Presidentja e Republikës së Kosovës, zonja Atifete Jahjaga mori pjesë sot në tubimin e organizuar me rastin e zbulimit të shtatores së dëshmorit Rexhep Bislimi, që u mbajt në sheshin kryesor të Ferizajt.
Me këtë rast, Presidentja Jahjaga iu drejtua të pranishmëve me një fjalë rasti, të cilën po ua sjellim në vijim :
Të nderuar qytetarë të Ferizajt
Të nderuar pjesëmarrës në këtë tubim madhështor
E nderuara nëna Havë,
Të nderuar familjarë të dëshmorëve dhe të invalidëve të luftës,
I nderuari kryeministër Thaçi,
I nderuari kryetar i komunës Aliu,
Të nderuar përfaqësues të institucioneve të Republikës së Kosovës,
Dhënia e emrave rrugëve dhe shesheve dhe ngritja e shtatoreve dhe e monumenteve për ata që punuan për lirinë e Kosovës është një nderë dhe njëherësh një përkushtim që në mbamendjen tonë historike dhe në angazhimin tonë t’i kemi këtu së bashku me neve.
Vetëm kështu e kuptojmë se rruga drejt lirisë, drejt pavarësisë, drejt demokracisë ishte një rrugë përplot sakrifica.
Në punën e angazhimin tonë përpara do të kemi sukses, vetëm duke i
pasur udhërrëfyes bijtë dhe bijat më të mira të popullit që nuk
pushuan asnjëherë dhe nuk kursyen asgjë për të fituar lirinë e
Kosovës dhe për ta çuar përpara çështjen kombëtare.
Me propozim të Qeverisë së Republikës së Kosovës, dëshmorin e kombit Rexhep Bislimi e kam dekoruar me urdhrin më të lartë “Hero i Kosovës”.
Ta gëzoni Sheshin me shtatoren e heroit Rexhep Bislimi dhe ta mbani me nder e me krenari
Ju faleminderit