Presidentja Osmani priti në takim nënkryetarin e Parlamentit Evropian Rainer Wieland

Presidentja e Republikës së Kosovës, Vjosa Osmani priti në takim sot, nënkryetarin e Parlamentit Evropian, Rainer Wieland dhe një delegacion të Shoqatës gjermano-kosovare.

Në takim me z.Wieland, Presidentja Osmani ka përsëritur se Kosova tashmë i ka plotësuar të gjitha kriteret për liberalizim vizash, ndaj në këtë kontekst ka kërkuar që vendet hezituese ta mundësojnë lëvizjen e lirë për qytetarët e Kosovës.


Më tej, Presidentja është ndalur edhe te procesi i dialogut me Serbinë ku ka potencuar se ai duhet të marrë fund me njohjen e Kosovës. Sipas zonjës Osmani pavarësisht dialogut, qytetarët e Kosovës përballen me nivel të lartë të papunësisë, sikurse edhe me pasojat e pandemisë, posaçërisht në sferën e ekonomisë.


Prandaj, sipas Presidentes Osmani prioritetet kryesore të institucioneve duhet të jenë pikërisht këto sfida me të cilat ballafaqohen qytetarët.