Presidentja e Republikës së Kosovës, Vjosa Osmani ka mbajtur takim pune virtual me ekipin e USAID-it në Kosovë, të kryesuar nga drejtoresha, znj. Zeinah Salahi, dhe e përbërë nga udhëheqës të programeve të ndryshme të USAID në Kosovë. Në këtë takim ka marrë pjesë edhe Ambasadori i SHBA-ve në Republikën e Kosovës z. Jeffrey Hovenier.
Në këtë takim është diskutuar për bashkëpunimin e deritashëm dhe mundësitë e thellimit të bashkëpunimit të mëtejmë me USAID. Për më tepër, përfaqësuesit e USAID kanë prezantuar programet të cilat zbatohen në Republikën e Kosovës dhe të arriturat e punës së tyre në vendin tonë.
Presidentja Osmani ka falënderuar znj. Salahi për mbështetje e USAID-it në shumë fusha dhe në këtë kontekst ka përmendur posaçërisht Grantin për Objektivat Zhvillimore. Sipas Presidentes Osmani, Kosova ka nevojë edhe më tej për mbështetje nga USAID-i në shumë sektor, forcimi i të cilëve do të krijojë mundësi për t`i adresuar sfidat zhvillimore të Kosovës.
Për fund, USAID është zotuar se do të mbështetë institucionin e Presidencës në implementimin e zotimeve që dalin nga Samiti për Demokraci, përmes angazhimit në fusha e çështje konkrete.