– “Besojmë se dita e votimeve të jetë një ditë e ceremonisë, sepse është edhe hera e parë që Kosova organizon zgjedhjet vet”, tha Presidenti i Republikës së Kosovës, dr.Fatmir Sejdiu, gjatë një takimi që pati sot me gazetarë.
“Kanë kaluar një javë nga fillimi i fushatës dhe unë them se deri tani ka qenë një ferplay i përgjithshëm, subjektet politike i janë përmbajtur një kodi të përbashkët të nënshkruar por edhe dispozitave të ligjit, por natyrisht mund të ketë edhe raste spontane, të cilat nuk mund njeri t’i analizojë me vetveten. Por ajo që them unë është një sprovë e mirë tash, dhe mund t’ju them juve si gazetarë se mund ta gjeni mundësinë e mirë sepse jeni në çdo skaj të Kosovës. Duhet t’i mbuloni mirë të gjitha ngjarjet për të pasur një kompletim të mozaikut të përgjithshëm të këtij procesi”, vijoi Presidenti Sejdiu.“Tash është koha edhe për një shpalosje të përgjithshme të identitetit tonë. Shpresojmë se qytetarët serbë do të dalin në zgjedhje, jo të gjithë sepse kanë një presion të madh dhe mendoj që edhe ju jeni në proces të mirë që t’i nxisni këta njerëz që të dalin në zgjedhje”, tha ndër të tjera Presidenti Sejdiu.