Presidentja Vjosa Osmani priti në takim Drejtorin e Ekipit Këshillues dhe Ndërlidhës të NATO-s (NALT), gjeneral brigade Dr. Sven Lange, si dhe Përfaqësuesen e NATO-s, znj. Blanca Hereza Atienza
Presidentja e Republikës së Kosovës, Vjosa Osmani, priti dje në takim drejtorin në largim të Ekipit Këshillues dhe Ndërlidhës të NATO-s (NALT), gjeneral brigade Dr. Sven Lange, si dhe Ud. Shefen e Operacioneve Aktuale në Stafin Ndërkombëtar, Divizioni i Operacioneve në Selinë e NATO-s, znj. Blanca Hereza Atienza. Gjatë takimit, Presidentja shprehu mirënjohjen e thellë për angazhimin e vazhdueshëm të NATO-s për sigurinë dhe stabilitetin në Kosovë. Ajo vlerësoi po ashtu mbështetjen e rëndësishme të NALT-it në zhvillimin e institucioneve të sigurisë dhe mbrojtjes së Kosovës, sidomos në zhvillimin dhe profesionalizimin e Forcës së Sigurisë së Kosovës, duke theksuar se ky bashkëpunim ka ndikuar drejtpërdrejt në forcimin e kapaciteteve profesionale dhe institucionale të vendit. Presidentja vlerësoi në mënyrë të veçantë punën dhe përkushtimin e gjeneral brigade Dr. Sven Lange, i cili po e përmbyll me sukses mandatin e tij njëvjeçar si Drejtor i NALT-it. Në emër të institucioneve dhe qytetarëve të Kosovës, ajo e falënderoi atë për kontributin e çmuar në forcimin e bashkëpunimit ndërmjet Kosovës dhe NATO-s. Presidentja ritheksoi përkushtimin e Republikës së Kosovës për paqe, stabilitet dhe vlerat euroatlantike, si dhe për integrimin në NATO.
Presidentja Osmani: Në Ditën Ndërkombëtare të Gruas, përulem me respekt para grave të Kosovës, shtyllave të familjes dhe shoqërisë
Në Ditën Ndërkombëtare të Gruas, përulem me respekt para grave të Kosovës, shtyllave të familjes dhe shoqërisë. Faleminderit nënave, mësueseve, grave prijetare, të cilat hapën rrugë me guxim, si dhe të gjitha grave që çdo ditë mbajnë në këmbë shoqërinë tonë: në arsim, shëndetësi, drejtësi, biznes, shkencë, kulturë, media, diplomaci e politikë. Mirënjohje edhe për ato që përballen me sfida çdo ditë, si dhe për gratë që nuk janë më mes nesh, por mbeten pjesë e historisë dhe lirisë sonë. Uroj që zëri i grave të vazhdojë të dëgjohet, potenciali i tyre të mbështetet dhe angazhimi i tyre të çmohet! E ardhmja e Kosovës është po aq e ndritshme sa mundësitë që u japim grave! Gëzuar 8 Marsin!
Presidentja Osmani: 7 Marsi është festa e shpirtit të kombit tonë, i cili mbijetoi falë gjuhës shqipe
7 Marsi është festa e shpirtit të kombit tonë, i cili mbijetoi falë gjuhës shqipe. Shkolla shqipe ishte akt qëndrese, në shtëpi, në bodrume e në kushte sakrifice. Në kohë përndjekjesh, mësuesit shqiptarë nuk u dorëzuan. E mbajtën gjallë gjuhën, librin dhe ëndrrën e një kombi që donte të jetonte i lirë. Nga banka e parë e shkollës deri te universitetet, është i njëjti mision, të rrisim breza që e duan gjuhën, atdheun dhe lirinë. Prandaj, 7 Marsi është një ditë mirënjohjeje dhe respekti për çdo mësues që, përmes dijes dhe përkushtimit edukon brezat dhe forcon themelet e shtetit. Urime 7 Marsi të gjithë mësuesve!
Presidentja Osmani nga Prekazi buron një mesazh që nuk shuhet kurrë: Liria nuk është dhuratë, por amanet
Presidentja e Republikës së Kosovës, Vjosa Osmani, ka bërë homazhe në Kompleksin Memorial në Prekaz. Më pas, Presidentja Osmani është pritur nga Baca Rifat Jashari. Presidentja Osmani ka shkruar: Në Kompleksin Memorial në Prekaz, çdo hap është histori, çdo gur është sakrificë. Në kuadër të Epopesë së UÇK-së, u përkulëm me nderim para altarit të lirisë, para komandantit legjendar Adem Jashari dhe para familjes që i dha Kosovës gjithçka. Sakrifica e tyre do të mbetet udhërrëfyesi ynë në çdo hap që bëjmë për shtetin dhe të ardhmen tonë. Mirënjohje të thellë për pritjen e ngrohtë nga Baca Rifat, simbol i qëndresës dhe i dinjitetit të kësaj familjeje legjendare. Nga Prekazi buron një mesazh që nuk shuhet kurrë: Liria nuk është dhuratë, por amanet. Ky amanet do të jetojë përjetë në zemrat e shqiptarëve.
Deklarata e Presidentes Osmani pas homazheve në Kompleksin Memorial “Adem Jashari”, në Prekaz
Konferenca për media e Presidentes Osmani
Presidentja Osmani priti në takim të ngarkuarën me punë të Shteteve të Bashkuara të Amerikës në Kosovë, znj. Anu Prattipati
Presidentja e Republikës së Kosovës, Vjosa Osmani, zhvilloi një takim me të ngarkuarën me punë të Shteteve të Bashkuara të Amerikës në Kosovë, znj. Anu Prattipati, gjatë të cilit u trajtuan zhvillimet aktuale në vend dhe tema të tjera me interes të përbashkët. Gjatë takimit u diskutua për zhvillimet e fundit politike në vend, me theks të veçantë te rëndësia e përmbylljes së proceseve kushtetuese në përputhje të plotë me kushtetutën. Presidentja Osmani gjithashtu ripotencoi se partneriteti me Shtetet e Bashkuara të Amerikës mbetet jetik dhe i pazëvendësueshëm për Republikën e Kosovës.
Presidentja Osmani: ZGJEDHJE TË DREJTPËRDREJTA PËR PRESIDENT!
Presidentja e Republikës së Kosovës, Vjosa Osmani, sapo ka proceduar në Kuvend amendamentet kushtetuese për zgjedhje të drejtpërdrejta të Presidentes/it, të cilat ishin hartuar nga Komisioni për amendamentimin e Kushtetutës në vitin 2011. Presidentja Osmani ka shkruar: ZGJEDHJE TË DREJTPËRDREJTA PËR PRESIDENT! Duke parë dështimet e njëpasnjëshme në zgjedhjen e Presidentes/it, sapo kam proceduar në Kuvend amendamentet kushtetuese për zgjedhje të drejtpërdrejta të Presidentes/it, të cilat ishin hartuar nga Komisioni për amendamentimin e Kushtetutës në vitin 2011. I ftoj të gjitha partitë politike që të votojnë këto amendamente kushtetuese. Tash e tutje, le të flasë populli!
Fjalimi i Presidentes Osmani në seancën solemne të Kuvendit për nder të Epopesë së UÇK-së
Shumë i dashur baca Rifat, E nderuar familje Jashari, E nderuar kryetare e Kuvendit, znj. Haxhiu, I nderuar kryeministër i Republikës, z. Kurti, Anëtarë të kabinetit qeveritar, Të nderuar ministra e deputetë, Ish-presidentë të Republikës, Të nderuar ambasadorë dhe përfaqësues të misioneve diplomatike në vendin tonë, Familje të dëshmorëve, Shoqata të dala nga lufta e Ushtrisë Çlirimtare të Kosovës, Kryetarë të komunave, Përfaqësues të institucioneve qendrore e lokale, Shumë të dashur qytetarë të Kosovës, Marsi, që në mitologjinë e lashtë simbolizonte luftën dhe guximin, ishte muaji i përballjeve, të cilat vendosnin drejtimin e historisë sonë. Pikërisht më 5, 6 dhe 7 Mars 1998, në zemër të Prekazit, historia jonë mori drejtim të ri. Këtu, qëndresa, sakrifica, heroizmi dhe e ardhmja jonë në një vend. Në bedenat e kullave në Prekaz, qëndroi Komandanti Legjendar i Ushtrisë Çlirimtare të Kosovës, Adem Jashari, bashkë me gjithë familjen e tij, duke zgjedhur sakrificën përpara përkuljes. Ata zgjodhën lirinë para frikës e mbi të gjitha zgjodhën nderin para jetës. Në ato tri ditë, marsi u bë muaji i Epopesë dhe i sakrificës, që ringjalli një komb të tërë. Familja Jashari u bë kala, ndërkaq kullat e tyre u bën flamur i përhershëm i lirisë sonë. Sot, kur kujtojmë 5, 6 dhe 7 Marsin, kujtojmë momentin kur Kosova vendosi mos të jetojë e gjunjëzuar. Prandaj, tri ditët e Epopesë janë histori e shkruar me qëndresë, para së cilës përkulemi sot e do të vazhdojmë të përkulemi përgjithmonë. 58 shpirtra u bënë dritë për një popull. Në ato ditë, krisma e armëve nuk ishte vetëm zhurmë baruti, por thirrje për liri. Ky ishte kushtrimi që zgjoi Drenicën, Kosovën, mbarë kombin, por po ashtu zgjoi ndërgjegjën e gjithë botës. Epopeja e Marsit nuk është vetëm kujtesë emocionale, është akt themelues i Republikës sonë dhe moment kur pushka e qëndresës u bë zë politik i një kombi, që kërkonte vendin e vet në botë si komb i lirë. Nga Prekazi nisi orteku i lirisë, që nuk u ndal më. Nisi një frymë, që u përhap në çdo fshat e në çdo qytet. Nisi një betim, se kjo tokë nuk do të nëpërkëmbej. Epopeja është epike sepse buroi nga populli, nga pragu i kullave në Prekaz. E tillë ishte e gjithë Ushtria Çlirimtare e Kosovës, sepse pikërisht buroi nga populli dhe lufta që e bëri ishte jo vetëm e drejtë, por edhe e domosdoshme dhe do ta mbrojmë për sa të jetë jeta. Sot, kur përmendim emrin e Adem Jasharit, Komandantit Legjendar dhe të gjithë familjes Jashari, kemi në mendje frymën dhe thirrjen që na kujton se liria asnjëherë nuk është dhuratë, por është sakrificë. Shteti është përgjegjësi dhe flamuri që e personifikon atë është amanet. Familja e Adem Jasharit nuk është vetëm simbol i flijimit, por edhe i dinjitetit të lartë shtetëror. Me heshtje fisnike dhe me një qëndrim të palëkundur, familja Jashari vazhdon të jetë aty ku e vendosi historia, në piedestalin më të lartë të sakrificës për atdheun. Të nderuar deputetë, Të nderuar të pranishëm, Epopeja na mëson se kur një popull vendos të jetojë i lirë, asnjë forcë nuk mund ta ndal atë. Lufta e Ushtrisë Çlirimtare të Kosovës, lufta e Jasharajve, nuk ishte vetëm betejë e një populli. Ajo u pasqyrua dhe u mbështet edhe nga miqtë tanë anekënd globit. Nga Shtetet e Bashkuara të Amerikës tek aleatët tanë evropianë e shumë shtete të tjera demokratike, ato qëndruan në krah të Kosovës duke na dhënë mbështetje në momentet më të rënda. Dhe pikërisht kjo mbështetje dhe solidaritet, e bashkëdyzuar me sakrificën e Ushtrisë Çlirimtare të Kosovës, e bënë të mundur kapitullin e ri të lirisë dhe të shtetit tonë. Por, Epopeja nuk ka mbaruar, ajo vazhdon në secilin institucion. Te secili ushtar i Forcës së Sigurisë së Kosovës, te secili polic që çdo ditë kujdeset për sigurinë tonë, te mësuesit që edukojnë këtë brez, te mjekët tanë, e mbi të gjitha te secili qytetar që punon me ndershmëri. Sa herë që dikush dyshon në forcën e këtij populli, mjafton ta përmendë një emër: Adem Jasharin dhe familjen Jashari. Ata ranë për t’u ngritur një komb i tërë. I jemi mirënjohës përjetësisht gjithë familjes Jashari dhe gjithë burrave e grave të UÇK-së, të cilët i dolën zot atdheut dhe ranë për lirinë e tij. Me kujtimin e heronjve dhe të kaluarës sonë, me kujtimin e të gjithë martirëve, që ranë e u flijuan për lirinë tonë, ne afirmojmë edhe të ardhmen. Kosova ka mësuar se liria kërkon vizion, vendosmëri dhe mbrojtje të vazhdueshme. Secili qytetar i yni është partner i këtij projekti kombëtar. Çdo vendim i drejtë dhe i mençur, forcon themelet e shtetit tonë. Prandaj, kemi detyrimin kombëtar e moral ta transformojmë kujtesën tonë historike në vizion politik e zhvillimor. Në Kosovë të fuqishme, ku vendimmarrja strategjike dhe integriteti institucional sigurojnë prosperitetin e brezave, që vijnë pas nesh. Ky është amaneti i Epopesë së UÇK-së. Të vazhdojmë ta forcojmë shtetin, për të cilin ata dhanë jetën, shtetin ku memoria kombëtare shërben si udhërrëfyes për një të ardhme të qartë, të drejtë dhe vizionare. Zoti e bekoftë familjen Jashari, simbolin më emblematik të shtetit e të kombit tonë! Zoti i bekoftë të gjithë dëshmorët e UÇK-së, të gjithë martirët! Zoti e bekoftë Republikën e Kosovës! Ju faleminderit!
Fjalimi i Presidentes Vjosa Osmani në rreshtimin e kuadrateve të FSK-së në Kazermën “Adem Jashari” në Prishtinë
Shumë i dashur baca Rifat, Shumë e dashur familje Jashari, E nderuar kryetare e Kuvendit, znj. Haxhiu, I nderuar kryeministër Kurti dhe kabinet qeveritar, Të nderuar ish-presidentë, Të nderuar oficerë, nënoficerë e ushtarë të Forcës së Sigurisë së Kosovës, Familjarë të heronjve, dëshmorëve e martirëve të lirisë, Veteranë e invalidë të Ushtrisë Çlirimtare të Kosovës, Kryetarë të komunave, Të nderuar diplomatë e ushtarakë të vendeve mike, I nderuar komandant i Forcës së Sigurisë së Kosovës, Gjenerallejtënant Komandant Jashari, Të nderuar të pranishëm, Shumë të dashur fëmijë nga shkolla të ndryshme anekënd Kosovës, Në këtë tokë të shenjtëruar nga sakrifica, nën flamurin që u ngrit mbi gjakun e dëshmorëve dhe në kazermën që mban emrin e pavdekshëm të Komandantit Legjendar Adem Jashari, jemi mbledhur sot për një akt nderimi që e tejkalon kohën. Në këtë manifestim madhështor për Epopenë e UÇK-së dhe Ditën e Kazermës “Adem Jashari”, ne rikujtojmë çmimin e lirisë dhe betimin, që u bë që ne sot të jetojmë të lirë dhe me dinjitet. Në këtë tokë, që dikur u dridh nga krismat e armëve të lirisë, sot qëndron krenare Kazerma “Adem Jashari”, një emër që nuk është thjesht emërtim institucioni, por është mbi të gjitha një amanet. Është përkujtim i përjetshëm i një figure që është bërë simbol i përjetësisë kombëtare, Komandantit Legjendar, Adem Jashari dhe i gjithë familjes Jashari. Ata nuk zgjodhën rrugën e lehtë, por zgjodhën sakrificën, përballjen dhe mbi të gjitha përjetësinë. Në Prekaz, Komandanti Legjendar Adem Jashari dhe familja e tij e shndërruan shtëpinë në kështjellë rezistence e gjakun e tyre në vulë të lirisë dhe të pavarësisë sonë. Familja Jashari është altar i lirisë kombëtare dhe krenari e çdo shqiptari. Ushtria Çlirimtare e Kosovës ishte zëri i një populli të shtypur. Ishte organizimi i guximit dhe shpresa që u ngrit kundër padrejtësisë. Ishte ndërgjegjja kombëtare që nuk pranoi të heshtë. Epopeja e Marsit ‘98 është dëshmi se liria fitohet me sakrificë, me unitet, me besim në të drejtën tonë për të jetuar të lirë në vatrat tona shekullore. Sot, krenaria jonë nuk qëndron vetëm në të kaluarën, ajo marshon para nesh me uniformë moderne, me profesionalizëm të lartë dhe me përkushtim të palëkundur ndaj Republikës sonë. Forca e Sigurisë së Kosovës është trashëgimtare e denjë e UÇK-së. Ajo bart në zemër idealin e lirisë dhe në duar mban përgjegjësinë e sigurisë së vendit. E trajnuar sipas standardeve më të larta ndërkombëtare, e pajisur me kapacitete moderne dhe me trupa të përgatitura profesionalisht, FSK-ja sot është e gatshme për çdo sfidë. FSK-ja jo vetëm që është e aftë ta mbrojë atdheun në çdo kohë, por është gjithashtu e përgatitur të kontribuojë edhe në misione ndërkombëtare të paqes e sigurisë globale. Sot, kur përkujtojmë Epopenë e UÇK-së, ne po forcojmë vizionin për të ardhmen. Një të ardhme ku Kosova është e sigurt, sovraniteti mbrohet në çdo pëllëmbë, është e integruar në strukturat euroatlantike, me një ushtri profesionale dhe me institucione të forta. Kazerma “Adem Jashari” është simbol i vazhdimësisë historike, nga pushka e lirisë tek uniforma e shtetit, nga rezistenca te mbrojtja institucionale dhe nga sakrifica te përgjegjësia shtetërore. Le të betohemi sot, para kujtimit të Komandantit Legjendar dhe të gjithë dëshmorëve të kombit, para kujtimit të gjithë familjes Jashari, se do ta ruajmë këtë shtet me të njëjtin përkushtim me të cilin ata e fituan duke dhënë jetën. Do ta forcojmë ushtrinë tonë, do ta thellojmë miqësinë me aleatët tanë. Do ta mbrojmë lirinë në çdo kohë dhe në çdo rrethanë, sepse liria jonë ka histori dhe ka amanet. Kjo është Kosova jonë e dashur, të cilën duhet vazhdimisht ta duam, vazhdimisht ta ruajmë dhe ta fuqizojmë çdo ditë! Lavdi e përjetshme Komandantit Legjendar Adem Jashari dhe familjes Jashari! I përjetshëm qoftë kujtimi për heronjtë e UÇK-së dhe martirët e lirisë! Rroftë Republika e Kosovës! Ju faleminderit!