Presidentja Osmani priti në takim Ambasadorin e Mbretërisë së Bashkuar, Jonathan Hargreaves
Presidentja e Republikës së Kosovës, Vjosa Osmani, priti sot në takim Ambasadorin e Mbretërisë së Bashkuar në Kosovë, Jonathan Hargreaves. Në takim u diskutuan zhvillimet e fundit në vend, si dhe procesi i zgjedhjeve të parakohshme të mbajtura më 28 dhjetor, të cilat u zhvilluan sipas standardeve më të larta demokratike. Në këtë frymë, Presidentja ritheksoi rëndësinë e formimit sa më të shpejtë të institucioneve. Po ashtu, në takim u diskutua edhe për hapat tutje drejt finalizimit të iniciativës së Presidentes për lidhjen e marrëveshjeve strategjike me Mbretërinë e Bashkuar në fushat e interesit të përbashkët, respektivisht atë të mbrojtjes, sigurisë, si dhe ekonomisë e tregtisë, për ç’gjë ishin dakorduar gjatë vizitës së Sekretarit të Jashtëm britanik në Kosovë në prill të këtij viti. Me këtë rast, Presidentja Osmani shprehu gjithashtu mirënjohjen për mbështetjen e vazhdueshme britanike për Kosovën dhe qytetarët e saj.
Presidentja Osmani ngushëllon familjen Sadriu për ndarjen nga jeta të z. Ali Sadriu
Me pikëllim të thellë mora lajmin për ndarjen nga jeta të z. Ali Sadriu, ish-Ministër i Financave, ish deputet në dy mandate dhe ish-Drejtor Ekzekutiv i QKUK-së. Kontributi i tij i jashtëzakonshëm në shërbim të institucioneve të vendit dhe i palodhur në përkushtimin ndaj qytetarëve do të mbetet gjithmonë i paharrueshëm. Në këto çaste të rënda për familjen, bashkëndjej me ju dhe ju inkurajoj që të gjeni forcë në përballimin e dhimbjes. I përhershëm qoftë kujtimi për Ali Sadriun!
Presidentja Osmani: Siguria garantohet me angazhim të përditshëm dhe partnerë të besueshëm
Presidentja e Republikës së Kosovës, Vjosa Osmani është takuar me Komandantin e KFOR-it, Özkan Ulutaş, të cilin e ka falënderuar për lidershipin e tij dhe për rolin e KFOR-it në funksion të sigurisë për të gjithë qytetarët e Republikës së Kosovës, pa dallim. Presidentja Osmani ka shkruar: Siguria garantohet me angazhim të përditshëm dhe partnerë të besueshëm. Në takim me Komandantin e KFOR-it, Özkan Ulutaş, e falënderova për lidershipin e tij dhe për rolin e KFOR-it në funksion të sigurisë për të gjithë qytetarët e Republikës së Kosovës, pa dallim. Bashkëpunimi i ngushtë me NATO-n mbetet thelbësor për ruajtjen e paqes dhe sigurisë në Kosovë e rajon, e në veçanti përballë veprimeve të vazhdueshme destabilizuese të Serbisë.
Presidentja: Zëri i Kosovës po fuqizohet çdo ditë
Presidentja e Republikës së Kosovës, Vjosa Osmani ka thënë se kur Kosova flet me dinjitet, bota dëgjon. “Kur Kosova flet me dinjitet, bota dëgjon. Zëri i Kosovës po fuqizohet çdo ditë. Shpërndaje edhe ti, që ta dëgjojnë të gjithë”, ka shkruar Presidentja Osmani.
Presidentja Osmani vizitoi Gjakovën dhe Malishevën për të parë nga afër situatën pas vërshimeve dhe për t’u njohur me nevojat e qytetarëve që u evakuuan
Presidentja e Republikës së Kosovës, Vjosa Osmani ka vizituar sot Gjakovën dhe Malishevën për të parë nga afër situatën pas vërshimeve dhe për t’u njohur me nevojat e qytetarëve që u evakuuan. Presidentja Osmani ka shkruar: Sot vizituam Gjakovën dhe Malishevën për të parë nga afër situatën pas vërshimeve dhe për t’u njohur me nevojat e qytetarëve që u evakuuan. Takuam kryetarët e këtyre dy komunave, Ardian Gjinin dhe Ekrem Kastratin, si dhe disa nga familjet e prekura, për t’u siguruar që asnjë familje të mos mbetet pa mbështetjen e nevojshme. Këto situata na kujtojnë sa i rëndësishëm është solidariteti dhe bashkëpunimi kur qytetarët përballen me vështirësi sikurse kjo. Një falënderim i veçantë shkon për ekipet e emergjencës, ato lokale e qendrore, Agjencinë për Menaxhimin e Emergjencave, zjarrfikësit dhe policinë, që ishin në krye të detyrës, duke mbrojtur jetët dhe pronat e qytetarëve. Si gjithnjë, FSK është në gjendje gatishmërie në rast nevoje. Bashkë mund t’i tejkalojmë sfidat!
Urimi i Presidentes Osmani për Krishtlindjen ortodokse
Për të gjithë qytetarët e besimit ortodoks qoftë kjo festë një burim paqeje, harmonie dhe dashurie në çdo familje, duke afruar zemrat, forcuar mirëkuptimin dhe sjellë shpresë për ditë më të mira. Uroj shëndet dhe begati për secilën shtëpi! Gëzuar për shumë mot Krishtlindjen ortodokse!
Presidentja: Mirënjohje e thellë për të gjitha institucionet dhe qytetarët që, përballë reshjeve të dendura dhe vërshimeve të sotme, po reagojnë me përgjegjësi
Presidentja e Republikës së Kosovës, Vjosa Osmani, pas reshjeve të dendura dhe vërshimeve të sotme iu ka bërë thirrje qytetarëve të tregojnë vigjilencë dhe të respektojnë me përpikëri udhëzimet e institucioneve kompetente. Presidentja Osmani ka shkruar: Mirënjohje e thellë për të gjitha institucionet dhe qytetarët që, përballë reshjeve të dendura dhe vërshimeve të sotme, po reagojnë me përgjegjësi, profesionalizëm dhe solidaritet në mbrojtjen e jetës dhe pronës. Sot gjatë ditës kam qenë në komunikim me kryetarët e komunave të prekura, të cilët po udhëheqin menaxhimin e situatës në terren në koordinim të ngushtë dhe me mbështetjen e institucioneve qendrore. Agjencia për Menaxhimin e Emergjencave po punon pareshtur bashke me organet e rendit. Falënderoj edhe Forcën e Sigurisë së Kosovës për gatishmërinë e plotë për ofrimin e mbështetjes së menjëhershme, duke vënë në dispozicion kapacitetet e saj njerëzore dhe logjistike, nëse paraqitet nevoja. Situata kërkon kujdes maksimal. U bëj thirrje qytetarëve të tregojnë vigjilencë dhe të respektojnë me përpikëri udhëzimet e institucioneve kompetente. Bashkëpunimi i ngushtë dhe reagimi profesional mbeten vendimtare për përballimin me sukses të kësaj situate.
Presidentja Osmani: Kolonel Zemaj ishte oficer profesionist, atdhetar i jashtëzakonshëm, luftëtar i lirisë dhe bashkëpunëtor i afërt i Presidentit historik Dr.Ibrahim Rugova
Sot bëhen 23 vjet nga vrasja e ushtarakut të UÇK-së, kolonelit Tahir Zemaj, së bashku me familjarët e tij, të birin Enisin dhe kushëririn Hasanin. Kolonel Zemaj ishte oficer profesionist, atdhetar i jashtëzakonshëm, luftëtar i lirisë dhe bashkëpunëtor i afërt i Presidentit historik Dr.Ibrahim Rugova. Vrasja e tij mbetet plagë e hapur dhe kujtesë e dhimbshme se drejtësia për disa krime ende pret. Kujtimi për kolonel Zemajn dhe familjarët e tij është obligim moral dhe institucional për të vërtetën, për drejtësinë dhe për Kosovën që ata ëndërruan e luftuan. Lavdi jetës dhe veprës së kolonel Tahir Zemajt, Enisit dhe Hasanit!
Presidentja Osmani ngushëllon familjen Ramabaja, miqtë, kolegët dhe gjithë komunitetin kulturor për ndarjen nga jeta të Rushit Ramabajës
Me pikëllim të thellë mora lajmin për ndarjen nga jeta të Rushit Ramabajës, shkrimtar, gazetar dhe intelektual i angazhuar, një emër i veçantë i kulturës dhe gazetarisë shqiptare në Kosovë. Për dekada me radhë, përmes punës së tij në “Rilindja”, Radio Kosova dhe përmes një trashëgimie të pasur letrare me mbi 20 vepra, ai i dha zë mendimit kritik, fjalës së lirë dhe shpirtit krijues. Vepra dhe përkushtimi i tij do të jetojnë gjatë në kujtesën kulturore të vendit tonë. Ngushëllimet më të sinqerta familjes Ramabaja, miqve, kolegëve dhe gjithë komunitetit kulturor. I përhershëm qoftë kujtimi për Rushit Ramabajën!
Presidentja Vjosa Osmani, së bashku me Zotërinë e Parë dhe Kabinetin e saj, ka bërë homazhe në nderim të ish-Kryetarit të Kuvendit të Republikës së Kosovës, akademikut dhe profesorit, Nexhat Daci
Sot, Presidentja Vjosa Osmani, së bashku me Zotërinë e Parë dhe Kabinetin e saj, ka bërë homazhe në nderim të ish-Kryetarit të Kuvendit të Republikës së Kosovës, akademikut dhe profesorit, Nexhat Daci. Nën patronatin e saj është organizuar akademia përkujtimore kushtuar jetës dhe veprës së Prof. Dr. Nexhat Dacit. Në fjalimin e saj, Presidentja Osmani vlerësoi angazhimin e tij të palodhur në shërbim të arsimit të lartë, shkencës dhe institucioneve demokratike të Republikës së Kosovës. Presidentja Osmani shprehu ngushëllimet e saj më të sinqerta për familjen Daci, të afërmit, miqtë dhe bashkëpunëtorët e të ndjerit, duke nderuar kontributin e tij të çmuar dhe trashëgiminë e qëndrueshme që ai la pas në shërbim të vendit dhe shoqërisë. Në kuadër të agjendës shtetërore përkujtimore, Presidentja Osmani mori pjesë edhe në ceremoninë shtetërore të varrimit të Akademik Dacit.