Presidentja e Republikës së Kosovës, zonja Atifete Jahjaga, priti sot në takim të dërguarën e posaçme të sekretares amerikane të shtetit, Zonjës Hillary Clinton, për komunitetin mysliman, zonjën Farah Pandith.
Zonja Pandith u interesua për gjendjen e lirive dhe të drejtave të njeriut në Kosovë, për pozitën e gruas dhe për rolin e Kosovës në marrëdhëniet ndërkombëtare.Presidentja e Republikës së Kosovës, zonja Atifete Jahjaga, tha se Kosova është bërë faktor paqeje dhe stabiliteti, që ka ndikim gjithnjë e më të madh në skenën ndërkombëtare. Presidentja Jahjaga theksoi faktin që Kosova është shtet qytetar, në të cilin të gjithë njerëzit, pa marrë parasysh përkatësinë kombëtare, fetare apo gjinore, i kanë të drejtat dhe liritë e barabarta.Presidentja Jahjaga e njoftoi zonjën Pandith për përparimet që po bën Kosova në realizimin e barazisë gjinore, duke përmendur kuotën si garanci minimale të përfaqësimit të gruas në të gjitha sferat e jetës dhe të punës dhe sidomos në institucionet përfaqësuese dhe vendimmarrëse në Kosovë.Presidentja Jahjaga e falënderoi zonjën Pandith për mbështetjen e vazhdueshme të Shteteve të Bashkuara të Amerikës dhe të sekretares së shtetit, zonjës Hillary Clinton, si një mike e dëshmuar e Kosovës dhe e popullit të saj, për paqe dhe stabilitet në rajon.Zonja Pandith theksoi se Kosova ka bërë avancime të theksuara dhe po bëhet një shembull i mirë për rolin faktik të femrës në shoqëri si dhe për përparimet dhe avancimet që janë bërë në fushën lirive dhe të drejtave të njeriut, duke ofruar mbështetjen dhe ndihmën e vazhdueshme të Shteteve të Bashkuara të Amerikës në çuarjen përpara të këtyre proceseve.