Presidentja e Republikës së Kosovës, Vjosa Osmani Sadriu, në kuadër të ciklit të vizitave nëpër komuna, ka vizituar sot komunën e Junikut, ku është pritur nga kryetari i kësaj komune, z. Ruzhdi Shehu.
Presidentja Osmani ka thënë se në takim me kryetarin Ruzhdi Shehu diskutuam për zhvillimet e përgjithshme në komunë, me theks të veçantë për fuqizimin e sektorit të turizmit dhe bujqësisë.
Në vijim gjeni të plotë postimin e Presidentes
Ciklin e vizitave nëpër komuna e vazhduam sot me Junikun.
Në takim me kryetarin Ruzhdi Shehu diskutuam për zhvillimet e përgjithshme në komunë, me theks të veçantë për fuqizimin e sektorit të turizmit dhe bujqësisë.
Më pas, bashkë me presidentin e Republikës së Shqipërisë, Ilir Meta, vendosëm lule te shtatorja e heroit Edmond Hoxha. Vazhduam në aktivitetin për shënimin e 110 vjetorit të Kuvendit të Junikut, i cili shënon jo vetëm ngjarje të rëndësishme historike, por edhe shembull të artikulimit të qartë politik të kërkesave të popullit shqiptar për liri e pavarësi.
Në kullat e Junikut u ofruan specialitetet e kuzhinës sonë popullore të bëra nga duart e arta të grave të organizatës joqeveritare “Qershiza”, me të cilat diskutuam për rëndësinë e fuqizimit ekonomik të grave.
Kurse te kompania LUNA, e cila merret me përpunimin e mollave, qershive, vishnjeve dhe boronicave pashë nga afër punën e madhe që bëjnë gratë e punësuara në këtë biznes të suksesshëm, të drejtuar poashtu nga një grua.
Vizitën në këtë anë, e shoqëruar nga presidenti Meta e përfunduam me një homazh në Kompleksin memorial të dëshmorëve në Koshare ku nderuam kujtimin për heronjtë e luftës sonë çlirimtare, të cilët e bën të mundshme që Kosova dhe Shqipëria t'i nderojnë bashkë ata dhe ta kujtojnë historinë e përbashkët!
Shihemi në komunën e radhës!