Presidentja Osmani kujton Masakrat e Celinës, Fortesës dhe Brestocit
Më 25 mars 1999, forcat e regjimit gjenocidal të Serbisë, kryen masakra të përgjakshme në fshatrat e Rahovecit, në të cilat vranë 75 civilë në Celinë, 69 në Fortesë, 49 në Brestoc. Në mbrojtje të popullsisë, ranë heroikisht edhe pesë luftëtarë të UÇK-së. Ata u vranë vetëm sepse ishin shqiptarë, vetëm sepse donin liri. Dhimbja mbetet, drejtësia mungon, por e vërteta nuk zhbëhet. Kujtojmë martirët, nderojmë heronjtë e UÇK-së dhe nuk do të ndalemi asnjëherë në kërkim të drejtësisë!
Presidentja Osmani kujton Bajram Kelmendin, Kastriotin dhe Kushtrimin
Njëzet e gjashtë vjet më parë, Kosova humbi një luftëtar të palëkundur të drejtësisë, avokatin Bajram Kelmendi, dhe dy djemtë e tij, Kastriotin dhe Kushtrimin. Në orët më të errëta të historisë sonë, ata u rrëmbyen nga shtëpia e tyre nga regjimi gjenocidal i Millosheviqit dhe u ekzekutuan mizorisht. Ky akt barbarie synonte ta dekurajonte luftën tonë për liri. Por, dhuna nuk arriti ta shuajë të vërtetën dhe krimet nuk e ndalën përpjekjen për drejtësi. Sot, ne nuk i kujtojmë vetëm si viktima të një regjimi kriminal, por si simbole të qëndresës, të idealeve për një Kosovë të lirë dhe demokratike. Jeta dhe sakrifica e Bajram Kelmendit është testament i guximit, ndërsa vrasja e tij dhe e djemve është kujtesë e përhershme për borxhin tonë ndaj drejtësisë. Në këtë përvjetor, riafirmojmë përkushtimin tonë të palëkundur: drejtësia për Bajram Kelmendin dhe bijtë e tij nuk do të mbetet vetëm një premtim, por një betim. Brezat që vijnë do të mësojnë për ta jo vetëm si viktima të një mizorie, por si flamurtarë të pathyeshëm të një populli që nuk u dorëzua kurrë. Qoftë i përhershëm kujtimi për ta!
Deklarimi i sotëm i Presidentes Osmani para mediave në Gllogjan
Ishim sot në nderim të heronjve të Epopesë së Dukagjinit. 24 marsi shënon një prej datave më të lavdishme të historisë sonë, sepse këtu u bë një luftë heroike në mbrojtje të popullit shqiptar nga masakrat dhe nga sulmet më të ashpra të hegjemonisë serbe nën udhëheqjen e regjimit gjenocidal e fashist të Millosheviqit. Familja Haradinaj dhe i gjithë Gllogjani u ngritën në këmbë për t’i shndërruar këto kulla në fortifikatë të lirisë dhe shumë prej atyre që luftuan ranë dëshmorë, e shumë të tjerë vazhduan që të kontribuojnë për lirinë e Kosovës. Prandaj, është borxh i yni si institucione të Kosovës, por mbi të gjitha si qytetarë të kësaj Republike, të lirë, sovrane e të pavarur që gjithnjë të nderojmë sakrificën e familjes Haradinaj dhe të gjithë atyre që ranë për liri si pjesë e Epopesë së Dukagjinit dhe betejave që u bënë në këtë anë të Kosovës, por t’i nderojmë edhe të gjithë heronjtë që ranë, jo vetëm në këtë datë, por çdoherë për lirinë tonë. Siç e dini, sot nderojmë edhe përvjetorin e intervenimit të NATO-s, që pak a shumë tregon që bashkëdyzimi i luftës sonë çlirimtare në njërën anë dhe ndihmës së aleatëve tanë, më në fund e solli lirinë për të cilën u sakrifikua për breza dhe në të njëjtën kohë është mesazh që vetëm të bashkuar për Kosovën sovrane, por edhe me ndihmën e aleatëve tanë, Kosova mund të arrijë suksese historike, siç edhe ka arritur nëpërmjet çlirimit, pastaj pavarësisë dhe shtetndërtimit. Lavdi heronjve! I përjetshëm qoftë kujtimi për ta! Ju faleminderit të gjithëve!
Presidentja Osmani ka bërë homazhe te pllaka përkujtimore e ushtarëve të NATO-s, në përvjetorin e ndërhyrjes së Aleancës më 24 mars 1999
Presidentja e Republikës së Kosovës, Vjosa Osmani sot ka bërë homazhe te pllaka përkujtimore e ushtarëve të NATO-s, në përvjetorin e ndërhyrjes së Aleancës më 24 mars 1999. Me këtë rast, Presidentja Osmani ka thënë: Sot, me nderim dhe mirënjohje, bëmë homazhe te pllaka përkujtimore e ushtarëve të NATO-s, në përvjetorin e ndërhyrjes së Aleancës më 24 mars 1999. Ky akt historik i guximit dhe drejtësisë i dha fund regjimit gjenocidal të Serbisë dhe hapi rrugën drejt lirisë së Kosovës. Ushtarët e NATO-s janë heronj të lirisë sonë – ata qëndruan përkrah popullit tonë në ditët më të errëta, siç vazhdojnë edhe sot, ndaj mbeten gjithmonë pjesë e historisë sonë. Lavdi sakrificës së tyre! Mirënjohje e përjetshme Aleancës për paqen dhe lirinë tonë!
Presidentja Osmani kujton Latif Berishën dhe Agim Hajrizin
Më 24 mars 1999, Kosova humbi dy humanistë të shquar: Latif Berishën dhe Agim Hajrizin. Njëri shkrimtar e intelektual, tjetri veprimtar sindikal, të dy atdhetarë të përkushtuar ndaj lirisë dhe pavarësisë së Kosovës. Në të njëjtën ditë, Latif Berisha dhe Agim Hajrizi, së bashku me nënën dhe djalin e Agimit, u vranë nga regjimi gjenocidal serb. Por, vepra dhe sakrifica e tyre mbeten të pavdekshme dhe referencë për brezat. Kosova kujton dhe nderon veprën dhe sakrificën e tyre, sot e gjithnjë! Qoftë i përhershëm kujtimi për Latif Berishën, Agim Hajrizin dhe të gjithë të rënët për liri!
Presidentja Osmani: Epopeja e Dukagjinit, flakadan i lirisë
Presidentja e Republikës së Kosovës, Vjosa Osmani, në 27 vjetorin e Epopesë së Dukagjinit, ka bërë homazhe në Kompleksin Memorial “Dëshmorët e Kombit”, në Gllogjan dhe më pas ka vizituar Kullën e Haradinajve, ku u prit nga z. Ramush Haradinaj. Presidentja Osmani ka shkruar: Epopeja e Dukagjinit, flakadan i lirisë Në këtë përvjetor të lavdishëm, ishim në Gllogjan që të kujtojmë dhe nderojmë Epopenë e Dukagjinit, një nga momentet më të ndritura të luftës sonë për liri. Në themelet e Kosovës së pavarur qëndron sakrifica e heronjve të UÇK-së, e familjes Haradinaj dhe e të gjithë atyre që u ngritën kundër padrejtësisë, e për lirinë dhe shtetin tonë. Me nderimin më të madh përkulemi para dëshmorëve Himë Haradinaj, Gazmend Mehmetaj dhe Agron Mehmetaj, që dhanë jetën në këtë datë, për të mos vdekur kurrë. Ata u bënë simbol i rezistencës, guximit dhe besimit në lirinë e Kosovës. Në Kosovën e pavarur dhe sovrane, amaneti i heronjve na obligon ta ndërtojmë një shtet të fortë, dinjitoz, të përparuar e me aleanca të fuqishme. Liria është trashëgimia e tyre, e përgjegjësia jonë! Lavdi dëshmorëve të kombit! Nderim i përhershëm UÇK-së!
Presidentja Osmani: 24 Marsi, dita kur liria mori krahë!
Presidentja e Republikës së Kosovës, Vjosa Osmani ka thënë se 24 Marsi, është dita kur liria mori krahë! Presidentja Osmani ka shkruar: 24 Marsi, dita kur liria mori krahë! Ishte dita kur bota demokratike nuk heshti! Dita kur aleatët e NATO-s u ngritën kundër së keqes, për ta mbrojtur një popull që po luftonte për ekzistencë, i rrezikuar nga regjimi gjenocidal i Serbisë. Ishte dita kur ndaj errësirës triumfoi drita e shpresës. Nga flaka e sakrificës dhe lufta çlirimtare, lindi Kosova e lirë! 26 vjet më pas, Kosova ecën krenare, sovrane dhe e palëkundur drejt të ardhmes më të ndritur. Lavdi të gjithë të rënëve për liri! Falënderim aleatëve që ndihmuan kauzën tonë për Kosovën shtet të lirë, të pavarur e sovran!
Presidentja: Në Ditën Botërore të Sindromës Down, takova persona të jashtëzakonshëm—plot energji, dashuri dhe forcë
Presidentja e Republikës së Kosovës, Vjosa Osmani ka thënë se në Ditën Botërore të Sindromës Down, takova persona të jashtëzakonshëm—plot energji, dashuri dhe forcë. Presidentja Osmani ka shkruar: Ata janë burim frymëzimi dhe dashurie për të gjithë ne. Është detyra jonë të angazhohemi për mbështetjen e tyre, duke krijuar mundësi të barabarta dhe një mjedis ku ata mund ta shprehin plotësisht potencialin e tyre. Në Ditën Botërore të Sindromës Down, takova persona të jashtëzakonshëm—plot energji, dashuri dhe forcë. Një moment frymëzues që na kujton rëndësinë e një shoqërie më gjithëpërfshirëse dhe mbështetëse. Le ta vazhdojmë së bashku këtë rrugëtim!
Reagim ndaj shpifjeve të Lirim Mehmetajt
Presidentja Vjosa Osmani nuk do të lejojë që shpifjet e orkestruara të kalojnë pa përgjigje. Kjo nuk është hera e parë që ky person tenton ta manipulojë opinionin me shpifje, ndaj për këtë arsye, Presidentja do t`i ndërmarrë të gjithë hapat ligjor për ta mbrojtur të vërtetën dhe për të kërkuar përgjegjësi për keqpërdorim të fjalës publike përmes përhapjes së shpifjeve e me qëllim të manipulimit të opinionit nëpërmjet dezinformatave. Rrjedhimisht, Presidentja Osmani do të ushtrojë padi për shpifje ndaj Mehmetajt në funksion të mbrojtjes së integritetit personal dhe institucional. Mehmetaj nuk ka asnjë provë të vetme për shpifjet e tij dhe nuk mund të ketë, sepse ato që ai deklaron janë shpifje me tendencë të denigrimit të Presidentes dhe familjes së saj. Njëkohësisht, e njoftojmë Lirim Mehmetajn se për çdo shpifje që bëhet ndaj Presidentes edhe në të ardhmen, do të marrë përgjigjen e duhur, nëpërmjet rrugëve ligjore.
Fjalimi i Presidentes Vjosa Osmani në lansimin e nismës për mbështetjen e qasjes në financa për gratë ndërmarrëse “WE Finance” nga Banka Qendrore e Kosovës
