Presidentja Osmani përkujton komandant Drinin – Ekrem Rexhën, ushtarakun brilant të UÇK-së, intelektualin dhe njeriun që jetën ia kushtoi lirisë së atdheut
Sot përkujtojmë me nderim komandant Drinin – Ekrem Rexhën, ushtarakun brilant të UÇK-së, intelektualin dhe njeriun që jetën ia kushtoi lirisë së atdheut. Një poliglot i rrallë, një strateg i përgatitur dhe një udhëheqës i dashur për bashkëluftëtarët, ai u bë shembull i përkushtimit dhe dinjitetit në shërbim të kombit. Vrasja mizore pas luftës e luftëtarit të lirisë, mbetet një plagë e hapur në kujtesën tonë kolektive. Një krim i rëndë ndaj njeriut që dha çdo gjë për lirinë dhe që meritonte drejtësi, porse jo plumbin e pabesisë! Lavdi jetës dhe veprës së komandant Drinit!
Presidentja Osmani priti në takim të Ngarkuarën me Punë të Ambasadës Amerikane, znj. Anu Prattipati
Presidentja e Republikës së Kosovës, Vjosa Osmani, priti sot në takim të Ngarkuarën me Punë të Ambasadës së Shteteve të Bashkuara të Amerikës në Kosovë, znj. Anu Prattipati. Në takim u diskutuan zhvillimet e fundit në vend, situata e sigurisë në Kosovë dhe në rajon, si dhe ecuria e formimit të institucioneve të reja. Gjithashtu, gjatë takimit u trajtuan edhe një sërë çështjesh të tjera që lidhen me marrëdhëniet bilaterale ndërmjet Kosovës dhe Shteteve të Bashkuara të Amerikës, me theks të veçantë në fushat me interes të përbashkët, në veçanti fushën e mbrojtjes, si dhe mundësitë për thellimin e bashkëpunimit në të ardhmen.
Gjatë vizitës në Brunei, Zotëria i Parë Prindon Sadriu, pritet me nderime të larta në Akademinë e Mbrojtjes të Forcave të Armatosura Mbretërore të Bruneit
Në kuadër të vizitës shtetërore të Presidentes së Republikës së Kosovës, Shkëlqesisë së Saj, Dr. Vjosa Osmani-Sadriu, në Sulltanatin e Bruneit Darussalam, me ftesë të Madhërisë së Tij, Sulltan Haxhi Hassanal Bolkiah, Zotëria i Parë, Prindon Sadriu, zhvilloi një vizitë në Akademinë e Mbrojtjes së Forcave të Armatosura Mbretërore të Bruneit, ku u prit me nderime të larta. Gjatë kësaj vizite, ai ishte i shoqëruar nga këshilltari ushtarak i Presidentes, Gjeneral Brigade Dr. Sefer Isufi. Zotëria i Parë u mirëprit nga Ministri në detyrë i Mbrojtjes, Pehin Datu Lailaraja, Gjeneral Major (Ret.) Dato Paduka Seri Haji Awang Halbi bin Haji Md Yussof, Komandanti i Forcave të Armatosura Mbretërore të Bruneit, Gjeneral Major Dato Paduka Seri Haji Muhammad Hasaimi bin Bol Hassan, si dhe nga Komandanti i Akademisë, Kolonel Pengiran Sharifuddin bin Pengiran Haji Yusof. Gjatë takimit, drejtuesit e institucionit e informuan Zotërinë e Parë për strukturën organizative të akademisë, për doktrinën dhe filozofinë e saj ushtarake, për nivelin profesional të stafit dhe për infrastrukturën moderne që ofron mbështetje të plotë për trajnimin dhe edukimin e kadetëve dhe oficerëve. Në vazhdim, ai vizitoi ambientet e punës, sallat e ligjërimit, hapësirat e studimit, objektet për stërvitje ushtarake e fizike, si dhe mjediset rekreative dhe akomoduese për kadetët dhe kuadrot ushtarakë. Në fjalën e tij, Zotëria i Parë, Nënkolonel (R) Prindon Sadriu, shprehu mirënjohje të thellë për mikpritjen e ngrohtë dhe organizimin e shkëlqyer, si dhe vlerësoi lart standardet profesionale të Akademisë. Ai theksoi se pritja e jashtëzakonshme që iu bë Presidentes së Republikës së Kosovës nga Sulltani dhe autoritetet e Bruneit është dëshmi e miqësisë së sinqertë dhe e forcimit të marrëdhënieve ndërmjet dy vendeve dhe popujve tanë. Më pas, Zotëria i Parë mbajti një prezantim të shkurtër para pjesëmarrësve nga rreth 30 vende të botës në kuadër të kursit të Komandës dhe Shtabit të Përgjithshëm, duke ndarë përvoja profesionale dhe pikëpamje mbi çështje të sigurisë ndërkombëtare. Ai gjithashtu vizitoi edhe disa nga programet trajnuese për oficerët të cilat zhvilloheshin në këtë institucion. Diskutimi u përqëndrua edhe te bisedimet e zhvilluara ndërmjet Presidentes Osmani-Sadriu dhe Madhërisë së Tij, Sulltanit Haxhi Hassanal Bolkiah, për mundësinë e zgjerimit të bashkëpunimit bilateral edhe në fushën e mbrojtjes dhe sigurisë, si dhe për inicimin e partneritetit mes forcave të armatosura dhe akademive të mbrojtjes të dy vendeve. Vizita u përmbyll me një drekë pune, ku u thelluan më tej diskutimet mbi potencialin për bashkëpunim ndërshtetëror në fushën e mbrojtjes dhe arsimit ushtarak.
Presidentja Osmani: Faleminderit Brunei Darussalam! Terima Kasih!
Sulltani i Bruneit organizoi banket shtetëror për nder të vizitës së Presidentes Osmani
Sulltani i Bruneit, për nder të vizitës së Presidentes Osmani ka organizuar banket shtetëror. Presidentja Osmani ka shkruar: Në banketin shtetëror të organizuar nga Sulltani i Bruneit, për nder të vizitës sonë, u dëshmuan vlerat e bujarisë e mikpritjes dhe respektit që e karakterizojnë këtë komb. Përgjatë vizitës, kishim nderin që gjithashtu të takojmë Princin e Kurorës, Al-Muhtadee Billah, si dhe Princeshën e Kurorës Sarah, ku diskutuam rreth mundësive të shumta për bashkëpunim në fusha të interesit të dyanshëm. Momente të tilla na kujtojnë fuqinë e diplomacisë dhe të respektit të ndërsjellë në ndërtimin e urave ndërmjet kulturave dhe shteteve.
Presidentja Osmani përkujton Betejën e Çabratit: Beteja e Çabratit është piedestali i qëndresës dhe lavdisë!
Beteja e Çabratit është piedestali i qëndresës dhe lavdisë! Në ballë të historisë, aty ku gjaku i lirisë u bë flamur, qëndruan vajzat dhe djemtë e Brigadës 137 “Gjakova”, të Ushtrisë Çlirimtare të Kosovës. Me zemër e besë, ata mbrojtën Gjakovën nga barbaria e regjimit gjenocidal serb. Në atë betejë të lavdishme ranë heroikisht 26 luftëtarë të UÇK-së, u vranë mizorisht afër 100 banorë dhe u rrëmbyen me dhunë mbi 300 të tjerë. Çabrati është betim për liri, kujtesë e përhershme dhe thirrje për drejtësi. Lavdi dëshmorëve! Nderim për të rënët! Drejtësi për të pagjeturit!
Presidentja Osmani nderohet me Urdhrin e Familjes Mbretërore “Datin Laila Utama” nga Sulltani i Brunei Darussalam
Gjatë vizitës shtetërore në Sulltanatin e Bruneit Darussalam, Presidentja e Republikës së Kosovës, Vjosa Osmani, është nderuar me Urdhrin e Familjes Mbretërore Laila Utama, më i larti në nivel të shtetit. Ky urdhër u jepet tradicionalisht udhëheqësve të huaj ndërkombëtar. Me këtë nderim, Presidentes Osmani i është dhënë gjithashtu edhe titulli honorifik “Datin Laila Utama”, i cili bart një nder të veçantë në protokollin shtetëror të Bruneit. Në ceremoninë e pranimit të këtij Urdhri dhe titulli, Presidentja Osmani u shpreh se ky nder është një simbol i fuqishëm i respektit të ndërsjellë dhe i miqësisë që po ndërtohet në mes dy popujve. “Ky Urdhër dhe ky titull nuk është vetëm një vlerësim për mua, por mbi të gjitha një nderim për popullin e Kosovës. Jam thellësisht mirënjohëse për mikpritjen dhe respektin e treguar nga Sulltani dhe populli i Bruneit”, ka theksuar Presidentja Osmani. Ky nderim i lartë është dëshmi e përkushtimit të Presidentes Osmani ndaj forcimit të marrëdhënieve ndërshtetërore dhe promovimit të Kosovës në skenën ndërkombëtare. Këtë Urdhër mbretëror dhe titull prestigjioz e ka marrë më parë edhe Mbretëresha Elizabeth II e Mbretërisë së Bashkuar.
Presidentja Osmani ka folur para anëtarëve të trupit diplomatik, stafit akademik dhe studentëve të Universitetit të Brunei Darussalam, lidhur me të kaluarën përplot sakrifica e procesin e shtetndërtimit në Kosovë
Presidentja e Republikës së Kosovës, Vjosa Osmani, gjatë vizitës në Brunei, ka folur para anëtarëve të trupit diplomatik, stafit akademik dhe studentëve të Universitetit të Brunei Darussalam, lidhur me të kaluarën përplot sakrifica e procesin e shtetndërtimit në Kosovë. “Ishte kënaqësi të flas para anëtarëve të trupit diplomatik, stafit akademik dhe studentëve të Universitetit të Brunei Darussalam, lidhur me të kaluarën përplot sakrifica e procesin e shtetndërtimit në Kosovë, si dhe vizionin tonë për një të ardhme edhe më të mirë”, ka shkruar Presidentja Osmani.
Presidentja Osmani uron Kancelarin Merz: Presim me padurim forcimin e partneritetit dhe bashkëpunimit tonë për ta çuar përpara rrugëtimin legjitim të Kosovës drejt anëtarësimit në BE dhe NATO
Presidentja e Republikës së Kosovës, Vjosa Osmani, në emër të popullit të Kosovës, ka uruar Kancelarin e Gjermanisë, Friedrich Merz me rastin e marrjes së detyrës. Urimi i plotë i Presidentes Osmani: Në emër të popullit të Kosovës, i uroj suksese Kancelarit Friedrich Merz me rastin e marrjes së detyrës dhe fillimit të mandatit të qeverisë së re gjermane. Në një moment përcaktues për unitetin dhe sigurinë e Evropës, udhëheqja e vazhdueshme e Gjermanisë është më e rëndësishme se kurrë. Si një nga aleatët më të rëndësishëm të Kosovës, presim me padurim forcimin e partneritetit dhe bashkëpunimit tonë për ta çuar përpara rrugëtimin legjitim të Kosovës drejt anëtarësimit në BE dhe NATO.
Presidentja Osmani: Shtëpia nuk duhet kurrë të kthehet në skenë krimi!
Presidentja e Republikës së Kosovës, Vjosa Osmani, ka reaguar pas krimit të rëndë që ndodhi sot në Prizren. Reagimi i plotë i Presidentes Osmani: Shtëpia nuk duhet kurrë të kthehet në skenë krimi! Kur brenda katër mureve të shtëpisë – aty ku duhet të ketë dashuri, siguri dhe ngrohtësi – ndodh një krim kaq i rëndë sikur ky që ndodhi sot, ku njëra vajzë vritet nga dora e babait dhe vajza tjetër mbetet e plagosur së bashku me nënën e saj, nuk jemi më vetëm përballë një tragjedie familjare. Jemi përballë një drame shoqërore, një alarm që kumbon fort për të gjithë. Për secilën shoqëri e secilin shtet! Ky nuk është thjesht një krim. Është një akt barbar. I bëj thirrje organeve të drejtësisë: veproni me forcën maksimale të ligjit, pa asnjë mëshirë ndaj dhunës! Zbardhje e plotë, ndëshkim maksimal – ky është minimumi që kërkon drejtësia në këtë rast. Por drejtësia pas tragjedisë nuk mjafton. Kërkohet parandalim! Parandalim për të ndalur dorën që godet, për të shpëtuar jetët që sot janë të pambrojtura. Nuk mundemi kurrsesi të kthejmë kokën anash! Nuk ka më “është punë familjare” kur dhuna gërryen nga brenda zemrën e një shoqërie. Shtëpia nuk guxon të bëhet vend i frikës. Duhet të mbetet strehë e shenjtë! Ngushëllime të thella për jetën e pafajshme të humbur. Lutje për forcë dhe shërim për të mbijetuarat. Dhe zë i lartë për drejtësi!