Presidentja e Republikës së Kosovës, zonja Atifete Jahjaga mori pjesë sot në mëngjesin e punës, shtruar nga Presidenti i Republikës së Kroacisë, Ivo Josipoviq, me rastin e hyrjes së Kroacisë në Bashkimin Evropian. Në këtë takim ishin të pranishëm të gjithë presidentët e shteteve të rajonit të Ballkanit Perëndimor.
Presidenti kroat Ivo Josipoviq tha se qëllimi i këtij takimi është që të diskutohen tema në interes të rajonit që të përshpejtohet procesi i integrimit të të gjithë rajonit të Ballkanit dhe të thellohet bashkëpunimi ndërmjet vendeve të rajonit.Presidenti Josipoviq tha se takimet e nivelit presidencial, që janë nismë e tij dhe e Presidentit të Sllovenisë, Borut Pahor, duhet të organizohen edhe në të ardhmen për të ndihmuar dhe lehtësuar rrugën evropiane të vendeve që aspirojnë anëtarësimin.Në fjalën e saj në mëngjesin e punës të organizuar nga Presidenti Josipoviq, Presidentja Jahjaga fillimisht e uroi z. Josipoviq për suksesin historik të anëtarësimit të Republikës së Kroacisë në Bashkimin Evropian.Në vijim ajo tha:Ju përgëzoj edhe për përkushtimin që në vazhdimësi po e tregoni dhe porosinë që po e përçoni duke mbledhur presidentët e rajonit për të thelluar në këtë mënyrë bashkëpunimin ndërfqinjësor dhe për të avancuar proceset integruese për Ballkanin Perëndimor si veprimin e parë tuajin pas anëtarësimit në BE.Politika zgjeruese e Bashkimit Evropian duhet të vazhdojë, dhe për ne vendet që aspirojmë anëtarësimin, si të vetmen alternativë dhe si synim të përgjithshëm tonin.Kjo iniciativë e juaja dhe e Presidentit Pahor në planin rajonal do të ndihmojë në realizimin e qëllimeve tona që përfundimisht t?i lëmë pas vetes mospajtimet dhe moskuptimet e të kaluarës, në mënyrë që të shohim përpara dhe të thellojmë bashkëpunimin ndërfqinjësor si kërkesë bazë për anëtarësim.Në planin shtetëror, iniciativat e këtilla që kanë për qëllim projektet e përbashkëta infrastrukturore, procesin e ndërtimit të mirëkuptimit dhe reformave substanciale, do të kontribuojnë në përmirësimin e jetës së qytetarëve tanë.Si e tillë, kjo iniciativë e juaja e ka përkrahjen time dhe konsideroj që ajo duhet të zgjerohet edhe në nivele të tjera për të siguruar një bashkëpunim gjithëpërfshirës dhe për të pasur një sukses konkret.President Josipoviq dhe President Pahor,Jo para shumë kohe, vendet tuaja kanë kaluar nëpër një tranzicion të ngjashëm me atë nëpër të cilin po kalojnë vendet tona, të konsolidimit të brendshëm dhe forcimit të subjektivitetit të jashtëm.Sllovenia dhe Kroacia janë rrëfimet më të suksesshme të rajonit dhe ky sukses nuk do të përfundojë me kaq, sepse politika e zgjerimit te Bashkimit Evropian do të konsiderohet e suksesshme vetëm me integrimin e plotë dhe me anëtarësimin e të gjitha vendeve të rajonit. Juve ju takon që të keni rolin udhëheqës në politikën e evropianizimit të vendeve tona.Kjo është vlerë shtesë për Bashkimin Evropian dhe është përkushtim i ynë që, krahas punës tonë dhe ndihmës tuaj, ta përshpejtojmë këtë rrugëtim qenësor për integrimin e vendeve tona.Ky është një moment shpresëdhënës për rajonin dhe Bashkimin Evropian dhe ne do të vazhdojmë të përmbushim synimet tona për integrim evropian dhe që, përmes dialogut të vazhdueshëm dhe bashkëpunimit me secilin shtet fqinj, të japim kontributin tonë në stabilizimin dhe demokratizimin e rajonit.