Presidentja e Republikës së Kosovës, zonja Atifete Jahjaga i dërgoi telegram ngushëllimi kryetarit të Kuvendit të Republikës së Shqipërisë, zotit Ilir Meta, me rastin e vdekjes tragjike të deputetit Sokol Olldashi.
Në telegram thuhet:
I nderuar zotëri,
Me dhimbje e morëm lajmin për vdekjen tragjike në një aksident trafiku, të deputetit të Kuvendit Republikës së Shqipërisë, zotëri Sokol Olldashi. Është kjo një humbje e madhe për të gjithë ne, pasi mbetëm pa njeriun e përkushtuar për përparimin e Shqipërisë, njeriun e angazhuar në të gjitha proceset demokratike, në zhvillimin e kulturës së parlamentarizmit, në ndërtimin dhe në zhvillimin e vendit.
Pranoni ngushëllimet tona të sinqerta në emrin tim dhe në emër të popullit të Kosovës, duke mbetur në kujtimin më fisnik, për veprën, angazhimin dhe përkushtimin e zotëri Sokol Olldashit që Shqipëria të jetë një vend evropian i përparuar dhe demokratik.
Presidentja e Republikës së Kosovës
Zonja Atifete Jahjaga