Prishtinë, 19 qershor 2007 –
Ekipi i Unitetit ka diskutuar sot për përgatitjet për Kushtetutën e Kosovës dhe çështje tjera që lidhen me statusin e Kosovës.
Zëdhënësi i Ekipit të Unitetit, z.Skender Hyseni tha se në takimin e sotëm u shtrua çështja e një pyetësori, i cili kërkon qëndrime politike rreth disa çështjeve të cilat duhet te përfshihen në Kushtetutën e re të Kosovës.Sipas tij, z. Hajredin Kuqi udhëheqës i Komisionit për hartimin e Kushtetutës, e njoftoi Ekipin e Unitetit për përparimin që është bërë në hartimin e Kushtetutës , por në mënyrë specifike, ai tha se, është formuar një grup i vogël që do të japë disa propozime rreth pyetjeve qe kërkojnë qëndrime politike siç mund të jetë mënyra e zgjedhjes së Presidentit ose çështje të kësaj natyre, pyetje këto që kërkojnë konsensus dhe qëndrim të qartë politik.Ekipi i Unitetit mirëpret dhe përshëndet deklaratën zyrtare që ka dalë dje nga takimi i Ministrave të Jashtëm të BE-së, dhe në veçanti qëndrimin se çështja e statusit të Kosovës duhet zgjidhur në mënyrë rapide, siç thuhet atje shumë shpejt, dhe po kështu qëndrimin se Kosova është rast sui generis dhe nuk paraqet precedent për asnjë vend tjetër.z. Hyseni tha se nëpër zyrat e OKB-së ka shumë ide që qarkullojnë, por deri tani është vetëm një draft, ai i projektrezolutës në bazë të propozimit të Presidentit Ahtisari.“Ne insistojmë që sa më shpejt të nxirret në votim draft-rezoluta në Këshillin e Sigurimit, në mënyrë që të qartësohet rruga që Kosova duhet të ndjekë”Askush nuk e përjashton asnjë mundësi, mund të ndodhë që Kosova do të detyrohet, edhe në rrugë alternative ta rrumbullakojë statusin e vet, por për këtë përgjegjësinë do ta bartin ato vende në Këshillin e Sigurimit, të cilat e kanë bllokuar procesin në Kombet e Bashkuara.