Prishtinë, 18 mars 2020 – Presidenti i Republikës së Kosovës, Hashim Thaçi, ka pritur sot Kryetarin e Odës Ekonomike të Kosovës, Berat Rukiqin, si dhe Kryetarin e Odës Ekonomike Amerikane në Kosovë, Arian Zekën, me të cilët ka biseduar për hapat që duhet ndërmarrë për t’i ndihmuar punëtorët dhe afaristët kosovarë në rrethanat e krijuara pas përhapjes së virusit COVID-19.
Presidenti Thaçi u shpreh se pandemia e COVID-19 është sfidë për shëndetësinë, por edhe për ekonominë e Kosovës dhe të tërë globit.
“Është e rëndësishme që të ndërmerren hapa për ta ruajtur edhe ekonominë e vendit”, u shpreh presidenti Thaçi.
Kryetarët Rukiqi dhe Zeka dhanë rekomandimet e tyre si të ndihmohen punëtorët dhe bizneset, por edhe kompanitë që ofrojnë shërbime për qytetarët në ditët dhe në muajt në vijim.
Presidenti Thaçi u shpreh se shteti do të ndërmarrë masa që t’iu dalë në ndihmë të gjithë atyre që do të goditen edhe në aspektin ekonomik nga rrethanat e krijuara nga COVID-19.