Deklarata për media e Presidentes Vjosa Osmani me përfaqësuesin e posaçëm të Shteteve të Bashkuara për Ballkanin Perëndimor, Gabriel Escobar
Presidentja Osmani priti në takim lamtumirës ambasadorin jorezident të Bangladeshit, Mosharraf Hossain Bhuiyan
Presidentja e Republikës së Kosovës, Vjosa Osmani, sot ka pritur në takim lamtumirës ambasadorin jorezident të Bangladeshit, Mosharraf Hossain Bhuiyan, të cilin e ka falënderuar për angazhimin gjatë mandatit të tij. Presidentja Osmani shprehu mirënjohjen e përzemërt për angazhimin e palëkundur të Bangladeshit për thellimin e marrëdhënieve dypalëshe me Kosovën dhe mbështetjen e vazhdueshme ndër vite. Në këtë linjë, Presidentja Osmani shtroi nevojën e mbështetjes nga Bangladeshit për forcimin e pozitës së Kosovës në arenën ndërkombëtare. Në takim u diskutua edhe për mundësitë e shkëlqyera për nxitjen e mëtejme të marrëdhënieve ekonomike dhe tregtare, me theks të veçantë në industrinë e tekstilit, e cila është e zhvilluar në Bangladesh. Në këtë kontekst, u diskutua edhe për mundësinë e organizimit të një forumi të përbashkët ekonomik si një mundësi e shkëlqyer për bizneset nga të dyja vendet për t`i eksploruar perspektivat e bashkëpunimit në të ardhmen. Presidentja Osmani, në këtë takim, e ka njoftuar ambasadorin Bhuiyan edhe për edicionin e dytë të Forumit për Gratë, Paqen dhe Sigurinë, i cili do të mbahet më 15-16 prill të këtij viti dhe i cili është një mundësi e mirë për bashkëpunim dhe dialog të mëtejshëm.
Betohet para Presidentes Osmani, gjyqtari i Gjykatës Kushtetuese, Jeton Bytyqi
Sot u mbajt ceremonia e betimit të gjyqtarit Jeton Bytyqi para Presidentes së Republikës së Kosovës, Vjosa Osmani, dhe në prezencë të kryetares së Gjykatës Kushtetuese, Gresa Cakaj. Presidentja Osmani e ka uruar z. Bytyqi për rolin e ri si gjyqtar në Gjykatën Kushtetuese dhe ka theksuar rëndësinë e integritetit dhe paanshmërisë së gjyqtarëve të këtij institucioni. Gjyqtari Bytyqi është betuar se do t’i qëndrojë besnik Kushtetutës së Republikës së Kosovës dhe se do t’i respektojë rregullat e etikës profesionale.
Presidentja Osmani ka kujtuar demonstratat e vitit ’81: Guximi i studentëve i dha formë kauzës për Kosovën Republikë e përmbushur më 17 shkurt 2008
43 vjet më parë, guximi i studentëve i manifestuar me demonstrata bëri që kauza jonë për Kosovën Republikë të marrë formë dhe vazhdojë tutje deri në përmbushjen e saj, më 17 shkurt të vitit 2008. “Revolta e bukës”, në mensën e Universitetit të Prishtinës ishte në fakt revoltë kundrejt një regjimi shtypës , e cila shënoi fillimin e shpërbërjes së ish-Jugosllavisë. Këto demonstrata ndryshuan rrjedhën e historisë me kauzën e qartë për mbrojtje të dinjitetit, identitetit kombëtar dhe të drejtës për shtet. Pranvera 81` është një pikë kthese në historinë e Kosovës, një përpjekje e guximshme kundër shtypjes dhe një pohim i fuqishëm i të drejtës së popullit të Kosovës për liri dhe Republikë. Trashëgimia e demonstratave të vitit 1981 është në funksion të kujtesës së fuqisë transformuese të studentëve për të bërë ndryshime rrënjësore. Guximi, qëndrueshmëria dhe rezistenca e studentëve të atij brezi mbajti në supe luftën për liri dhe sovranitet, duke çuar përfundimisht në realizimin e ëndrrës për Kosovën Republikë, të cilën çdo ditë e më tepër duhet ta ruajmë dhe ta fuqizojmë.
Presidentja Osmani priti një delegacion nga Zyra për Koordinimin e Këshillave Kombëtare Boshnjake
Presidentja e Republikës së Kosovës Vjosa Osmani Sadriu ka pritur sot një delegacion nga Zyra për Koordinimin e Këshillave Kombëtare Boshnjake, të cilët po qëndrojnë në Kosovë me ftesë të përfaqësuesve boshnjakë në Këshillin Konsultativ për Komunitete, në Zyrën e Presidentes së Republikës së Kosovës. Presidentja bëri thirrje për bashkëpunim edhe më të ngushtë, në radhë të parë të natyrës institucionale, ndërmjet Kosovës dhe Bosnje e Hercegovinës, e pastaj ndërmjet mes popullit shqiptar dhe atij boshnjak, për projekte të përbashkëta dhe shkëmbime në fushën e arsimit dhe kulturës. Presidentja poashtu theksoi se është e nevojshme të zbatohen të gjitha parimet e nënshkruara në marrëveshjet e Procesit të Berlinit, duke filluar nga liria e lëvizjes.
Presidentja me rastin e 8 marsit – Ditës Ndërkombëtare të Gruas: Sot, nesër dhe çdo ditë, me ju dhe për ju!
Presidentja e Republikës së Kosovës, Vjosa Osmani ka thënë se në Ditën Ndërkombëtare të Gruas shënojmë arritjet e grave dhe vajzave dhe përpjekjet e jashtëzakonshme të tyre në Kosovë dhe kudo në botë për të drejta të barabarta. Postimi i plotë i Presidentes Osmani: Në Ditën Ndërkombëtare të Gruas shënojmë arritjet e grave dhe vajzave dhe përpjekjet e jashtëzakonshme të tyre në Kosovë dhe kudo në botë për të drejta të barabarta. Sot kujtojmë dhe të gjitha ato gra e vajza që nuk janë më në mesin tonë, e të cilat u shndërruan në simbol rezistence, lufte dhe angazhimi për liri e barazi. Forca, qëndrueshmëria dhe zelli juaj i pashoq për emancipim të vazhdueshëm, zhvillim e barazi qëndron fort në themelet e Republikës sonë. Sot, nesër dhe çdo ditë, me ju dhe për ju!
Presidentja Vjosa Osmani uron 7 Marsin: Mësuesit janë garancia për cilësinë dhe formimin e brezave të ardhshëm
137 vite më parë me ndërtimin e mësonjtores së parë shqipe u vu guri themeltar i arsimit shqip. Investimi në arsim është jetik për mirëqenien shoqërore dhe shtetërore. Shkolla dhe mësuesit luajnë një rol vendimtar për një shoqëri të përparuar dhe shtet të zhvilluar. Sa më shumë investime në arsim, më shumë do ta nderojmë përkushtimin e palodhur të mësuesve tanë Mësuesit janë garancia për cilësinë dhe formimin e brezave të ardhshëm. Të dashura mësuese, të dashur mësues, urime 7 Marsi!
Zyra e Presidentes së Republikës së Kosovës nënshkroi Memorandum Bashkëpunimi me GIZ Kosova
Zyra e Presidentes së Republikës së Kosovës nënshkroi Memorandum Bashkëpunimi me GIZ Kosova me qëllim forcimin e rolit të shoqërisë civile në Kosovë drejt avancimit më të shpejtë të Agjendës për Gratë, Paqen dhe Sigurinë. Roli i shoqërisë civile në përshpejtim të zbatimit të plotë të Agjendës për Gratë, Paqen dhe Sigurinë është thelbësor, sidomos në nivel lokal. Si pjesë e edicionit të radhës së Forumit Ndërkombëtar për Gratë, Paqen dhe Sigurinë, i cili do të mbahet këtë prill në Prishtinë, palët nënshkruese do të ofrojnë mundësi për mbështetje të OJQ-ve vendore duke ofruar hapësirë për prezantim të projekteve ideore në lidhje me zhvillimin e politikave të përgjegjshme gjinore dhe klimatike, dhe inkurajimin e lidershipit të grave në veprimin për klimën. Ky bashkëpunim shërben si konfirmim i Kosovës dhe Gjermanisë për të punuar bashkërisht me synim për krijimin e një mjedisi sa më të sigurt, paqësor dhe të qëndrueshëm për gratë e vajzat.
Presidentja Osmani pranoi letrat kredenciale nga ambasadori jorezident i Lituanisë, Eduardas Borisovas
Presidentja e Republikës së Kosovës, Vjosa Osmani, sot ka pranuar letrat kredenciale nga ambasadori jorezident i Lituanisë, Eduardas Borisovas. Sipas Presidentes Osmani, Kosova me Lituaninë ka marrëdhënie miqësore, të krijuara nga sfidat historike dhe aspiratat e përbashkëta për demokraci dhe liri. Në këtë kontekst, Presidentja Osmani ka përmendur vizitën e fundit zyrtare në Lituani, e cila ishte një dëshmi e bashkëpunimit në rritje ndërmjet dy shteteve. Në takim me ambasadorin Borisovas, Presidentja Osmani ka shprehur falënderim për angazhimin e vazhdueshëm të Lituanisë në Kosovë nëpërmjet pjesëmarrjes së saj në KFOR që nga periudha e pasluftës. Më tej, Presidentja Osmani ka theksuar se Kosova është shumë e interesuar t`i forcojë marrëdhëniet dypalëshe me Lituaninë, por edhe të përfitojë nga përvoja e këtij shteti nga tranzicioni i suksesshëm politik dhe ekonomik, veçanërisht në fusha të tilla si integrimi në BE, sundimi i ligjit, mbrojtja, siguria, inovacioni, teknologji informative, arsimi dhe fusha të tjera. Presidentja Osmani e njoftoi ambasadorin Borisovas edhe për gjendjen aktuale politike dhe të sigurisë në vend dhe theksoi se Serbia, duke përdorur modelin e Rusisë po tenton ta destabilizojë jo vetëm Kosovën, por edhe rajonin. Presidentja Osmani tha se BE-ja duhet t`i heqë masat e ndaj Kosovës. Duke qenë se Kosova mbetet e palëkundur në përkushtimin e saj për integrimin euroatlantik dhe konsolidimin e pozitës së saj ndërkombëtare, Presidentja Osmani shtroi nevojën e mbështetjes së Lituanisë për aspiratat tona për anëtarësim në Këshillin e Evropës, BE, NATO dhe organizata të tjera ndërkombëtare. Një pjesë e takimit iu kushtua edhe Forumit Ndërkombëtar për Gratë, Paqen dhe Sigurinë, edicioni i dytë i të cilit mbahet më 15-16 prill, dhe i cili dëshmon përkushtimin e Kosovës për ta promovuar barazinë gjinore dhe përpjekjet për ndërtimin e paqes. Presidentja Osmani dhe ambasadori Borisovas diskutuan edhe për thellimin e bashkëpunimit në sektorë të ndryshëm përfshirë arsimin, kulturën, shëndetësinë dhe sfera të tjera të interesit të dyanshëm.
Presidentja Osmani pranoi letrat kredenciale nga ambasadori jorezident i Malajzisë, Zahid Rastam
Presidentja e Republikës së Kosovës, Vjosa Osmani, sot ka pranuar letrat kredenciale nga ambasadori jorezident i Malajzisë, Zahid Rastam.Në takim me ambasadorin Rastam, Presidentja Osmani, shfaqi besimin se përgjatë mandatit të tij, do të forcohen edhe më tej lidhjet ndërmjet Kosovës dhe Malajzisë.Presidentja Osmani theksoi se Kosova ka nevojë për mbështetjen e Malajzisë për anëtarësimin e Kosovës në organizatat ndërkombëtare dhe njohjen nga shtetet e organizatës ASEAN.Në të njëjtën kohë u diskutua edhe për eksplorimin e mundësive të reja për bashkëpunim me Malajzinë, veçanërisht në sektorë kyç, si: ekonomia, tregtia, arsimi dhe bujqësia, të cilat ofrojnë potencial të jashtëzakonshëm për përfitim reciprok.Gjithashtu u diskutua edhe për organizimin e një forumi të përbashkët ekonomik, i cili do të jetë mundësi e mirë për shkëmbim ndërmjet bizneseve të të dy shteteve.Presidentja Osmani ka theksuar se Kosova mbetet e palëkundur në përkushtimin e saj për promovimin e paqes dhe stabilitetit, si brenda ashtu edhe në rajon.