe vendosmërinë e pashoq, nganjëherë edhe në rrethana të jashtëzakonshme të sportistëve tanë dhe trajnerëve të tyre. Është një dëshmi e qëndrueshmërisë së popullit tonë dhe aftësisë për t’u ngritur mbi sfidat e për të shkëlqyer në skenën botërore. Lojërat Olimpike gjithnjë kanë qenë festë për Kosovën, qëkur e arta jonë, Majlinda Kelmendi, na dha një ndjenjë krenarie që vështirë se mund të përshkruhet me fjalë, dhe jam e bindur që edhe Parisi do të jetë i tillë, ku do të përfaqësohemi nga Distria, Nora, Loriana, Laura, Akili, Donjeta, Gresa, Hana dhe Adelli. Në zemër të Francës, pra në Paris, atletë nga e gjithë bota do të mblidhen për të garuar në një nivel të lartë, duke përfaqësuar vendet e tyre me krenari e duke shfaqur talentin e tyre para botës. Natyrisht që garuesit tanë vazhdojnë të jenë mishërim i shpresave dhe i ëndrrave tona. Përkushtimi, disiplina dhe pasioni juaj na frymëzojnë të gjithëve. Prandaj, ju mbani me vete përderisa niseni për Paris në ditët që vijnë, mbështetjen dhe admirimin e secilit qytetar të Republikës së Kosovës. E ndërsa dilni në skenën globale, mbani në mend se në asnjë moment nuk do të jeni vetëm. Siç e kam thënë edhe herën e kaluar, zemra e secilit qytetar do të rrahë bashkë me tuajën. Një shtet i tërë qëndron me ju, duke ju brohoritur me krenari dhe me besim të plotë në aftësinë dhe punët tuaja. Ndërsa sot ndërsa ju dorëzoj flamurin e Republikës së Kosovës, jam e mbushur me krenari dhe shpresëplotë! Dhe, shumë e lumtur që këtë vit, po ashtu për herë të parë, Kosova do të përfaqësohet edhe në Lojërat Paraolimpike. Do të jemi dëshmitarë të një ngjarjeje që ndër të tjera nënvizon përparimin e jashtëzakonshëm që kemi bërë si shtet në promovimin e gjithëpërfshirjes së sportistëve tanë. Garuesit të cilët na përfaqësojnë në Lojërat Olimpike 2024 e nderojnë shtetin e tyre. Guximi, vendosmëria dhe pasioni i tyre na kujton potencialin e pakufishëm që ekziston brenda secilit. Prandaj, ju uroj suksese në gara, duke e ditur tashmë se ju veçse keni lënë gjurmë të pashlyeshme për sportin, për shtetin dhe për historinë e vendit tonë! Suksesi juaj në Lojëra Olimpike nuk do të jetë vetëm një arritje personale, por një fitore për mbarë Kosovën. Do t’i tregojë botës mbarë forcën, qëndrueshmërinë dhe talentin, të cilin e posedon rinia jonë e jashtëzakonshme. Përpjekjet tuaja po ashtu, do të hapin rrugën për brezat e ardhshëm të atletëve, duke frymëzuar ata të projektojnë ëndrra të mëdha dhe t`i ndjekin qëllimet e tyre me vendosmëri. Mos harroni, flamuri i Kosovës simbolizon shpirtin, forcën dhe unitetin e shtetit tonë të ndërtuar mbi gjakun e dëshmorëve. Prandaj, garoni me nder, jepni më të mirën tuaj dhe mbani mend se çdo hap që hidhni në skenën globale është dëshmi e përkushtimit dhe e këmbënguljes së një populli të tërë. Qoftë pjesëmarrja e Kosovës në Lojërat Olimpike të Parisit një dëshmi e këtij shpirti të qëndrueshëm të shtetit tonë dhe një shpresë për një të ardhme edhe më të ndritur! Të nderuar sportistë, garoni me zemër e më nder dhe vazhdoni të na bëni krenarë! Suksese, e u kthefshi faqebardhë nga Parisi! Faleminderit!
Presidentja Vjosa Osmani priti në takim ambasadorin e Mbretërisë së Bashkuar, Jonathan Hargreaves
Presidentja e Republikës së Kosovës, Vjosa Osmani, ka pritur sot në takim ambasadorin e Mbretërisë së Bashkuar në Kosovë, Jonathan Hargreaves, me të cilin ka diskutuar për përgatitjet për Samitin e Komunitetit Politik Evropian, si dhe për bashkëpunimin bilateral midis Kosovës dhe Mbretërisë së Bashkuar. Presidentja Osmani, sikurse në samitet e kaluara, do ta përfaqësojë Republikën e Kosovës në Samitin e Komunitetit Politik Evropian. Presidentja dhe ambasadori diskutuan për temat që do të trajtohen në këtë Samit, përfshirë nevojën e përpjekjeve kolektive për ta mbrojtur demokracinë, si dhe për kontributin e Kosovës në këto tema. Samiti i liderëve të Komunitetit Politik Evropian do të mbahet në Blenheim Palace në Mbretërinë e Bashkuar, me pjesëmarrje të rreth 50 liderëve dhe përfaqësuesve evropianë.
Presidentja Osmani takoi Ministren e Jashtme gjermane Annalena Baerbock
Presidentja e Republikës së Kosovës, Vjosa Osmani në margjinat e Samitit të NATO-s në Washington D.C., është takuar me Ministren e Jashtme gjermane Annalena Baerbock, me ç’rast i ka shprehur mirënjohje për mbështetjen e saj të palëkundur. Presidentja Osmani ka thënë se Gjermania ka qenë një përkrahëse e palëkundur e të ardhmes së qëndrueshme dhe të pakthyeshme euroatlantike të Kosovës.
Presidentja Osmani takoi Sekretarin e ri të Jashtëm britanik, David Lammy
Presidentja e Republikës së Kosovës, Vjosa Osmani, në margjinat e Samitit të NATO-s në Washington D.C., ka takuar Sekretarin e ri të Jashtëm britanik, David Lammy. Presidentja Osmani e ka përgëzuar atë për emërimin e tij dhe ka thënë se Mbretëria e Bashkuar mbetet një aleat i palëkundur i Kosovës. Presidentja Osmani ka shtuar se pret që të bashkëpunojnë ngushtë për të forcuar më tej lidhjet mes dy shteteve.
Presidentja Osmani takoi Kryeministren e Estonisë, Kaja Kallas dhe Kryeministrin e Luksemburgut, Luc Frieden
Presidentja e Republikës së Kosovës, Vjosa Osmani ka takuar Kryeministren e Estonisë, Kaja Kallas dhe Kryeministrin e Luksemburgut, Luc Frieden. “Gjatë Samitit të NATO-s, me Kryeministren e Estonisë, Kaja Kallas dhe Kryeministrin e Luksemburgut, Luc Frieden, mbi rëndësinë e bashkëpunimit dhe mbrojtjes së vlerave të cilat qëndrojnë në themel të Aleancës Veri-Atlantike”, ka shkruar Presidentja Osmani.