Prishtinë, 14 mars – Presidenti i Republikës së Kosovës, Hashim Thaçi, ka pritur sot në takim Drejtorin e Komitetit Ndërkombëtar të Kryqit të Kuq (KNKK) për Evropë dhe Azi Qendrore, Patrick Vial, i shoqëruar nga shefi i Misionit të KNKK-së në Kosovë, Agim Gashi.
Në këtë takim është biseduar për mundësinë e thellimit të bashkëpunimit ndërmjet institucioneve të Kosovës dhe Kryqit të Kuq Ndërkombëtar.Presidenti Thaçi ka theksuar se roli i KNKK-së në periudha të ndryshme ka qenë përcaktues për tejkalimin e sfidave të ndryshme që ka pas populli i Kosovës.“Ju falënderoj për mbështetjen që i keni dhënë popullit para dhe pas luftës në Kosovë”, ka thënë presidenti Thaçi.Gjithashtu, në këtë takim është biseduar edhe për çështjen e personave të pagjetur.Presidenti Thaçi i ka shprehur mbështetje të plotë KNKK-së në zbardhjen e fatit të pagjeturve nga të gjitha komunitetet.Nga ana tjetër, Drejtori i Komitetit Ndërkombëtar të Kryqit të Kuq (KNKK) për Evropë dhe Azi Qendrore, Patrick Vial, e ka falënderuar presidentin Thaçi për mbështetjen e dhënë. Presidenti Thaçi dhe Drejtori i Komitetit Ndërkombëtar të Kryqit të Kuq (KNKK) për Evropë dhe Azi Qendrore kanë biseduar edhe për iniciativën e themelimit të Komisionit për të Vërteten dhe Pajtimin, i cili është mirëpritur nga familjet e të pagjeturve nga të gjitha komunitetet në Kosovë.