Dr. Jakup Krasniqi

Biografi e shkurtër e Jakup Krasniqit

Jakup Krasniqi ka lindur më 1 janar 1951, në fshatin Negrovc të komunës së Drenasit. Krahas angazhimeve për përgatitjen e tij profesionale dhe përfundimin e studimeve në degën e Historisë në Universitetin e Prishtinës, ai ishte edhe një nga udhëheqësit e veprimtarisë atdhetare kundër pushtuesit serb.

Pas përfundimit të studimeve, Jakup Krasniqi luajti një rol të rëndësishëm si pedagog:

• 1972-1977, mësimdhënës në Fatos dhe Arllat;
• 1976-1977, mësimdhënës në shkollën e mesme në Drenas;
• 1979-1981, mësimdhënës në Arllat dhe pastaj në shkollën e mesme në Skenderaj.

Për shkak të veprimtarisë politike në interes të realizimit të aspiratave tona kombëtare, Jakup Krasniqi ka vuajtur më shumë se 10 vjet burgim.

Pas përfundimit të dënimit dhe daljes nga burgu, Jakup Krasniqi u angazhua në kuadër të Lidhjes Demokratike të Kosovës. Fillimisht në kuadër të strukturave të LDK-së në Drenas dhe, më vonë, edhe si anëtar i kryesisë së partisë, Jakup Krasniqi ka dhënë një kontribut të jashtëzakonshëm gjatë rezistencës paqësore.

Për shkak të autoritetit të madh që gëzonte në popull, në zgjedhjet e mbajtura nën pushtim gjatë periudhës 1992-1998, Jakup Krasniqi u zgjodh deputet në Kuvendin e Kosovës. Përkundër asaj se pushtuesit nuk lejuan funksionalizimin e këtij kuvendi, përpjekjet për të ndërtuar pushtet paralel përballë regjimit të Serbisë kishin efektet e veta pozitive në legjitimimin e aspiratave tona kombëtare për liri dhe pavarësi.

Paralelisht me aktivitetin politik, Jakup Krasniqi vazhdoi kontributin e tij në rrafshin pedagogjik dhe edukativ si mësimdhënës në gjimnazin “Skënderbeu” në Drenas (1991-1994) dhe kryetar i Këshillit të Arsimit në Drenas (1995-1998).

Që në fillimet e shpërthimit të luftës së armatosur, Jakup Krasniqi kreu funksionin e zëdhënësit dhe të njërit prej përfaqësuesve të saj politikë. Gjatë Konferencës së Rambujesë, Jakup Krasniqi dëshmoi cilësi të larta politike dhe diplomatike, duke luajtur një rol jashtëzakonisht të madh në ruajtjen e unitetit të delagacionit të Kosovës në këto bisedime.

Pas përfundimit të luftës çlirimtare, Jakup Krasniqi ushtroi disa funksione:

• gjatë periudhës qershor 1999 – janar 2000 ishte ministër i Ministrisë për Rindërtim dhe Zhvillim dhe zëdhënës i Qeverisë së Përkohshme të Kosovës;
• deputet në Legjislaturën e Parë të Kosovës, të konstituuar më 17 nëntor 2001;
• gjatë periudhës mars 2002 – dhjetor 2004 ishte ministër i Ministrisë së Shërbimeve Publike në Qeverinë e Kosovës;
• gjatë periudhës 23 nëntor 2004 – 12 dhjetor 2007 ishte deputet në Legjislaturën e Dytë të Kosovës dhe shef i Grupit Parlamentar të Partisë Demokratike të Kosovës;
• gjatë periudhës 13 dhjetor 2007- 3 nëntor 2010 ishte deputet në Legjislaturën e Tretë të Kosovës dhe Kryetar i Kuvendit të Kosovës;
• gjatë periudhës 2 shtator 2010 – 22 shkurt 2011, si kryetar i Kuvendit, Jakup Krasniqi ushtroi detyrën e Presidentit të Kosovës, pas dorëheqjes së Fatmir Sejdiut nga kjo detyrë;
• të njëjtën detyrë e ushtroi në periudhën 1 prill 2011 – 7 prill 2011, pas dorëheqjes së Behxhet Pacollit nga ky funksion;
• gjatë periudhës 12 dhjetor 2010 – 7 maj 2014 ishte deputet në Legjislaturën e Katërt të Kosovës dhe Kryetar i Kuvendit të Kosovës.

Përkundër asaj se u zgjodh deputet edhe në Legjislaturën e Pestë të Kosovës, më 20 janar 2015 Jakup Krasniqi hoqi dorë nga posti i deputetit dhe aktivitetin politik e kufizoi vetëm në kuadër të Nismës Socialdemokrate, si kryetar i Këshillit Kombëtar të kësaj partie.

Përveç angazhimeve politike, Jakup Krasniqi ka dhënë një kontribut shumë të madh si publicist dhe historian, ku nëpërmjet artikujve dhe veprave të shumta, hodhi dritë mbi shumë aspekte të procesit historik që lidhet me rezistencën e popullit të Kosovës, si dhe me sfidat me të cilat ballafaqohej Kosova pas pavarësimit të vendit.

Disa nga veprat kryesore të Jakup Krasniqit janë:

• Kthesa e madhe – Ushtria Çlirimtare e Kosovës, shtëpia botuese “Buzuku”, Prishtinë 2006,302 faqe.
• Kosova i a historical context; shtëpia botuese “Europrinty”, Prishtinë 2007, 128 faqe.
• Një luftë ndryshe për Kosovën; shtëpia botuese “Buzuku”, Prishtinë 2007, 222 faqe.
• Pavarësia si kompromis; shtëpia botuese “Buzuku”, Prishtinë 2010, 202 faqe.
• Kosova në kontekstin historik; botim i dytë i plotësuar, shtëpia botuese “Buzuku”, Prishtinë, 202 faqe.
• Lëvizja për Republikën e Kosovës1981-1991 sipas shtypit shqiptar, shtëpia botuese “Buzuku”, Prishtinë 2011, 315 faqe.
• Guxo ta duash lirinë, shtëpia botuese “Buzuku”, Prishtinë 2011, 189 faqe.
• Pranvera e lirisë ‘81, shtëpia botuese “Buzuku”, Prishtinë 2011, 189 faqe.
• Flijimi për lirinë, shtëpia botuese “Buzuku”, Prishtinë 2011, 185 faqe.
• Pavarësi dhe personalitete: në 100-vjetorin e Pavarësisë së Shqipërisë, shtëpia botuese “Buzuku”, Prishtinë 2012, 394 faqe.
• Një histori e kontestuar: kritikë librit të Oliver Jens Schmitt: “Kosova – histori e shkurtër e një treve qendrore ballkanike”,shtëpia botuese “Buzuku”, Prishtinë 2013, 222 faqe.
• Skënderbeu dhe porositë për shekullin XXI, botuar nga Instituti i Historisë “Ali Hadri”, Prishtinë 2018,288 faqe.
• Arti i bisedimeve, shtëpia botuese “Buzuku”, Prishtinë 2018, 214 faqe.
• Ballafaqime historike për çlirim e bashkim kombëtar,botuar nga Instituti i Historisë “Ali Hadri”, Prishtinë, 2019, 412 faqe.
• Agresioni serb dhe taksa e Kosovës, shtëpia botuese “Buzuku”, Prishtinë, 2021, 238 faqe.