Presidentja e Republikës së Kosovës, zonja Atifete Jahjaga, priti sot në takime të ndara kryetarin e Kuvendit të Kosovës, zotëri Kadri Veselin dhe kryeministrin e Republikës së Kosovës, zotëri Isa Mustafa, të cilët i përgëzoi për zgjedhjen e tyre në krye të institucioneve qendrore në vend.
Presidentja Jahjaga theksoi rëndësinë e ndërtimit të institucioneve të reja të vendit, pas një periudhe të gjatë kohore dhe tha se tani duhet të përshpejtohen të gjitha proceset në vend me qëllim të kompensimit të kohës së humbur. Ajo tha se Kuvendi i Kosovës duhet ta zhvillojë dhe ta avancojë debatin parlamentar duke ruajtur demokracinë parlamentare dhe të arrijë përmbushjen e detyrave dhe obligimeve të tij në fushën e legjislacionit.Presidentja Jahjaga tha se qeverisja e re në Kosovë duhet të përmbushë pritjet e qytetarëve të vendit për zhvillim ekonomik, sundim të rendit dhe të ligjit dhe përmbushjes së obligimeve ndërkombëtare.Kryetari i Kuvendit, zotëri Kadri Veseli dhe kryeministri i ri i Kosovës, zotëri Isa Mustafa, në takimet e ndara në Zyrën e Presidentes, theksuan rolin që ka luajtur Presidentja Jahjaga në ruajtjen e stabilitetit në vend dhe të garantimit të funksionimit demokratik të institucioneve dhe u angazhuan për thellimin e bashkëpunimit ndërinstitucional.Kryetari i Kuvendit, zotëri Veseli, theksoi se në të dy seancat e Kuvendit, edhe atë konstituive dhe të jashtëzakonshme, është respektuar ligjshmëria dhe kushtetutshmëria dhe tha se Kuvendi i Kosovës do të angazhohet maksimalisht për të përmbushur obligimet e tij.Kryeministri i ri i Kosovës, zotëri Mustafa, tha se qeveria e tij, në përbërje shumetnike, ka marrë zotimet e saj dhe se do t’i përmbahet programit për zhvillim ekonomik të vendit dhe vendosjen e rendit dhe të ligjit si dhe në përmbushjen e të gjitha obligimeve karshi bashkësisë ndërkombëtare.