Presidentja Osmani: Të ftuarit e mi të parë në Presidencë xhudistet e xhudistët që lartësuan flamurin e Kosovës

Presidentja e Republikës së Kosovës, Vjosa Osmani Sadriu, pas ceremonisë së pranimit të detyrës, priti në takimin e parë të saj ekipin e xhudistëve kampionë.

“Të ftuarit e mi të parë në Presidencë ishin ato e ata që lartësuan flamurin e Kosovës aty ku nuk arrinte dot as politika as diplomacia. Ka disa vjet që xhudistet e xhudistët e Kosovës janë bërë ambasadorët tanë më të mirë”, ka thënë presidentja Osmani. Majlinda Kelmendi, Nora Gjakova, Distria Krasniqi, Loriana Kuka, Akil Gjakova dhe shumë të tjerë jo vetëm që kanë korrur suksese historike në këtë disiplinë sportive, por kanë ngritur flamurin dhe nderuar himnin e Kosovës edhe në vende që akoma nuk e kanë njohur Kosovë.

Sipas presidentes, këta janë pjesa më pozitive e rrëfimit për Kosovën kudo në botë. “Këta janë krenaria e kombit tonë. Me rezultatet e tyre e kanë vendosur Kosovën në hartën e botës ndaj u jemi mirënjohës secilit nga ta! Shpirti garues i xhudisteve e xhudistëve tanë mban mbi supe shpresën e rinisë sonë se asgjë nuk është e paarritshme dhe se me përkushtim, punë, pasion e disiplinë ëndrrat bëhen realitet”, ka thënë presidentja Osmani.