Presidentja e Republikës së Kosovës, zonja Atifete Jahjaga, priti sot në takim përfaqësuesin e BE-së në dialogun ndërmjet Republikës së Kosovës dhe Republikës së Serbisë, zotëri Robert Cooper, i shoqëruar nga përfaqësuesi i posaçëm i BE-së në Kosovë, zotëri Samuel Zhbogar dhe drejtori për Evropën Perëndimore, Ballkanin Perëndimor dhe Turqinë, në Shërbimin Evropian për Veprim te Jashtëm, zotëri Fernando Gentilini.
Presidentja Jahjaga dhe zotëri Cooper biseduan për dialogun ndërmjet Republikës së Kosovës dhe Republikës së Serbisë për çështjet e interesit të përbashkët, si dhe për përfaqësimin e Kosovës në nismat rajonale dhe ndërkombëtare.Presidentja Jahjaga tha se dialogu po zhvillohet ndërmjet dy vendeve të pavarura dhe sovrane dhe në reciprocitet të plotë për të gjitha çështjet. Ajo tha se zgjidhjet që dalin nga dialogu duhet të jenë zgjidhje në përputhje me standardet dhe praktikat më të mira evropiane dhe ato duhet të garantohen nga BE-ja.Presidentja e Republikës së Kosovës, zonja Atifete Jahjaga, tha se dialogu në Bruksel, me lehtësimin e BE-së, nuk po zhvillohet për statusin e Kosovës por për çështje teknike, të interesit të përbashkët ndërmjet dy vendeve dhe adreson çështje konkrete.Ajo tha se përfaqësimi i Republikës së Kosovës në nismat rajonale dhe ndërkombëtare duhet të bëhet me emrin me të cilin është njohur ajo nga 87 vendet e botës dhe me emrin me të cilin Republika e Kosovës vendos marrëdhënie bilaterale, si shtet sovran dhe i pavarur.Përfaqësuesi i BE-së në dialogun ndërmjet Republikës së Kosovës dhe Republikës së Serbisë, zotëri Robert Cooper, e vlerësoi punën që po bën Presidentja Jahjaga. Ai tha se dialogu ka arritur një përparim të caktuar dhe se marrëveshjet kanë filluar të zbatohen gradualisht. Ai u interesua në veçanti për qëndrimin e Presidentes për çështjen e përfaqësimit të Kosovës në nismat dhe organizatat rajonale dhe ndërkombëtare.