U.D. Presidentja Haxhiu mori pjesë në ceremoninë e rivarrimit të Sinan Dautit
Ushtruesja e Detyrës së Presidentes, Albulena Haxhiu, mori pjesë sot në ceremoninë e rivarrimit të Sinan Dautit. Me këtë rast, ajo tha se sot jemi mbledhur këtu në Prekazin e Epërm, në një ditë të rëndë dhimbjeje dhe kujtimi, për t’i dhënë më në fund prehjen Sinanit 9 vjeçar, për trupin e të cilit nuk dinim asgjë për 27 vite. U.D. Presidentja Haxhiu, më tej tha se Sinani më në fund po prehet në paqe në një vend që do ta vizitojnë jo vetëm të afërmit e tij, familja, por të gjithë shqiptarët nga të gjitha anët. “Sinani ishte vetëm 9 vjeç, një fëmijë që duhej të rritej mes lojës, shkollës dhe ëndrrave për të ardhmen. Por, jeta e tij u ndërpre në mënyrë tragjike në ditët më të errëta të luftës në Kosovë. Më 12 prill 1999, në lagjen Bregaj të Prekazit, gjatë sulmeve dhe granatimeve të forcave serbe, Sinani u plagos rëndë. Pas largimit me forcë të familjes së tij nga fshati, ai u dërgua fillimisht në spitalin e Skenderajt, e më pas edhe në spitalin e Mitrovicës ku edhe ndërroi jetë. Sikur të mos mjaftonte vrasja e tij edhe trupi i tij u zhduk”, ka theksuar U.D. Presidentja Haxhiu. Ajo më tej shtoi se për 27 vite me radhë, familja e tij jetoi mes dhimbjes duke pritur të dijë për trupin e tij, duke shtuar tutje se tani, me identifikimin e mbetjeve mortore në varrezat e Suhodollit në Mitrovicë, kjo pritje e gjatë mori fund dhe Sinani është kthyer në tokën e tij të lindjes. “Sot nuk jemi këtu vetëm për një rivarrim. Jemi këtu për të nderuar kujtimin e tij dhe për të kujtuar 1392 fëmijët e vrarë gjatë luftës në Kosovë, si dhe të gjithë civilët e pafajshëm që humbën jetën në atë periudhë të rëndë. Këto dëshmi janë të dhimbshme që mbeten pjesë e historisë sonë dhe e kujtesës sonë kolektive. Kjo ngjarje na kujton çmimin e madh të lirisë që populli ynë ka paguar. Kjo ngjarje na obligon të mos harrojmë kurrë historinë tonë”, ka theksuar U.D. Presidentja Haxhiu. Në fund, U.D. Presidentja tha se kujtimi i Sinanit mbetet një thirrje e përhershme për përgjegjësi, por edhe për drejtësi, një thirrje që asnjë familje tjetër të mos kalojë një dhimbje të tillë.
U.D. Presidentja Haxhiu bëri homazhe dhe mbajti fjalë rasti në përvjetorin e masakrës në Dyz të Podujevës
Ushtruesja e Detyrës së Presidentes së Republikës së Kosovës, Albulena Haxhiu, bëri sot homazhe në Dyz dhe mbajti fjalë rasti në shënim të përvjetorit të masakrës së kryer nga forcat serbe ndaj civilëve shqiptarë gjatë luftës në Kosovë. Në fjalën e saj, U.D. Presidentja Haxhiu tha se 27 vjet më parë, në mes të prillit, banorët e Llapit dhe Gollakut, në përpjekje për të gjetur shpëtim, u përballën me dhunën brutale të forcave okupatore serbe. “Aty nuk kishte ushtarë. Aty kishte burra, gra, fëmijë, pleq e njerëz të zakonshëm që kërkonin vetëm të jetonin në paqe. Aq kërkonin, të jetonin në paqe e të jetonin me dinjitet. Por, ata u përballën me një dhunë të organizuar, të planifikuar, u përballën me një dhunë çnjerëzore”, theksoi U.D. Presidentja Haxhiu. Ajo kujtoi se mbi 200 civilë shqiptarë të paarmatosur u masakruan në këtë akt gjenocidal të Serbisë dhe se kujtimi për ta mbetet detyrim i përhershëm. “Sot, jemi këtu për ta përkujtuar këtë ngjarje tragjike. Jemi këtu për të mos harruar kurrë. Kujtimi është detyrë morale, është detyrë njerëzore, kujtimi është detyrë edhe kombëtare”, u shpreh U.D. Presidentja Haxhiu. Duke folur për mungesën e drejtësisë, ajo tha se e vërteta për këto krime dihet dhe se përgjegjësit duhet të dalin para drejtësisë. “Si institucione të Republikës së Kosovës, kemi krijuar bazën ligjore për ndjekjen dhe dënimin e kriminelëve të luftës edhe në mungesë. Prandaj, sot nga ky vend, u bëj thirrje institucioneve të drejtësisë që të angazhohen me gjithë kapacitetet e tyre, që të ngrenë aktakuzat dhe gjykimet ndaj përgjegjësve për këto krime të rënda. Drejtësia nuk duhet të mungojë”, tha U.D. Presidentja Haxhiu. Në fund, ajo theksoi se nderimi më i madh për martirët dhe dëshmorët është puna e përditshme për drejtësi, zhvillim, siguri dhe prosperitet për qytetarët e Republikës së Kosovës.
U.D. Presidentja Haxhiu në Ditën e Dëshmorëve të Prishtinës bëri homazhe te shtatorja e heroit Zahir Pajaziti dhe tek varrezat e Dëshmorëve në Velani
Ushtruesja e Detyrës së Presidentes së Republikës së Kosovës, Albulena Haxhiu, ka bërë homazhe te shtatorja e heroit Zahir Pajaziti, në Ditën e Dëshmorëve të Komunës së Prishtinës. U.D. Presidentja Haxhiu ka thënë se në Ditën e Dëshmorëve të Prishtinës, me respekt e vlerësojmë jetën dhe veprën e heroit tonë Zahir Pajazitit, por edhe të gjithë bashkëluftëtarëve të tij. “Zahir Pajaziti me shokë ishin ndër të parët që i dhanë kuptim rezistencës së organizuar kundër regjimit të asaj kohe, madje shërbyen edhe si shembull i guximit dhe vendosmërisë në rrethana tejet të vështira për vendin tonë”, ka theksuar U.D. Presidentja Haxhiu. Sipas U.D. Presidentes Haxhiu, kontributi i tyre nuk ishte vetëm kontribut gueril, ushtarak apo profesional, por ishte edhe kontribut moral, për faktin se ata ngritën lart shpresën që vendi ynë mund të ketë liri, mund të çlirohet dhe mund të jetë i pavarur. Ajo më tej tha se ata shërbyen edhe si frymëzim që shumë të rinj e të reja t’i bashkohen radhëve të Ushtrisë Çlirimtare të Kosovës. “Sot, nderojmë jetën dhe veprën e heroit tonë Zahir Pajaziti, të gjithë dëshmorëve të Prishtinës, por edhe të gjithë dëshmorëve të kombit. Institucionet e Republikës së Kosovës, sikurse edhe shoqëria jonë, asnjëherë nuk duhet ta harrojnë kontributin e tyre, sepse në fakt ishte kontributi i tyre që ne sot jetojmë në një shtet të lirë dhe të pavarur”, ka thënë U.D. Presidentja Haxhiu. Më pas, Ushtruesja e Detyrës së Presidentes së Republikës së Kosovës, Albulena Haxhiu, ka bërë homazhe tek varrezat e Dëshmorëve në Velani, në Ditën e Dëshmorëve të Komunës së Prishtinës. U.D. Presidentja Haxhiu ka thënë se jemi këtu, në varrezat e Dëshmorëve të Prishtinës, në ditën që i dedikohet kontributit dhe veprës sublime të Dëshmorëve të Prishtinës. “Si Ushtruese e Detyrës së Presidentes, e lartësoj veprën e Dëshmorëve tanë. Kontributi i tyre ndihmoi që Kosova të çlirohet, të jetë e lirë, dhe e pavarur”, ka theksuar U.D. Presidentja Haxhiu. Ajo më tej ka thënë se si institucione të Republikës së Kosovës, e kemi për obligim që asnjëherë të mos e harrojmë veprën e atyre që kanë vepruar në rrethana kur gjithçka ka qenë më e vështirë. “Ata dhanë gjithçka nga vetja e tyre, që sot ne ta kemi një shtet të lirë, një shtet të pavarur. E ne si institucione të Republikës së Kosovës obligohemi që të angazhohemi edhe më shumë që Kosova, shteti ynë, të jetë një vend ku të gjithë trajtohen në mënyrë të dinjitetshme, ku ka barazi, ku ka drejtësi dhe ku ka zhvillim ekonomik”, ka thënë U.D. Presidentja Haxhiu.
U.D. Presidentja Haxhiu ka dekretuar shpalljen e 6 ligjeve të rëndësishme, të miratuara nga Kuvendi i Republikës së Kosovës
Ushtruesja e Detyrës së Presidentes, Albulena Haxhiu, ka dekretuar shpalljen e 6 ligjeve të rëndësishme, të miratuara nga Kuvendi i Republikës së Kosovës, të cilat prekin drejtpërdrejt disa prej sektorëve kyç të zhvillimit të vendit. “Këto ligje hapin rrugë për investime në energji të pastër, në rritjen e efiçencës në ndërtesat publike, në përmirësimin e infrastrukturës rrugore dhe në trajtimin e ujërave të zeza. Po ashtu, ato forcojnë bashkëpunimin rajonal dhe krijojnë më shumë mundësi për të rinjtë tanë në qasjen në arsimin e lartë në Ballkanin Perëndimor”, ka theksuar u.d. Presidentja Haxhiu. Ajo më tej ka thënë se përmes këtyre hapave, Republika e Kosovës vazhdon të thellojë partneritetin me institucionet financiare ndërkombëtare dhe me Bashkimin Evropian, duke e orientuar zhvillimin drejt qëndrueshmërisë dhe integrimit evropian. Ligjet e dekretuara nga u.d. Presidentja Haxhiu janë: Ligji Nr. 10/L-011 për Ratifikimin e Marrëveshjes së Kredisë mes Republikës së Kosovës dhe Bankës Evropiane për Investime për Projektligjin Energjia Diellore Fotovolkanike në KEK – Porta Globale. Ligji Nr. 10/L-013 për Ratifikimin e Marrëveshjes së Kredisë – Projekti i Rrugës me Shpejtësi të Lartë Prishtinë-Mitrovicë (kredi shtesë) ndërmjet Fondit Saudit për Zhvillim dhe Republikës së Kosovës. Ligji Nr. 10/L-010 për Ratifikimin e “Amandamentit nr. 2 të Marrëveshjes Financiare ndërmjet Republikës së Kosovës dhe Bashkimit Evropian për programin IPA 2017, Pjesa e Parë”. Ligji Nr. 10/L-008 për Ratifikimin e Marrëveshjes për Qasje në Arsimin e Lartë dhe Pranim për Studime në Ballkanin Perëndimor. Ligji Nr. 10/L-012 për Ratifikimin e Marrëveshjes së Kredisë ndërmjet Republikës së Kosovës, e përfaqësuar nga Ministria e Financave, Punës dhe Transfereve dhe Bankës Evropiane për Rindërtim dhe Zhvillim (BERZH) për Projektin e Efiçencës së Energjisë në Ndërtesa Publike. Ligji Nr. 10/L-014 për Ratifikimin e Marrëveshjes së Kredisë në mes të Republikës së Kosovës dhe Bankës Evropiane për Rindërtim dhe Zhvillim për Projektin “Impianti për Trajtimin e Ujërave të Zeza në Podujevë”.
U.D. Presidentja Haxhiu bëri homazhe në Poklek, Çikatovë të Vjetër dhe në Krajkovë
Ushtruesja e Detyrës së Presidentes së Republikës së Kosovës, Albulena Haxhiu, së bashku me zëvendësministrin e Administrimit të Pushtetit Lokal, Arton Konushevci dhe me përfaqësues të tjerë, ka bërë homazhe sot në Poklek, në Çikatovë të Vjetër dhe në Krajkovë. U.D. Presidentja Haxhiu ka thënë se Masakra në Poklek është dëshmi e gjenocidit të Serbisë në Kosovë. “Para 27 viteve, përkatësisht më 17 prill të vitit 1999, familjet Muqolli, Elshani, Caraku dhe Hoxha u ndaluan nga forcat serbe, u detyruan që të kthehen dhunshëm në shtëpitë e tyre dhe më pas u sulmuan me bomba dore dhe me armë automatike. Por kjo nuk i mjaftoi Serbisë, nuk i mjaftoi kriminelëve serbë, trupat e tyre u dogjën disa herë, me qëllim që të fshehin gjurmët e gjenocidit të tyre. Shtëpia e familjes Elshani sot përmban dëshmi të këtij gjenocidi dhe të kësaj masakre. Andaj kjo masakër nuk do të harrohet kurrë nga asnjë gjeneratë dhe do të mbetet gjithmonë në kujtesën tonë kolektive”. Nga Pokleku, u.d. Presidentja Haxhiu, u ka bërë thirrje institucioneve të drejtësisë që pa vonesa, t’i adresojnë krimet që Serbia i ka bërë në Kosovë. “Kemi kërkuar nga institucionet e drejtësisë që të merren me rastet e krimeve të luftës. Prandaj, edhe nga këtu u bëj thirrje që institucionet e drejtësisë, pa vonesa, të adresojnë krimet që Serbia i ka bërë në Kosovë, krimet kundër njerëzimit, krimet e luftës dhe gjenocidin e Serbisë në Kosovë. Tani e kemi edhe gjykimin në mungesë, sepse ju e dini që Serbia nuk i dorëzon kriminelët e luftës. Prandaj, edhe nga ky vend, nga këtu ku u vranë 53 civilë të paarmatosur, të pafajshëm, në mesin e tyre 23 ishin fëmijë nga mosha 6 muaj deri në 14 vjeç, bëjë thirrje që të gjitha institucionet, në këtë rast edhe policia edhe prokuroria të veprojnë pa vonesa. Ne kemi thënë që çfarëdo kërkese që institucionet e drejtësisë e kanë në raport me ekzekutivin, Kuvendin apo cilindo institucion tjetër, do ta adresojmë pa vonesa”, ka theksuar u.d. Presidentja. U.D. Presidentja Haxhiu, gjatë ditës së sotme ka bërë homazhe edhe në Çikatovë të Vjetër. “Në Çikatovë të Vjetër u vranë 24 civilë të paarmatosur. Pasi që u vranë, trupat e tyre u dërguan në Rashkë të Serbisë, me qëllim që të fshihet krimi i bërë në masakrën e Çikatovës së Vjetër. Institucionet e drejtësisë, është shumë e rëndësishme që të adresojnë, pa vonesa, krimet e luftës, krimet kundër njerëzimit dhe gjenocidin që Serbia e ka kryer në Kosovë”, ka thënë u.d. Presidentja Haxhiu. Duke folur për shtimin e kapaciteteve si në Policinë e Republikës së Kosovës, edhe në Prokurorinë Speciale, u.d Presidentja Haxhiu, ka thënë se kemi miratuar Institutin për Dokumentimin e Krimeve të Luftës, me qëllim që të dokumentohen të gjitha masakrat, të gjitha vrasjet, të gjitha dhunimet, të gjitha shtëpitë e djegura, qytetarët që janë dëbuar nga pronat e tyre, por edhe të gjitha krimet tjera që Serbia i ka bërë në Kosovë. “Instituti tashmë po e bën punën në këtë drejtim, në përputhje me përgjegjësitë që ka. Por, edhe duke pasur parasysh që Serbia është bërë strehë e kriminelëve të luftës dhe terroristëve që kryejnë sulme terroriste në kohë të paqes, ne kemi mundësuar ndryshimet në Kodin Penal, në Kodin e Procedurës për të mundësuar gjykimin në mungesë, me qëllim që kriminelët të dënohen dhe, kudo që ata zihen, të vijnë dhe të vuajnë dënimin në Republikën e Kosovës. Angazhohemi që t’i adresojmë të gjitha përgjegjësitë që kemi dhe natyrisht jemi pranë familjeve në këto momente të vështira, sepse edhe përkundër faktit që kanë kaluar 27 vite nga masakrat në Kosovë, dhimbja mbetet e madhe”, ka thënë U.D Presidentja Haxhiu . Më pas, u.d Presidentja Haxhiu ka bërë homazhe edhe në Krajkovë, tek varri i dëshmorit Sokol Elshani. “Dëshmori Sokol Elshani rrjedh nga një familje patriotike, atdhetare, që ka kontribuar gjithmonë në çështjen kombëtare dhe për Republikën e Kosovës. Angazhimin e tij e kishte nisur shumë herët. Madje, në demonstratat e vitit ’90, ai u sulmua rëndë dhe u plagos rëndë nga forcat serbe. Sot nderojmë jetën dhe veprën e tij. Republika e Kosovës, gjeneratat, rinia jonë, por edhe gjithë të tjerët, janë me fat që kanë dëshmorë që kanë kontribuar kaq shumë për vendin tonë, e që janë shembull se si duhet të nderohet atdheu”, ka theksuar u.d Presidentja. Sipas u.d Presidentes Haxhiu, më e rënda, kudo që ne shkojmë në përkujtim të përvjetorit të masakrave, është kërkesa për drejtësi, që rrjedh pikërisht nga familjarët, prandaj ne i bashkohemi kërkesës për drejtësi. “Jemi bashkë me familjarët në këto momente të vështira, sepse edhe përkundër faktit që kanë kaluar 27 vite nga kur janë kryer këto masakra, dhimbja është e madhe dhe natyrisht, që si institucione kemi për obligim që të punojmë pa ndalë në këtë drejtim”, ka thënë u.d Presidentja Haxhiu.
U.D. Presidentja e Republikës së Kosovës, Albulena Haxhiu, priti në takim Zëvendëskryeministrin dhe Ministrin e Punëve të Jashtme të Mbretërisë së Belgjikës, Maxime Prévot
Ushtruesja e Detyrës së Presidentes së Republikës së Kosovës, znj. Albulena Haxhiu, priti sot në takim Zëvendëskryeministrin dhe Ministrin e Punëve të Jashtme të Mbretërisë së Belgjikës, z. Maxime Prévot. U.D. Presidentja Haxhiu e falënderoi z. Prévot për mbështetjen e vazhdueshme dhe të palëkundur që Belgjika i ka dhënë Republikës së Kosovës ndër vite, si në periudhat vendimtare të historisë sonë, ashtu edhe në procesin e shtetndërtimit dhe konsolidimit ndërkombëtar të vendit. Në takim u vlerësuan marrëdhëniet e shkëlqyera ndërmjet Kosovës dhe Belgjikës, si dhe kontributi i rëndësishëm i mërgatës sonë në Belgjikë në forcimin e lidhjeve ndërmjet dy vendeve. Bashkëbiseduesit diskutuan për mundësitë e thellimit të bashkëpunimit bilateral, me theks të veçantë në avancimin e bashkëpunimit ekonomik dhe krijimin e mundësive të reja për investim dhe partneritet ndërmjet dy shteteve. U.D. Presidentja Haxhiu ritheksoi rëndësinë e avancimit të procesit të anëtarësimit në Bashkimin Evropian si dhe përkushtimin e palëkundur të Kosovës për anëtarësim në Këshillin e Evropës dhe në NATO.
U.D. Presidentja Haxhiu priti në takim lamtumirës Ambasadorin e Mbretërisë së Arabisë Saudite, z. Faisal Ghazi Ismail Hifzi
Ushtruesja e Detyrës së Presidentes së Republikës së Kosovës, znj. Albulena Haxhiu, priti sot në takim lamtumirës Ambasadorin jorezident të Mbretërisë së Arabisë Saudite për Republikën e Kosovës, z. Faisal Ghazi Ismail Hifzi, me rastin e përfundimit të mandatit të tij diplomatik. Me këtë rast, U.D. Presidentja Haxhiu e falënderoi Ambasadorin Hifzi për angazhimin dhe kontributin e tij në avancimin e marrëdhënieve ndërmjet Republikës së Kosovës dhe Mbretërisë së Arabisë Saudite. Në takim u vlerësuan marrëdhëniet e mira ndërmjet dy vendeve, si dhe mbështetja e vazhdueshme që Arabia Saudite i ka dhënë Republikës së Kosovës ndër vite. Palët riafirmuan përkushtimin për thellimin e mëtejmë të bashkëpunimit në fusha me interes të ndërsjellë, përfshirë zhvillimin ekonomik, investimet dhe partneritetin ndërinstitucional. Në përmbyllje, U.D. Presidentja Haxhiu i uroi Ambasadorit Hifzi suksese në angazhimet e tij të ardhshme diplomatike dhe profesionale.
U.D. Presidentja Haxhiu: Me dhimbje të thellë mora lajmin për humbjen tragjike të një babai dhe dy fëmijëve nga zjarri që ndodhi sot në Malishevë
U.D. Presidentja e Republikës së Kosovës, Albulena Haxhiu, ka thënë se me dhimbje të thellë mora lajmin për humbjen tragjike të një babai dhe dy fëmijëve nga zjarri që ndodhi sot në Malishevë. Në këto çaste të rënda, u.d. Presidentja Haxhiu, ka shprehur ngushëllimet më të sinqerta për familjen dhe të afërmit e viktimave. Ajo më tej ka thënë se ndajmë dhimbjen me ta dhe lutemi që të gjejnë forcë për ta përballuar këtë humbje të rëndë.
U.D. Presidentja Haxhiu priti në takim ambasadorët e vendeve nordike dhe baltike në OSBE
U.D. Presidentja e Republikës së Kosovës, Albulena Haxhiu, ka pritur sot në takim ambasadorët e vendeve nordike dhe baltike në OSBE. Në takim, u diskutua për progresin e Republikës së Kosovës në forcimin e institucioneve demokratike, sundimin e ligjit, zhvillimin ekonomik dhe avancimin e të drejtave të të gjitha komuniteteve. Po ashtu, është diskutuar edhe për sigurinë dhe rëndësinë e thellimit të bashkëpunimit me partnerët tanë në mbështetje të objektivave strategjike të Kosovës. U.D. Presidentja Haxhiu ka vlerësuar lart mbështetjen e vazhdueshme të vendeve nordike dhe baltike për Republikën e Kosovës.
U.D. Presidentja Haxhiu priti në takim të Ngarkuarën me Punë të Shteteve të Bashkuara të Amerikës në Kosovë, Anu Prattipati
U.D. Presidentja e Republikës së Kosovës, Albulena Haxhiu ka pritur sot në takim të Ngarkuarën me Punë të Shteteve të Bashkuara të Amerikës në Kosovë, Anu Prattipati. U.D. Presidentja Haxhiu dhe e Ngarkuara me Punë e Shteteve të Bashkuara të Amerikës në Kosovë, Anu Prattipati, diskutuan për zhvillimet aktuale politike në vend, bashkëpunimin e ngushtë ndërmjet Republikës së Kosovës dhe Shteteve të Bashkuara të Amerikës, si dhe për rëndësinë e partneritetit tonë strategjik për forcimin e institucioneve demokratike, atyre të sigurisë dhe perspektivës euroatlantike të vendit.