E kemi shtruar shumë qartë se Kosova smund të jetë peng i kërkesave të vazhdueshme dhe prolongimeve që dikush mund ti iniciojë, tha Presidenti Sejdiu.
Presidenti i Kosovës, dr. Fatmir Sejdiu, dhe Kryeministri Agim Çeku u kthyen sot nga Brukseli, ku gjatë dy ditëve të shkuara patën një varg takimesh të rëndësishme, të cilat temë qendrore patën procesin e pavarësimit të vendit tonë. Takimin me Sekretarin e Përgjithshëm të OKB-së, z. Ban Ki-moon, Presidenti Sejdiu e ka cilësuar si jashtëzakonisht të rëndësishëm. Vlerësime të ngjashme ai dha edhe për takimet që bashkë me Kryeministrin Çeku pati me shefin e Bashkimit Evropian për Politikë të Jashtme dhe Siguri, z. Javier Solana, me kryetarin e Komisionit Evropian, z. Jose Manuel Barrose, me ministrin e Jashtëm të Portugalisë, z. Luis Amado, me ministrin e Punëve të Jashtme të Belgjikës, z. Karel De Gucht, si dhe me zyrtarë të tjerë të lartë të BE-së.Në të gjitha këto takime, tha Presidenti Sejdiu, temë diskutimi ka qenë çështja e statusit politik të Kosovës dhe rrjedhat që kanë të bëjnë me të në këto zhvillimet e fundit. “Ne këmi shprehur qëndrimin tonë, si Kosovë dhe si Ekip i Unitetit, për një zgjidhje sa më të shpejtë dhe të suksesshme, konform vullnetit politik të popullit të Kosovës”, theksoi Presidenti Sejdiu dhe shtoi: “Ne, bashkë me bashkësinë ndërkombëtare, me Presidentin Ahtisari, si dhe me Grupin e Kontaktit, e kemi përmbyllur një dokument të rëndësishëm, që është dorëzuar edhe në Këshillin e Sigurimit dhe atje po bëhen përpjekje për ta mbështetur me një rezolutë të të gjithëve, e cila do të mbështesë në esencën e saj këtë propozim të Ahtisarit”. “E kemi shtruar shumë qartë se Kosova s’mund të jetë peng i kërkesave të vazhdueshme dhe prolongimeve që dikush mund t’i iniciojë”, tha Presidenti Sejdiu, duke lënë të kuptohet se Kosova, edhe nëse detyrohet të kërkojë rrugë alternative, do të vazhdojë bashkëpunimin e ngushtë me të gjithë faktorët e rëndësishëm ndërkombëtarë, të cilët e kanë përkrahur dhe e përkrahin pavarësinë e Kosovës.Në këtë kontekst, Presidenti veçoi angazhimin e vazhdueshëm të z. Ban Ki-moon që ky proces të intensifikohet dhe të përmbyllet sa më shpejt.Ndërkaq, Kryeministri Çeku tha se në Bruksel kishin kërkuar një qasje të re të BE-së, një qasje më të guximshme, meqë nuk është e mjaftueshme, si tha ai, që vendet e Unionit Evropian vetëm të preferojnë rrugën e zgjidhjes së statusit të Kosovës përmes Këshillit të Sigurimit dhe të presim se çka do të bëjë KS-ja, sepse jemi dëshmitarë të draftit të pestë të rezolutës dhe se draft pas drafti, Këshilli i Sigurimit është duke e zvarritur dhe duke e bërë më të paqartë edhe rrugën, edhe kohën e zgjidhjes së statusit. Edhe kryeministri Çeku tha se në Bruksel ishte biseduar për rrugën alternative të pavarësimit të Kosovës, duke pohuar se ajo është një rrugë e vështirë, me sfida të shumta, me të panjohura të paparashikueshme. Por, vijoi ai, neve na duhet qartësi dhe shpejtësi për zgjidhjen e statusit të Kosovës. “Nëse jemi të detyruar të zgjedhim në mes asaj të pamundshmes, ose të pasigurtës dhe të vështirës, unë e kisha preferuar të vështirën”, pohoi z. Çeku. Më tej, ai tha se “nëse ne e bëjmë këtë zgjidhje, kërkojmë mbështetjen dhe bashkëpunimin e aleatëve tanë, në radhë të parë të Shteteve të Bashkuara të Amerikës dhe Unionit Evropian. “Jemi bashkë në këtë proces dhe bashkë duhet ta përmbyllim”, tha Çeku.