Prishtinë, 5 qershor 2007 –
Themeluesit dhe udhëheqësit e Shoqatës së Ultrasonografisë së Kosovës, me seli në Prizren, vizituan sot Presidentin Sejdiu, në vigjilje të simpoziumit të tyre ndërkombëtar, në të cilin pjesëmarrjen e kanë paralajmëruar mbi 600 ekspertë të kësaj fushe nga 14 vendet të ndryshme të botës.
Pasi që e falënderuan Presidentin Sejdiu për pritjen dhe mbështetjen e vazhdueshme, anëtarët e delegacionit të kësaj shoqate, të prirë nga kryetari dr. Selami Sylejmani, prezantuan aktivitetet e shumanshme dhe botimet profesionale, të cilat janë rezultat edhe i punimeve të pesë simpoziumeve të deritanishme.Presidenti Sejdiu ripohoi mbështetjen e tij dhe të institucioneve të Kosovës për shëndetësinë e Kosovës në përgjithësi. Ai i përgëzoi ultrasonografistët e Kosovës për punën e tyre, duke kërkuar nga ta që të bëjnë përpjekje të mëtejme për të qenë në rrjedhë të të arriturave shkencore të vendeve të tjera.