Guvernatorja e Përgjithshme e Commonwealth-it të Australisë, Sam Mostyn AC, uron Presidenten Osmani për 17-vjetorin e Pavarësisë së Kosovës
Me rastin e 17-vjetorit të Pavarësisë së Republikës së Kosovës, Presidentja e Republikës së Kosovës, Vjosa Osmani, ka pranuar një mesazh urimi nga Guvernatorja e Përgjithshme e Commonwealth-it të Australisë, Sam Mostyn AC. Në urimin e saj, Guvernatorja Mostyn i përcolli Presidentes Osmani dhe popullit të Kosovës urimet e përzemërta në emër të Qeverisë dhe popullit australian, duke nënvizuar rëndësinë e vazhdimit të marrëdhënieve miqësore dhe bashkëpunimit në mes dy vendeve. “Më lejoni të shpreh besimin tim se marrëdhëniet miqësore mes dy vendeve tona do të vazhdojnë të lulëzojnë edhe në vitin e ardhshëm”, thuhet në urimin e Guvernatores Mostyn.
Presidenti i Bangladeshit, Mohammed Shahabuddin, uron Presidenten Osmani me rastin e 17-vjetorit të Pavarësisë së Kosovës
Presidentja e Republikës së Kosovës, Vjosa Osmani, ka pranuar një mesazh urimi nga Presidenti i Bangladeshit, Mohammed Shahabuddin, me rastin e 17-vjetorit të Pavarësisë së Kosovës. Në mesazhin e tij, Presidenti Shahabuddin ka vënë në dukje zhvillimin pozitiv të marrëdhënieve dypalëshe midis Bangladeshit dhe Kosovës gjatë viteve të fundit, duke theksuar rritjen e bashkëpunimit në fusha të ndryshme me interes të përbashkët. Presidenti Shahabuddin ka shprehur bindjen e tij se marrëdhëniet midis dy shteteve do të vazhdojnë të forcohen dhe të zhvillohen në vitet në vijim, duke kontribuar në përfitimin e ndërsjellë të qytetarëve.
Presidenti i El Salvadorit, Nayib Bukele, uron Presidenten Osmani për 17-vjetorin e Pavarësisë së Kosovës
Presidentja e Republikës së Kosovës, Vjosa Osmani, ka pranuar një mesazh urimi nga Presidenti i Republikës së El Salvadorit, Nayib Bukele, me rastin e 17-vjetorit të Pavarësisë së Kosovës. Në mesazhin e tij, Presidenti Bukele ka shprehur urimet më të sinqerta për Presidenten Osmani dhe për qytetarët e Kosovës, duke e cilësuar këtë ditë si një simbol të forcës dhe përkushtimit të popullit të Kosovës ndaj historisë dhe identitetit të tyre. Duke përgëzuar përparimin që ka arritur Kosova, Presidenti Bukele ka ripotencuar vullnetin e El Salvadorit për t`i forcuar marrëdhëniet e miqësisë dhe bashkëpunimit ndërmjet dy shteteve. Në fund të mesazhit, Presidenti Bukele ka përcjellë urimet më të mira për mirëqenie, prosperitet dhe sukses për të gjithë qytetarët e Kosovës, duke theksuar se kjo festë duhet të jetë një burim gëzimi dhe një angazhim ndaj idealeve që kanë formësuar shtetin e Kosovës.
Presidentja sllovene Nataša Pirc Musar uron Presidenten Osmani për 17-vjetorin e Pavarësisë së Kosovës
Presidentja e Republikës së Kosovës, Vjosa Osmani, ka pranuar një mesazh urimi nga Presidentja e Republikës së Sllovenisë, Nataša Pirc Musar, me rastin e 17-vjetorit të Pavarësisë së Kosovës. Në mesazhin e saj, Presidentja Pirc Musar ka shprehur urimet më të përzemërta për Presidenten Osmani dhe qytetarët e Kosovës, duke theksuar përkushtimin e vazhdueshëm të Sllovenisë për ta mbështetur Kosovën në rrugëtimin e saj për përparim dhe zhvillim të gjithanshëm. Ajo ka ritheksuar mbështetjen e Sllovenisë për reformat dhe angazhimet ndërkombëtare të Kosovës, si dhe për integrimin e saj në strukturat euroatlantike. Presidentja Pirc Musar ka nënvizuar rëndësinë e stabilitetit në Ballkanin Perëndimor për zhvillimin e të gjithë rajonit dhe ka shprehur gatishmërinë për të thelluar bashkëpunimin mes dy vendeve në kuadër të Procesit Brdo-Brijuni dhe nismave të tjera ndërkombëtare.
Presidenti i Austrisë, Alexander Van der Bellen, uron Presidenten Osmani me rastin e 17-vjetorit të Pavarësisë së Kosovës
Presidentja e Republikës së Kosovës, Vjosa Osmani, ka pranuar një mesazh urimi nga Presidenti i Austrisë, Alexander Van der Bellen, me rastin e 17-vjetorit të Pavarësisë së Kosovës. Në mesazhin e tij, Presidenti Van der Bellen ka theksuar lidhjet e forta që bashkojnë Austrinë dhe Kosovën, duke vënë në dukje se të dy vendet ndajnë vlera të përbashkëta evropiane dhe qëndrime të ngjashme mbi shumë çështje. Presidenti austriak ka rikujtuar mbështetjen e vazhdueshme të Austrisë për Kosovën dhe ka siguruar se kjo mbështetje do të vazhdojë edhe më tej në rrugën evropiane të Kosovës.
Mbreti Salman dhe Princi i Kurorës Mohammed bin Salman urojnë Presidenten Osmani për 17-vjetorin e Pavarësisë së Kosovës
Presidentja e Republikës së Kosovës, Vjosa Osmani, ka pranuar mesazhe urimi nga Kujdestari i Dy Xhamive të Shenjta, Mbreti Salman bin Abdulaziz Al Saud, si dhe nga Princi i Kurorës dhe Kryeministri i Mbretërisë së Arabisë Saudite, Lartmadhëria e Tij Princi Mohammed bin Salman bin Abdulaziz Al Saud, me rastin e 17-vjetorit të Pavarësisë së Kosovës. Në mesazhet e tyre, Mbreti Salman dhe Princi i Kurorës i kanë uruar Presidentes Osmani dhe popullit të Kosovës urimet më të përzemërta për përparim dhe zhvillim të vazhdueshëm.
Mbreti i Suedisë, Carl Gustaf R, i dërgon urim Presidentes Osmani për 17-vjetorin e Pavarësisë së Kosovës
Me rastin e 17-vjetorit të Pavarësisë së Republikës së Kosovës, Mbreti i Suedisë, Carl Gustaf R, i ka dërguar një mesazh urimi Presidentes së Kosovës, Vjosa Osmani, duke shprehur urimet e tij më të sinqerta për këtë ditë të rëndësishme për popullin e Kosovës. Në mesazhin e tij, Mbreti Carl Gustaf R, ka uruar Presidenten Osmani për prosperitetin dhe mirëqenien e qytetarëve të Kosovës.
Fjalimi i Presidentes Osmani në Pritjen Shtetërore për nder të 17 vjetorit të Pavarsisë së Kosovës
Mirëmbrëma të gjithëve! Më lejoni edhe një herë që në emër të gjithë qytetarëve të Kosovës, dhe jo vetëm për ju që ishit sonte këtu, t’i falënderoj fëmijët që erdhën nga katër komunat e veriut të Kosovës, nga fshatra thellë në veri të Kosovës, jo vetëm si dëshmi e talentit të tyre, por kënduan këtu himnin e Republikës sonë edhe si dëshmi e sovranitetit të vendit tonë dhe sovranitetit të çdo pëllëmbe të Republikës sonë. I nderuar President Begaj, E nderuar Zonja e parë, znj. Armanda Begaj, I nderuar Kryeministër Kurti, Të nderuar ish-presidentë, Deputetë e ministra, I nderuar Kryetar i Kuvendit të Maqedonisë së Veriut, Të dashur qytetarë të Republikës së Kosovës, Shumë të nderuar partnerë, miq ndërkombëtarë të vendit tonë, Të nderuar të pranishëm jo vetëm nga Kosova por edhe nga Shqipëria, Maqedonia e Veriut, Mali i Zi, Presheva, Medvegja e Bujanovci dhe nga mërgata jonë e dashur nga anekënd botës, 17 Shkurti i vitit 2008 ndryshoi fatin tonë përgjithmonë. Për 17 vite tashmë, kjo ditë shënohet si dita më domethënëse në historinë e shtetit tonë. Gjersa sonte në këtë ditë të shenjtë për Kosovën, jemi mbledhur për ta festuar bashkërisht Ditën e Pavarësisë së Republikës. Para 17 viteve po në këtë ditë, populli i Kosovës realizoi një ëndërr shekullore të brezave të tërë. Një realitet i fituar me sakrificë dhe një amanet që e mbajmë me përkushtim çdo ditë. Sot, në çdo rrugë dhe çdo shesh, në çdo shtëpi dhe çdo familje triumfon dashuria për Kosovën. E kjo dashuri është ajo që na ka mbajtur dhe vazhdon të na mban të fortë gjithmonë. Para 17 vjetësh në këtë tokë të bekuar, Kosova i tha gjithë botës njëzëri se do të jetë përherë e lirë, e pavarur dhe sovrane. Liria jonë nuk ishte e dhuruar. Ajo u fitua me gjakun e bijve e bijave, trima guximtarë e liridashës të këtij vendi. Kujtimi për ta, për secilin dëshmor të UÇK-së, e për secilin martir të lirisë është përjetësisht i gdhendur në themelet e Republikës sonë. Liria jonë bart edhe vulën e aleatëve tanë, të cilët qëndruan me popullin tonë në ditët më të vështira, e të cilët vazhdojnë të qëndrojnë me ne të palëkundur. Ata ishin me ne në vitet më të errëta të historisë sonë e vazhdojnë të qëndrojnë pranë popullit tonë, përderisa Republika jonë shkruan kapituj të rinj e vendimtarë në forcimin e shtetit. Në këtë përvjetor, le të kujtojmë jo vetëm sakrificën e atyre që dhanë gjithçka për lirinë dhe pavarësinë tonë, por edhe përgjegjësinë që kemi secili prej nesh, për ta ndërtuar një shtet edhe më të fortë, edhe më demokratik, edhe më të drejtë. Një Kosovë, që u shërben çdoherë qytetarëve të saj, që mbron të drejtat e secilit pa dallim dhe që ecën krenare drejt familjes euroatlantike aty ku përket me të drejtë. Në këto 17 vite Kosova ka ecur përpara. Rinia jonë ka shkëlqyer në sport, në shkencë, në art dhe në çdo fushë tjetër, duke treguar se e ardhmja jonë është gjithmonë e ndritur dhe krenare. Gratë dhe vajzat e Kosovës me guxim e vizion janë bërë shtylla të pandalshme të zhvillimit të shtetit tonë. E qytetarët tanë brenda e jashtë kufijve e mbajnë gjithnjë gjallë shpirtin e Kosovës kudo që ndodhen. 17 Shkurti sot e përgjithmonë është zotim i përhershëm për të ndërtuar një të ardhme, ku çdo qytetar jeton me dinjitet, me mundësi të barabarta e besim të plotë në shtetin e tij. Është një thirrje për secilin prej nesh, që të punojmë edhe më shumë e çdo ditë me ndershmëri, me përkushtim dhe me dashuri të pakufishme për këtë tokë, e cila na dha gjithçka. Të nderuar miq, Të dashur qytetarë të Kosovës, Kosova është shtëpia jonë, krenaria jonë dhe përgjegjësia jonë më e madhe. Bashkë që të gjithë me vendosmëri e unitet, krah për krah me aleatët tanë do të ecim përpara. Sot dhe përherë, le ta mbajmë lart flamurin e Republikës sonë dhe le ta dëshmojmë para botës, se Kosova është dhe do të mbetet histori suksesi, një dritë shprese dhe një forcë e pathyeshme. Gëzuar të gjithëve Pavarësinë e Kosovës! Lavdi të gjithë atyre që dhanë gjithçka për këtë ditë! Rroftë Republika e Kosovës, populli i saj dhe aleatët tonë! Gëzuar!
Presidenti i Turqisë, Recep Tayyip Erdoğan, uron Presidenten Osmani me rastin e 17-vjetorit të Pavarësisë së Kosovës
Presidentja e Republikës së Kosovës, Vjosa Osmani, ka pranuar një mesazh urimi nga Presidenti i Republikës së Turqisë, Recep Tayyip Erdoğan, me rastin e 17-vjetorit të Pavarësisë së Kosovës. Në mesazhin e tij, Presidenti Erdoğan i ka shprehur Presidentes Osmani dhe popullit të Kosovës urimet më të përzemërta në emrin e tij dhe të kombit turk, duke ritheksuar lidhjet historike, njerëzore dhe kulturore ndërmjet dy vendeve. Ai ka nënvizuar mbështetjen e palëkundur të Turqisë për sovranitetin, integritetin territorial dhe përpjekjet e Kosovës për afirmimin e saj në arenën ndërkombëtare, duke rikujtuar rolin e shtetit të tij, si një nga vendet e para që njohu pavarësinë e Kosovës. Presidenti Erdoğan ka theksuar vullnetin e përbashkët për forcimin dhe zgjerimin e marrëdhënieve dypalëshe në të gjitha fushat me interes të ndërsjellë.
Presidentja: Krenarë me ushtrinë dhe policinë tonë!
Presidentja e Republikës së Kosovës, Vjosa Osmani, në 17-vjetorin e Pavarësisë së Republikës së Kosovës, ka thënë se Liria jonë është e shenjtë dhe mbrojtja e saj është detyrë e përhershme. “Liria jonë është e shenjtë dhe mbrojtja e saj është detyrë e përhershme. Krenarë me ushtrinë dhe policinë tonë!”, ka shkruar Presidentja Osmani.