Presidentja e Republikës së Kosovës zonja Atifete Jahjaga dënon ashpër sulmin mbi ambasadoren e SHBA-së në Kosovë, Tracey Ann Jacobson gjatë protestës së Lëvizjes Vetëvendosje të organizuar në Prishtinë.
Presidentja Jahjaga thekson se diplomatet e akredituar në Kosovë përfaqësojnë shtetet respektive të tyre dhe çdo sulm mbi ta është edhe sulm mbi shtetet e tyre.
Presidentja Jahjaga konsideron se sulmi dhe pengimi i ambasadores Jacobson është një akt i paprecedent, krejtësisht i papranueshëm dhe plotësisht në kundërshtim me parimet dhe vlerat e shoqërisë së Kosovës dhe shtetit të cilin po e ndërtojmë me përkrahjen e tyre.
Sulmi mbi diplomatet e huaj dhe pengimi i tyre është shkelje e rëndë e parimit të demokracisë dhe e ligjit. Kjo është një sjellje e papërgjegjshme dhe e turpshme.