Mesazh urimi i Presidentes së Kosovës, zonjës Atifete Jahjaga, për Pashkët

Presidentja e Republikës së Kosovës, zonja Atifete Jahjaga ka uruar të gjithë besimtarët e krishterë dhe qytetarët e Kosovës me rastin e Festës së Pashkëve.

Në mesazhin e urimit thuhet:
 
Besimtarëve të krishterë dhe të gjithë qytetarëve të Kosovës Ju uroj Festën e Pashkëve.
 
Le të shërbejë kjo festë e Ringjalljes si dëshmi e përjetësisë, si dëshmi se veprat e mira shpërblehen te Zoti, se sakrifica për të mirën shpaguhet, se jeta është e amshueshme dhe se misioni i njeriut është të jetojë në harmoni dhe në paqe dhe ta duan e ta ndihmojnë njëri-tjetrin.
 
Të gjithë qytetarët e Kosovës i uroj që në simbolin e Pashkëve të shohin drejt ardhmërisë më të lumtur e më të begatshme që të gjithë njerëzit janë vëllezër e motra ndërmjet veti pa dallim të përkatësisë fetare, kombëtare, racore, gjinore dhe dallimi tjetër, sepse të gjithë jemi një te Perëndia dhe te besimi në njeriun dhe në vlerat njerëzore.
 
Zonja Atifete Jahjaga,
Presidente e Republikës së Kosovës